ಬಿಜೆಪಿಯಿಂದ ಕ್ರೈಸ್ತರಿಗೆ ಉಚಿತ ಜೆರುಸಲೇಮ್ ಪ್ರವಾಸ ಕಲ್ಪಿಸುವ ಭರವಸೆ

ನವದೆಹಲಿ: ಹಜ್ ಯಾತ್ರಾರ್ಥಿಗಳಿಗೆ ಸಬ್ಸಿಡಿಯನ್ನು ರದ್ದುಗೊಳಿಸಿದ ಒಂದು ತಿಂಗಳ ಬಳಿಕ ಈಗ ಬಿಜೆಪಿ ಕ್ರೈಸ್ತರಿಗೆ ಉಚಿತ ಜೆರುಸಲೇಮ್ ಪ್ರವಾಸ ಕಲ್ಪಿಸುವುದಾಗಿ ಬಿಜೆಪಿ ಭರವಸೆ ನೀಡಿದೆ.   

ನಾಗಾಲ್ಯಾಂಡ್ ನಲ್ಲಿ ಬಿಜೆಪಿ ಅಧಿಕಾರಕ್ಕೆ ಬಂದರೆ ಕ್ರೈಸ್ತ ಸಮುದಾಯದವರಿಗೆ ಉಚಿತವಾಗಿ ಜೆರುಸಲೇಮ್ ಪ್ರವಾಸ ಕಲ್ಪಿಸುವುದಾಗಿ ಬಿಜೆಪಿ ಹೇಳಿದೆ. ಈ ಯೋಜನೆ ಕೇವಲ ಈಶಾನ್ಯ ರಾಜ್ಯಗಳಲ್ಲಿರುವ ಕ್ರೈಸ್ತರಿಗೆ ಅನ್ವಯಿಸಲಿದೆಯೋ ಅಥವಾ ಸಮಸ್ತ ದೇಶದ ಕ್ರೈಸ್ತರಿಗೆ ಅನ್ವಯಿಸಲಿದೆಯೋ ಎಂಬ ಬಗ್ಗೆ ಇನ್ನಷ್ಟೇ ಮಾಹಿತಿ ಲಭ್ಯವಾಗಬೇಕಿದೆ. 

ಮೇಘಾಲಯ, ನಾಗಾಲ್ಯಾಂದ್, ತ್ರಿಪುರಗಳಲ್ಲಿ ಚುನಾವಣೆ ನಡೆಯಲಿದ್ದು ಮೇಘಾಲಯದಲ್ಲಿ ಶೇ.75ಷ್ಟು ಭಾಗ ಕ್ರೈಸ್ತ ಸಮುದಾಯದವರಿದ್ದಾರೆ, ನಾಗಾಲ್ಯಾಂಡ್ ನಲ್ಲಿ ಶೇ.88 ರಷ್ಟು ಕ್ರೈಸ್ತ ಸಮುದಾಯದ ಜನರಿದ್ದು ಬಿಜೆಪಿಯ ಭರವಸೆಯನ್ನು ಚುನಾವಣಾ ಭರವಸೆ ಎಂದು ವಿಶ್ಲೇಷಿಸಲಾಗುತ್ತಿದೆ.