ಕಪ್ಪುಹಣ ಘೋಷಣೆ: ಐಪಿಸಿ ಅಡಿ ದಾಖಲಾಗುವ ದೂರುಗಳಿಂದ ವಿನಾಯಿತಿ ಇಲ್ಲ

ನವದೆಹಲಿ: ಕಪ್ಪು ಹಣ ಘೋಷಣೆಗೆ ಕೇಂದ್ರ ಸರ್ಕಾರ ನೀಡಿರುವ ಅವಕಾಶ ಜೂನ್ 1ರಿಂದ ಆರಂಭಗೊಳ್ಳಲಿದೆ ಎಂದು ಮೂಲಗಳು ತಿಳಿಸಿವೆ. 

ಘೋಷಿತ ಕಪ್ಪುಹಣವನ್ನು ಭ್ರಷ್ಟಾಚಾರ ಅಥವಾ ವಂಚನೆಯಂತಹ ಅಪರಾಧಗಳ ಮೂಲಕ ಗಳಿಸಿದ್ದಾದರೆ ಭಾರತೀಯ ದಂಡ ಸಂಹಿತೆ(ಐಪಿಸಿ) ಅಡಿಯಲ್ಲಿ ದಾಖಲಿಸಬಹುದಾದ ದೂರುಗಳಿಂದ ವಿನಾಯಿತಿ ದೊರೆಯುವುದಿಲ್ಲ ಎಂದು ಸರ್ಕಾರ ಹೇಳಿದೆ. 

ವಿದೇಶಗಳಲ್ಲಿ ಭಾರತೀಯರು ಇರಿಸಿರುವ ಕಪ್ಪು ಹಣ ಘೋಷಣೆಗೆ ಕಳೆದ ವರ್ಷ ಕೇಂದ್ರ ಸರ್ಕಾರ ಮೂರು ತಿಂಗಳ ಅವಕಾಶ ನೀಡಿತ್ತು. ಈ ವೇಳೆ ಆದಾಯ ತೆರಿಗೆ, ಕಸ್ಟಮ್ಸ್ ಕಾಯ್ದೆ, ಸಂಪತ್ತು ತೆರಿಗೆ ಕಾಯ್ದೆ, ಕಂಪನಿ ಕಾಯ್ದೆ, ವಿದೇಶಿ ವಿನಿಮಯ ನಿರ್ವಹಣೆ ಕಾಯ್ದೆಗಳಿಂದ ವಿನಾಯಿತಿ ನೀಡಲಾಗಿತ್ತು. ಈ ವರ್ಷ ನಾಲ್ಕು ತಿಂಗಳ ಅವಕಾಶ ನೀಡಲಿದ್ದು, ಕಪ್ಪು ಹಣ, ಆಶ್ತಿ ಮೌಲ್ಯದ ಶೇ.45ರಷ್ಟು ತೆರಿಗೆ ಪಾವತಿಸುವ ಮೂಲಕ ಕಾನೂನು ಕ್ರಮದಿಂದ ಪಾರಾಗುವ ಅವಕಾಶ ನೀಡಲಾಗಿದೆ. 

ಆದಾಯ ತೆರಿಗೆ ಕಾಯ್ದೆ ಅಡಿಯಲ್ಲಿ ಪರಿಶೀಲನೆಗೆ ಒಳಪಡಿಸಲಾಗುವುದಿಲ್ಲ ಹಾಗೂ ಸಂಪತ್ತನ್ನು ಮುಚ್ಚಿಟ್ಟ ಅಪರಾಧಕ್ಕೆ ಕೈಗೊಳ್ಳಬಹುದಾದ ವಿಚಾರಣೆಯಿಂದ ವಿನಾಯಿತಿ ಇದೆ. ಆದರೆ, ಐಪಿಸಿ ಅಡಿ ನಡೆಸಬಹುದಾದ ವಿಚಾರಣೆಯಿಂದ ವಿನಾಯಿತಿ ಇಲ್ಲ ಎಂದು ಸರ್ಕಾರ ತಿಳಿಸಿದೆ.