ಅಗರ್ತಲಾ: ಕಿತ್ತು ತಿನ್ನುವ ಬಡತನದಿಂದಾಗಿ ಬುಡಕಟ್ಟು ಜನಾಂಗದ ದಂಪತಿ ತಮ್ಮ ಎರಡು ವರ್ಷದ ಹೆಣ್ಣು ಮಗುವನ್ನು 650 ರು.ಗೆ ಮಾರಾಟ ಮಾಡಿರುವ ಘಟನೆ ತ್ರಿಪುರದಲ್ಲಿ ನಡೆದಿದೆ.
ಬಡತನ ರೇಖೆಗಿಂತ ಕೆಳಗಿರುವ ಈ ದಂಪತಿ ಮಗುವಿನ ಖರ್ಚು ವೆಚ್ಚ ಭರಿಸಲಾಗದೇ ಮಗುವನ್ನು ಮಾರಾಟ ಮಾಡಿದ್ದಾರೆ ಎಂದು ಸ್ಥಳೀಯ ಪತ್ರಿಕೆಯೊಂದು ವರದಿ ಮಾಡಿದೆ.
ಬಡತನ ಹಾಗೂ ಆಹಾರವಿಲ್ಲದ ಕಾರಣ ಕೆಲ ಪ್ರದೇಶಗಳ ಬುಡಕಟ್ಟು ಜನಾಂಗದ ಮಂದಿ ಸಾಯುತ್ತಿದ್ದಾರೆ. ಆದರೆ ಎಲ್ಲೋ ಒಂದೋ, ಎರಡೋ ಪ್ರಕರಣಗಳಷ್ಟೇ ಮಾಧ್ಯಮಗಳಿಂದ ಬೆಳಕಿಗೆ ಬರುತ್ತಿವೆ ಎಂದು ತೃಣಮೂಲ ಕಾಂಗ್ರೆಸ್ ಶಾಸಕ ಸುದೀಪ್ ರಾಯ್ ಬಹರ್ಮನ್ ತಿಳಿಸಿದ್ದಾರೆ.
ತಮ್ಮ ಜೀವನ ನಿರ್ವಹಣೆಗೋಸ್ಕರ ಈ ದಂಪತಿ ತಮ್ಮ ಮಗುವನ್ನು ಮಾರಾಟ ಮಾಡಿದ್ದಾರೆ ಎಂದು ತಿಳಿಸಿದ್ದಾರೆ. ಇನ್ನೂ ಮಗು ಮಾರಾಟದ ಆರೋಪದ ಮೇಲೆ ದಂಪತಿಯನ್ನು ಬಂಧಿಸಲಾಗಿದೆ. ಮಗುವನ್ನು ಖರೀದಿಸಿದವರು ಇನ್ನೂ ಸಿಕ್ಕಿಲ್ಲ.
