ನವದೆಹಲಿ: ಪಾಕಿಸ್ತಾನ ಬಿಡುಗಡೆ ಮಾಡಿದ ಹೊಸ ಪಟ್ಟಿಯಲ್ಲಿ 403 ಮಂದಿ ಭಾರತೀಯರು ಜುಲೈ 2015ರವರೆಗೆ ಪಾಕಿಸ್ತಾನ ಜೈಲಿನಲ್ಲಿದ್ದು, ಅವರಲ್ಲಿ 355 ಮೀನುಗಾರರಾಗಿದ್ದಾರೆ, ಇನ್ನು 48 ಮಂದಿ ಇತರರಾಗಿದ್ದು, ಐವರು ಮಹಿಳೆಯರಾಗಿದ್ದಾರೆ.
ಭಾರತ-ಪಾಕ್ ಸ್ನೇಹ ಉಪಕ್ರಮ ಮಾಹಿತಿ ಹಕ್ಕು ಕಾಯ್ದೆಯಡಿ ಕೇಳಿದ ಪ್ರಶ್ನೆಗೆ ಮಾಹಿತಿ ಸಿಕ್ಕಿದೆ. ಪಾಕಿಸ್ತಾನದ ವಿದೇಶಾಂಗ ವ್ಯವಹಾರಗಳ ಇಲಾಖೆ 'ಆಗಜ್ ಇ ದೋಸ್ತಿ' ಎಂಬ ಭಾರತ-ಪಾಕ್ ರಾಷ್ಟ್ರಗಳ ಸರ್ಕಾರೇತರ ಸಂಘಟನೆಗಳ ಜಂಟಿ ಸ್ನೇಹ ಉಪಕ್ರಮಕ್ಕೆ ಈ ಉತ್ತರ ನೀಡಿದೆ.
ಸಂಘಟನೆ 2014ರಲ್ಲಿ ಮೊದಲ ಪಟ್ಟಿಯನ್ನು ಬಿಡುಗಡೆ ಮಾಡಿತ್ತು. ದಕ್ಷತೆಯನ್ನು ಕಾಪಾಡಲು ಈ ಕ್ರಮವನ್ನು ಅನುಸರಿಸಲಾಗಿದೆ. ಬಂಧನಕ್ಕೊಳಗಾದವರ ವಿವರಗಳನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸುವುದರಿಂದ ಅವರ ಕುಟುಂಬದವರಿಗೆ ಮಾಹಿತಿ ಗೊತ್ತಾಗುತ್ತದೆ ಎಂದು ಆಗಜ್ ಇ ದೋಸ್ತಿಯ ಸ್ಥಾಪಕ ರವಿ ನಿತೇಶ ಪಿಟಿಐ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
2008ರಲ್ಲಿ ಭಾರತ-ಪಾಕ್ ಕೈದಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಲು ಒಪ್ಪಂದ ಮಾಡಿಕೊಂಡಿದ್ದವು. ಅದರಂತೆ ಪಟ್ಟಿಯನ್ನು ಬಿಡುಗಡೆ ಮಾಡಲು ನಿತೇಶ್ ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದರು.ಕೈದಿಗಳ ಬಗ್ಗೆ ಸರಿಯಾದ ಮಾಹಿತಿ ಸಿಕ್ಕಿದರೆ ಒಂದು ವೇಳೆ ಅವರ ಬಂಧನದ ಅವಧಿ ಮುಗಿದಿದ್ದರೂ ಕೂಡ ಜೈಲಿನಲ್ಲಿ ಇರಬೇಕಾದ ಪರಿಸ್ಥಿತಿಯಿರುವುದಿಲ್ಲ ಎನ್ನುತ್ತಾರೆ ನಿತೇಶ್.
ಪಾಕಿಸ್ತಾನ ಸರ್ಕಾರ ಭಾರತೀಯ ಕೈದಿಗಳ ಪಟ್ಟಿಯನ್ನು ಸಾರ್ವಜನಿಕ ಪೋರ್ಟಲ್ ನಲ್ಲಿ ಬಿಡುಗಡೆ ಮಾಡುತ್ತಿರುವುದು ಇದೇ ಮೊದಲು. ಆಡಳಿತದ ತಾಂತ್ರಿಕ ತೊಂದರೆಯಿಂದ ಜೈಲಿನಿಂದ ಬಿಡುಗಡೆಯಾಗದಿರುವ ಕೈದಿಗಳನ್ನು ಬಿಡುಗಡೆ ಮಾಡಲು ಭಾರತ ಮತ್ತು ಪಾಕಿಸ್ತಾನ ರಾಷ್ಟ್ರಗಳ ಸರ್ಕಾರಗಳಿಗೆ ಪತ್ರ ಬರೆಯಲು ಸಂಘಟನೆ ಚಿಂತಿಸುತ್ತಿದೆ.
