ವಿಶ್ವ ದಾಖಲೆ ಬರೆದ ಅಂಗವಿಕಲರ ಸಾಮೂಹಿಕ ವಿವಾಹ!

ಉಜ್ಜಯಿನಿ: ಮಧ್ಯ ಪ್ರದೇಶದ ಉಜ್ಜಯಿನಿ ನಗರ ಐತಿಹಾಸಿಕ ದಾಖಲೆಯೊಂದಕ್ಕೆ ಸಾಕ್ಷಿಯಾಗಿದ್ದು, ಏಕಕಾಲಕ್ಕೆ 104 ಅಂಗವಿಕಲರು ದಾಂಪತ್ಯ ಜೀವನಕ್ಕೆ ಕಾಲಿಡುವ ಮೂಲಕ ಗೋಲ್ಡನ್ ಬುಕ್ ಆಫ್ ರೆಕಾರ್ಡ್ಸ್ ಸೇರಿದ್ದಾರೆ.

ಮಧ್ಯ ಪ್ರದೇಶದ ಉಜ್ಜಯಿನಿಯಲ್ಲಿ ನಿನ್ನೆ ಸಾಮೂಹಿಕ ವಿವಾಹ ಕಾರ್ಯಕ್ರಮ ಏರ್ಪಡಿಸಲಾಗಿತ್ತು. ವಿಶೇಷವೆಂದರೆ ಆ ಸಾಮೂಹಿಕ ವಿವಾಹದಲ್ಲಿ ಪಾಲ್ಗೊಂಡಿದ್ದ ಎಲ್ಲ ದಂಪತಿಗಳೂ ಅಂಗವಿಕಲರಾಗಿದ್ದರು. ಬರೊಬ್ಬರಿ 104  ಅಂಗವಿಕಲ ಜೋಡಿಗಳು ಏಕಕಾಲಕ್ಕೆ ದಾಪಂತ್ಯ ಜೀವನಕ್ಕೆ ಕಾಲಿಡುವ ಮೂಲಕ ಅಪರೂಪದ ವಿಶ್ವ ದಾಖಲೆ ನಿರ್ಮಿಸಿದ್ದಾರೆ. ಈ ಬಗ್ಗೆ ಸ್ವತಃ ಮಧ್ಯ ಪ್ರದೇಶ ಸರ್ಕಾರದ ಸಾರ್ವಜನಿಕ ಸಂಪರ್ಕ ಇಲಾಖೆ ಅಧಿಕಾರಿಗಳು ಮಾಹಿತಿ  ನೀಡಿದ್ದು, 104 ಅಂಗ ವಿಕಲ ಜೋಡಿಗಳು ಏಕಕಾಲಕ್ಕೆ ದಾಂಪತ್ಯ ಜೀವನಕ್ಕೆ ಕಾಲಿಡುತ್ತಿರುವುದು ಇದೇ ಮೊದಲ ಬಾರಿಯಾಗಿದೆ ಎಂದು ಹೇಳಿದ್ದಾರೆ.

ಇನ್ನು ಈ 104 ಜೋಡಿಗಳ ಪೈಕಿ 77 ಹಿಂದೂ ದಂಪತಿಗಳು, 26 ಮುಸ್ಲಿಂ ಹಾಗೂ ಒಂದು ಸಿಖ್ ಜೋಡಿ ಹಸೆ ಮಣೆ ಏರಿದ್ದರು. ಉಜ್ಜಯಿನಿ ಜಿಲ್ಲಾಡಳಿತ ಈ ವಿಶೇಷ ಸಾಮೂಹಿಕ ವಿವಾಹ ಕಾರ್ಯಕ್ರಮ ಆಯೋಜಿಸಿತ್ತು, ಇದೇ ವೇಳೆ  ವಿವಾಹಿತ ದಂಪತಿಗಳಿಗಾಗಿ ನೀಡಲು ಸಾರ್ವಜನಿಕರು ತಂದಿದ್ದ ವಿಶೇಷ ಉಡುಗೊರೆ ಕೂಡ ಗೋಲ್ಡನ್ ಬುಕ್ ಆಫ್ ರೆಕಾರ್ಡ್ಸ್ ದಾಖಲೆ ಸೇರಿದ್ದು, ಸಾರ್ವಜನಿಕರು ನೀಡಿದ ಅತೀದೊಡ್ಡ ಉಡುಗೊರೆ ಬಾಕ್ಸ್ ಎಂಬ ಕೀರ್ತಿಗೂ ಈ  ವಿಶೇಷ ಉಡುಗೊರೆ ಭಾಜನವಾಯಿತು.

ಇದೇ ವೇಳೆ ಗೋಲ್ಡನ್ ಬುಕ್ ರೆಕಾರ್ಡ್ಸ್ ತಂಡ ಅಧಿಕಾರಿಗಳು ಮಧ್ಯ ಪ್ರದೇಶ ಸರ್ಕಾರಕ್ಕೆ ವಿಶ್ವ ದಾಖಲೆ ಪ್ರಮಾಣ ಪತ್ರವನ್ನು ಹಸ್ತಾಂತರಿಸಿದರು ಎಂದು ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಇಲಾಖೆಯ ಕೇಂದ್ರ ಸಚಿವ  ತಾವರ್ ಚಾಂದ್ ಗೆಹ್ಲೂಟ್ ತಿಳಿಸಿದರು.