ಕೇರಳ: ಸಚಿವರ ಅಂತಿಮ ಪಟ್ಟಿ ತಯಾರಿಸಿದ ಸಿಪಿಐ (ಎಂ), 8 ಮಂದಿ ಹೊಸಬರಿಗೆ ಮಣೆ

ತಿರುವನಂತಪುರಂ: ಎಲ್‌ಡಿಎಫ್‌ನ ಪ್ರಧಾನ ಪಕ್ಷಗಳಾದ ಸಿಪಿಐ ಮತ್ತು ಸಿಪಿಎಂ, ಕೇರಳದ ನೂತನ ಸಚಿವ ಸಂಪುಟಕ್ಕೆ ಸಚಿವರ ಅಂತಿಮ ಪಟ್ಟಿಯನ್ನು ತಯಾರಿಸಿವೆ. ಇದರಲ್ಲಿ 8 ಮಂದಿ ಹೊಸಬರಿಗೆ ಮಣೆ ಹಾಕಲಾಗಿದೆ.

ರಾಜ್ಯ ಸಚಿವ ಸಂಪುಟದಲ್ಲಿ 19 ಸಚಿವರಿದ್ದು, ಸಿಪಿಐ (ಎಂ) ನಿಂದ 12, ಮುಖ್ಯಮಂತ್ರಿ ಸೇರಿದಂತೆ ಸಿಪಿಐ ಇಂದ 4 ಮತ್ತು ಜನತಾದಳ (ಎಸ್), ಎನ್‌ಸಿಪಿ, ಕಾಂಗ್ರೆಸ್ (ಎಸ್) ನಿಂದ ತಲಾ ಒಬ್ಬರಿಗೆ ಸಚಿವ ಸ್ಥಾನ ನೀಡಲಾಗಿದೆ. 

ಇಬ್ಬರು ಸಚಿವೆಯರು ಸೇರಿದಂತೆ 8 ಮಂದಿ ಹೊಸಬರು ಇಲ್ಲಿದ್ದಾರೆ. ಡಾ. ಥಾಮಸ್ ಐಸಾಕ್, ಎಕೆ ಬಾಲನ್, ಜಿ ಸುಧಾಕರನ್ ಮೊದಲಾದವರಿಗೆ ಸಚಿವ ಸ್ಥಾನ ನೀಡಿದ್ದು  ಪಿ ಶ್ರೀರಾಮಕೃಷ್ಣನ್ ಹೊಸ ಸ್ಪೀಕರ್ ಆಗಲಿದ್ದಾರೆ.

ಇಪಿ ಜಯರಾಜನ್, ಕೆಕೆ ಶೈಲಜಾ, ಟಿಪಿ ರಾಮಕೃಷ್ಣನ್ , ಕಡಕಂಪಳ್ಳಿ ಸುರೇಂದ್ರನ್, ಎಸಿ ಮೊಯ್ದೀನ್, ಜೆ ಮೆರ್ಸಿ ಕುಟ್ಟಿ ಅಮ್ಮ, ಪ್ರೊ. ಸಿ ರವೀಂದ್ರನಾಥ್, ಡಾ. ಕೆಟಿ ಜಲೀಲ್ ಸಚಿವ ಸಂಪುಟದಲ್ಲಿರುವ ಹೊಸಬರು ಆಗಿದ್ದಾರೆ.

ಸಿಪಿಐ ಪಕ್ಷದಿಂದಿರುವ ಸಚಿವರೆಲ್ಲರೂ ಹೊಸಬರೇ ಆಗಿದ್ದಾರೆ. ಪಿ.ಶಶಿ ಡೆಪ್ಯುಟಿ ಸ್ಪೀಕರ್ ಆಗಲಿದ್ದಾರೆ.