ನಿರಂತರ ದೌರ್ಜನ್ಯದಿಂದ ಮನನೊಂದ ಪತ್ನಿಯಿಂದ ಪತಿಗೆ ತಲಾಖ್

ಮೀರತ್: ತ್ರಿವಳಿ ತಲಾಖ್ ಕುರಿತಂತೆ ದೇಶಾದ್ಯಂತ ತೀವ್ರ ಚರ್ಚೆಗಳು ನಡೆಯುತ್ತಿದ್ದು ಈ ಮಧ್ಯೆ ಮೀರತ್ ನ ಗೃಹಿಣಿಯೊಬ್ಬರು ಪತಿಯ ದೌರ್ಜನ್ಯದಿಂದಾಗಿ ಮನನೊಂದು ಆತನಿಗೆ ತಲಾಖ್ ನೀಡಲು ತೀರ್ಮಾನಿಸಿದ್ದಾಳೆ. 

ಮೀರತ್ ನ 24 ವರ್ಷದ ಅಮ್ರೀನ್ ಬಾನೊ ಎಂಬಾಕೆ ಪ್ರತಿ ನಿತ್ಯ ಗಂಡನಿಂದ ಮಾನಸಿಕವಾಗಿ ಮತ್ತು ದೈಹಿಕವಾಗಿ ಕಿರುಕುಳ ಅನುಭವಿಸುತ್ತಿದ್ದು ಇದರಿಂದ ತೀವ್ರ ಮನನೊಂದ ಮಹಿಳೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾಳೆ. 

ಪತಿಯಿಂದ ದಿನನಿತ್ಯ ಕಿರುಕುಳ ಅನುಭವಿಸಲು ನನಗೆ ಸಾಧ್ಯವಾಗುತ್ತಿಲ್ಲ. ದಿನ ಕಳೆದಂತೆ ಅವರ ಹುಚ್ಚಾಟ ಹೆಚ್ಚಾಗುತ್ತಿದೆ. ಹೀಗಾಗಿ ಮುಸ್ಲಿಂ ಪುರುಷರು ತಮ್ಮ ಪತ್ನಿಯರಿಗೆ ತ್ರಿವಳಿ ತಲಾಖ್ ಮೂಲಕ ವಿಚ್ಛೇದನ ನೀಡುವಂತೆ ನಾನು ನನ್ನ ಪತಿಗೆ ತಲಾಖ್ ನೀಡಬೇಕು ಎಂದು ತೀರ್ಮಾನಿಸಿದ್ದೇನೆ ಎಂದು ಅಮ್ರಿನ್ ಹೇಳಿದ್ದಾರೆ. 

2012ರಲ್ಲಿ ಅಮ್ರಿನ್ ಮತ್ತು ಸಹೋದರಿ ಫಹ್ರಾನ್ ಇಬ್ಬರು ಪಕ್ಕದ ಗ್ರಾಮದ ಸಹೋದರರಾದ ಶಬೀರ್ ಮತ್ತು ಶಖಿರ್ ಎಂಬುವರನ್ನು ವಿವಾಹವಾಗಿದ್ದರು. ಅವರ ಕೈ ಹಿಡಿದಾಗಲಿಂದ ನಮಗೆ ನಿರಂತರವಾಗಿ ಮಾನಸಿಕ ಮತ್ತು ದೈಹಿಕವಾಗಿ ಕಿರುಕುಳ ನೀಡುತ್ತಿದ್ದಾರೆ ಎಂದು ಸಹೋದರಿಯರು ಆರೋಪಿಸಿದ್ದಾರೆ. 

ಸ್ಥಳೀಯ ಪೊಲೀಸರಿಗೆ ದೂರು ನೀಡಿದರು ಪ್ರಯೋಜನವಾಗದಿದ್ದರಿಂದ ಇಬ್ಬರು ಸಹೋದರಿಯರು ನಿನ್ನೆ ಹಿರಿಯ ಪೊಲೀಸ್ ಅಧಿಕಾರಿಯನ್ನು ಭೇಟಿ ಮಾಡಿ ತಮ್ಮ ಗಂಡಂದಿರ ವಿರುದ್ಧ ಕ್ರಮಕೈಗೊಳ್ಳುವಂತೆ ಮನವಿ ಮಾಡಿದ್ದಾರೆ.