ಯಶಸ್ವಿ ಕಾರ್ಯಾಚರಣೆಗಳಿಂದ ಕಾಶ್ಮೀರದಲ್ಲಿ ಉಗ್ರರ ಸಂಖ್ಯೆ ಕಡಿಮೆಯಾಗಿದೆ: ಪೊಲೀಸ್ ಮಹಾ ನಿರ್ದೇಶಕ

ಶ್ರೀನಗರ: ಭದ್ರತಾ ಪಡೆಗಳ ಯಶಸ್ವಿ ಕಾರ್ಯಾಚರಣೆಯಿಂದ ಕಣಿವೆ ರಾಜ್ಯ ಕಾಶ್ಮೀರದಲ್ಲಿ ಉಗ್ರಗಾಮಿಗಳ ಸಂಖ್ಯೆ ಕಡಿಮೆಯಾಗಿದೆ ಎಂದು ಜಮ್ಮು-ಕಾಶ್ಮೀರದ ಪೊಲೀಸ್ ಮಹಾ ನಿರ್ದೇಶಕ ಮುನಿರ್ ಖಾನ್ ತಿಳಿಸಿದ್ದಾರೆ.

ಅನೇಕ ಯಶಸ್ವಿ ಕಾರ್ಯಾಚರಣೆ ನಂತರ ಉಗ್ರಗಾಮಿಗಳ ಸಂಖ್ಯೆ ಖಂಡಿತಾ ಕಡಿಮೆಯಾಗಿದೆ. ಇನ್ನು ಹೆಚ್ಚಿನ ನೇಮಕಾತಿಯನ್ನು ತಡೆಯಲು ಉಗ್ರಗಾಮಿಗಳ ನಾಯಕರನ್ನು ಗುರಿಯಾಗಿಟ್ಟುಕೊಂಡು ಕಾರ್ಯಾಚರಣೆ ನಡೆಸಲಾಗುತ್ತಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಉಗ್ರಗಾಮಿಗಳು ಇತ್ತೀಚೆಗೆ ನಡೆಸಿದ ದಾಳಿ ಕುರಿತು ಮಾತನಾಡಿದ ಅವರು, ಕಳೆದ ಮೂರು ದಿನಗಳಲ್ಲಿ ಮೂವರು ಸ್ಥಳೀಯ ಉಗ್ರರನ್ನು ಅವರು ಕಾರ್ಯಾಚರಣೆಯಲ್ಲಿದ್ದಾಗ ನಾವು ಹಿಡಿದಿದ್ದೇವೆ. ಹಲವು ಸ್ತ್ರಾಸ್ತ್ರ ಮತ್ತು ಯುದ್ಧಸಾಮಗ್ರಿಗಳನ್ನು ವಶಪಡಿಸಿಕೊಂಡಿದ್ದೇವೆ ಎಂದು ಹೇಳಿದರು.

ರಮೀಜ್ ಯಾಟೂ ಎಂಬ ಉಗ್ರನನ್ನು ಕುಲ್ಗಮ್ ನಲ್ಲಿ ಬಂಧಿಸಲಾಗಿದ್ದು, ಮತ್ತಿಬ್ಬರು ಉಗ್ರರಾದ ಖುರ್ಷೀದ್ ಅಹ್ಮದ್ ದಾರ್ ಮತ್ತು ಹಾಝಿಕ್ ರತೆರ್ ನನ್ನು ಕೂಡ ಕುಂದ್ ಪ್ರದೇಶದಿಂದ ಬಂಧಿಸಲಾಗಿದೆ. ಈ ಸ್ಥಳೀಯ ಉಗ್ರರು ಸಮಾಜದ ಮುಖ್ಯವಾಹಿನಿಗೆ ಮರಳಲು ಶರಣಾಗಲು ಯತ್ನಿಸಿದರೆ ಅವರನ್ನು ಬೆಂಬಿಸಲಾಗುವುದು ಎಂದು ಹೇಳಿದರು.

ಅನಂತ್ ನಾಗ್ ಜಿಲ್ಲೆಯ ಶೋಪಿಯಾನ್ ನಲ್ಲಿ ಇತ್ತೀಚೆಗೆ ಬ್ಯಾಂಕ್ ದರೋಡೆ ನಡೆದ ಪ್ರಕರಣವನ್ನು ಪ್ರಸ್ತಾಪಿಸಿದ ಅವರು ಈ ಕೃತ್ಯವನ್ನು ಹಿಜ್ ಬುಲ್ ಮುಜಾಹಿದ್ದೀನ್ ಸಂಘಟನೆ ನಡೆಸಿದೆ ಎಂದು ಹೇಳಿದರು.