ನವದೆಹಲಿ: ಕೇಂದ್ರ ರೈಲ್ವೇ ನೌಕರರಿಗೆ ಹಬ್ಬಕ್ಕೂ ಮುನ್ನವೇ ಕೇಂದ್ರ ಸರ್ಕಾರ ಉಡುಗೊರೆ ನೀಡಿದ್ದು, ಇಲಾಖೆಯ ನೌಕರರಿಗೆ ಬೋನಸ್ ನೀಡಲು ಕೇಂದ್ರ ಸಂಪುಟ ಸಭೆ ಒಪ್ಪಿಗೆ ನೀಡಿದೆ.
ಬುಧವಾರ ನವದೆಹಲಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದ್ದು, ರೈಲ್ವೇ ಇಲಾಖೆಯ ನೌಕರರಿಗೆ ಬೋನಸ್ ನೀಡಲು ಒಪ್ಪಿಗೆ ನೀಡಲಾಗಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ಕಳೆದ 3 ವರ್ಷಗಳಲ್ಲಿ ನೀಡಿದಂತೆ 2014-15ರ ಹಣಕಾಸು ವರ್ಷದಲ್ಲಿಯೂ ಉತ್ಪಾದನೆ ಆಧಾರಿತ ಬೋನಸ್ ಆಗಿ 78 ದಿನಗಳ ವೇತನವನ್ನು ನೌಕರರಿಗೆ ನೀಡಲು ಸಂಪುಟ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಗಿದೆ ಎಂದು ತಿಳಿದುಬಂದಿದೆ.
ಕೇಂದ್ರ ಸಚಿವ ಸಂಪುಟದ ನಿರ್ಧಾರದಿಂದಾಗಿ ಸುಮಾರು 12 ಲಕ್ಷ ರೈಲ್ವೇ ನೌಕರರು ಈ ತಿಂಗಳಲ್ಲಿ ತಲಾ ಅಂದಾಜು 8897 ರೂಪಾಯಿಗಳನ್ನು ಪಡೆಯುವರು. ಇದರಿಂದ ಸರ್ಕಾರದ ಬೊಕ್ಕಸಕ್ಕೆ 800 ಕೋಟಿ ರೂಪಾಯಿಗಳ ಹೆಚ್ಚಿನ ಹೊರೆಯಾಗುವುದು ಎಂದು ತಜ್ಞರು ಅಂದಾಜು ಮಾಡಿದ್ದಾರೆ. 2011-12, 2012-13 ಮತ್ತು 2013-14ರ ಸಾಲಿನಲ್ಲೂ 78 ದಿನಗಳ ವೇತನವನ್ನು ರೈಲ್ವೇ ನೌಕರರಿಗೆ ನೀಡಲಾಗಿತ್ತು.
