22 ಭಾರತೀಯ ಬೋಟ್ ಬಿಡುಗಡೆಗೆ ಆಸಕ್ತಿ ತೋರಿದ ಪಾಕ್

ವಡೋದರಾ: ಪಾಕಿಸ್ತಾನ ವಶಪಡಿಸಿಕೊಂಡಿರುವ 22 ಬೋಟ್ ಗಳನ್ನು ಬಿಡಿಸಿಕೊಂಡು ಬರುವ ಸಂಬಂಧ ಗುಜರಾತ್ ಸರ್ಕಾರದ ನಿಯೋಗವೊಂದು ಪಾಕಿಸ್ತಾನಕ್ಕೆ ತೆರಳಿದ್ದು, ಬೋಟ್ ಬಿಡುಗಡೆಗೆ ಪಾಕಿಸ್ತಾನ ಅಧಿಕಾರಿಗಳು ಸಿದ್ಧವಿದ್ದಾರೆ ಎಂದು ಮಂಗಳವಾರ ನಿಯೋಗ ತಿಳಿಸಿದೆ.

ಕಳೆದ ಮಾರ್ಚ್ 3ರಿಂದ 5ರವರೆಗೆ ಕರಾಚಿಯಲ್ಲಿದ್ದ ಗುಜರಾತ್ ಮೀನುಗಾರಿಕೆ ಇಲಾಖೆ ಉಪ ನಿರ್ದೇಶಕ ಎಂ.ಕೆ.ಚೌಧರಿ ನೇತೃತ್ವದ ನಿಯೋಗ ಇಂದು ವಡೋದರಾಕ್ಕೆ ವಾಪಸ್ ಆಗಿದೆ.

ಬೋಟ್ ವಶ ಪಡಿಸಿಕೊಂಡಿದ್ದ ಕರಾಚಿಯ ವಿವಿಧ ಭಾಗಗಳಿಗೆ ನಾವು ಭೇಟಿ ನೀಡಿದ್ದು, ಪಾಕಿಸ್ತಾನ ಸಾಗರ ಭದ್ರತಾ ಸಂಸ್ಥೆ ಬೋಟ್ ಬಿಡುಗಡೆ ಪ್ರಕ್ರಿಯೆಗೆ ಸಂಪೂರ್ಣ ಸಹಕಾರ ನೀಡುವುದಾಗಿ ಭರವಸೆ ನೀಡಿದೆ ಎಂದರು.

ಪಾಕ್ ವಶದಲ್ಲಿರುವ ಬೋಟ್ ಗಳ ಹಾಳಾಗಿದ್ದು, ಸಣ್ಣಪುಟ್ಟ ರಿಪೇರಿ ಮಾಡುವ ಅಗತ್ಯ ಇದ್ದು, ಈ ಸಂಬಂಧ ನಾವು ಕರಾಚಿ ಮೂಲದ ಬೋಟ್ ವ್ಯಾಪಾರಿಗಳು ಮತ್ತು ಮೆಕ್ಯಾನಿಕ್ ಗಳನ್ನು ಸಂಪರ್ಕಿಸಿದ್ದೇವೆ ಎಂದು ಚೌಧರಿ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ. ಅಲ್ಲದೆ ಒಟ್ಟು 22 ಬೋಟ್ ಗಳ ರಿಪೇರಿಗಾಗಿ ಸುಮಾರು 44 ಲಕ್ಷ ರುಪಾಯಿ ವೆಚ್ಚವಾಗುವ ಸಾಧ್ಯತೆ ಇದ್ದು, ಈ ಬಗ್ಗೆ ಅವರು ಗುಜರಾತ್ ಸರ್ಕಾರಕ್ಕೆ ವರದಿ ಸಲಿಸಲಿದ್ದಾರೆ ಎಂದರು.