ನನ್ನ ಫೇಸ್ ಬುಕ್ ಅಕೌಂಟ್ ಹ್ಯಾಕ್ ಆಗಿದೆ: ಬಿಜೆಪಿ -ಆರ್ ಎಸ್ ಎಸ್ ನಿಂದ ಕುಟುಂಬ ಒಡೆಯುವ ಯತ್ನ; ತೇಜ್ ಪ್ರತಾಪ್

ಪಾಟ್ನಾ: ಬಿಜೆಪಿ-ಆರ್ ಎಸ್ಎಸ್ ನವರು ನನ್ನ ಫೇಸ್ ಬುಕ್ ಆಕೌಂಟ್ ಹ್ಯಾಕ್ ಮಾಡಿ ನನ್ನ ಕುಟುಂಬ ಒಡೆಯಲು ಯತ್ನಿಸುತ್ತಿದೆ ಹಾಗೂ ಆರ್ ಜೆಡಿ ಪಕ್ಷವನ್ನು ಬಲಹೀನಗೊಳಿಸಲು ಯತ್ನಿಸುತ್ತಿದ್ದಾರೆ ಎಂದು ಆರ್ ಜೆಡಿ ಮುಖಂಡ ತೇಜ್ ಪ್ರತಾಪ್ ಆರೋಪಿಸಿದ್ದಾರೆ.

ಬಿಜೆಪಿ ಬೆಂಬಲಿಗರು ಯಾವಾಗಲು ನನ್ನ ಎಫ್ ಬಿ ಅಕೌಂಟ್ ಹ್ಯಾಕ್ ಮಾಡಲು ಯತ್ನಿಸುತ್ತಿರುತ್ತಾರೆ, ಇಂದು ಅವರು ನನ್ನ ಸೋಷಿಯಲ್ ಮೀಡಿಯಾ ಹ್ಯಾಕ್ ಮಾಡಲು ಯಶಸ್ವಿ ಯಾಗಿದ್ದಾರೆ ಎಂದು ಆರೋಪಿಸಿದ್ದಾರೆ. ಸುಳ್ಳು ವದಂತಿ ಹಿಂದೆ ಬಿಜೆಪಿ ಹಾಗೂ ಸಿಎಂ ನಿತೀಶ್ ಕುಮಾರ್ ಕೈವಾಡ ಇದೆ ಎಂದು ತೇಜ್ ಪ್ರತಾಪ್ ಆರೋಪಿಸಿದ್ದಾರೆ. 

ಹ್ಯಾಕ್ ಆಗಿತ್ತು ಎನ್ನಲಾದ ಪೋಸ್ಟ್ ನಲ್ಲಿ ರಾಜಕೀಯ ತೊರೆಯಲು ತನ್ನ ತಾಯಿ, ಮಾಜಿ ಸಿಎಂ ರಾಬ್ಡಿದೇವಿಯೇ ಕಾರಣ ಎಂದು ದೂರಲಾಗಿತ್ತು. ಪಕ್ಷದ ಮುಖಂಡ ಓಂಪ್ರಕಾಶ್ ಯಾದವ್ ಹಾಗೂ ಶಾಸಕ ಸುಭೋದ್ ಕುಮಾರ್ ರೈ ತನ್ನ ಇಮೇಜ್ ಹಾಳು ಮಾಡಲು ಯತ್ನಿಸುತ್ತಿದ್ದಾರೆ. ಅವರ ಬಗ್ಗೆ ಕ್ರಮ ಕೈಗೊಳ್ಳಲು ತನ್ನ ತಂದೆ-ತಾಯಿಯೂ ಬಿಡುತ್ತಿಲ್ಲ. ತನ್ನ ತಾಯಿ ತನ್ನನ್ನೇ ಬೈದಿದ್ದಾರೆ. ಇದರಿಂದ ನೊಂದು ರಾಜಕೀಯ ತೊರೆಯಲು ನಿರ್ಧರಿಸಿದ್ದಾಗಿ ಹೇಳಿದ್ದರು. 

ತೇಜ್ ಪ್ರತಾಪ್ ಯಾದವ್​ ಅಧಿಕೃತ ಫೇಸ್​ಬುಕ್ ಖಾತೆಯಿಂದಲೇ ಪೋಸ್ಟ್ ಆಗಿದ್ದ ಬರಹವನ್ನು ಡಿಲೀಟ್ ಮಾಡಲಾಗಿದ್ದು, ಈ ಬಗ್ಗೆ ಸ್ಪಷ್ಟನೆಯನ್ನೂ ನೀಡಿದ್ದಾರೆ. ನಿತೀಶ್ ಕುಮಾರ್ ಹಾಗೂ ಬಿಜೆಪಿಯವರು ನಮ್ಮನ್ನು ಒಡೆಯಲು ಮತ್ತೆ ಯತ್ನಿಸಿದ್ದಾರೆ. ನನ್ನ ಫೇಸ್​ಬುಕ್ ಖಾತೆಯನ್ನು ಹ್ಯಾಕ್ ಮಾಡಿ, ರಾಜಕೀಯ ತೊರೆಯುತ್ತೇನೆಂದು ಪೋಸ್ಟ್ ಮಾಡಿ, ನಂತರ ಡಿಲೀಟ್ ಮಾಡಲಾಗಿತ್ತು.