ದೆಹಲಿಯಲ್ಲಿ ನಡೆಯಬೇಕಿದ್ದ ದಲೈ ಲಾಮಾ ಕಾರ್ಯಕ್ರಮ ರದ್ದು

ನವದೆಹಲಿ: ದೆಹಲಿಯ ನಡೆಯಬೇಕಿದ್ದ ಟಿಬೆಟಿಯನ್ ಧರ್ಮ ಗುರು ದಲೈ ಲಾಮಾ ಅವರ ಕಾರ್ಯಕ್ರಮವನ್ನು ಧರ್ಮಶಾಲಾಗೆ ಸ್ಥಳಾಂತರಿಸಲಾಗಿದೆ ಎಂದು ಟಿಬಿಟಿಯನ್ ಅಧಿಕಾರಿಗಳು ತಿಳಿಸಿದ್ದಾರೆ.

ದಲೈ ಲಾಮಾ ಅವರು ದೇಶದಿಂದ ಹೊರಗಿದ್ದು 60 ವರ್ಷ ಪೂರೈಸಿರುವ ಹಿನ್ನೆಲೆಯಲ್ಲಿ ರಾಜ್ ಘಾಟ್ ನಲ್ಲಿ ಆಯೋಜಿಸಿದ್ದ ಪರಸ್ಪರ ನಂಬಿಕೆಯ ಪ್ರಾರ್ಥನೆ ರದ್ದಾಗಿದೆ ಮತ್ತು ಎಪ್ರಿಲ್ 1ರಂದು ದೆಹಲಿಯ ತ್ಯಾಗರಾಜ ಸ್ಟೇಡಿಯಂನಲ್ಲಿ ನಡೆಯಬೇಕಿದ್ದ ಥ್ಯಾಂಕ್ಯೂ ಇಂಡಿಯಾ ಕಾರ್ಯಕ್ರಮದ ಸ್ಥಳ ಬದಲಾವಣೆಯಾಗಿದೆ ಎಂದು ಟಿಬಿಟಿಯನ್ ಆಡಳಿತದ ವಕ್ತಾರ ಸೋನಮ್ ದಗ್ಪೊ ಅವರು ಹೇಳಿದ್ದಾರೆ.

ಧರ್ಮಶಾಲಾದಲ್ಲಿ ಮಾರ್ಚ್ 31 ಅಥವಾ ಎಪ್ರಿಲ್ 1ರಂದು ಕಾರ್ಯಕ್ರಮ ನಡೆಯಲಿದೆಯೆಂದು ಅವರು ತಿಳಿಸಿದ್ದಾರೆ. 

ಟಿಬೆಟ್ ಅಥವಾ ದಲೈ ಲಾಮಾಗೆ ಸಂಬಂಧಿಸಿದ ಕಾರ್ಯಕ್ರಮಗಳಿಂದ ದೂರವಿರುವಂತೆ ಹಿರಿಯ ರಾಜಕಾರಣಿಗಳಿಗೆ ಮತ್ತು ಸರ್ಕಾರಿ ಅಧಿಕಾರಿಗಳಿಗೆ ಸಂಪುಟ ಕಾರ್ಯದರ್ಶಿ ಪಿಕೆ ಸಿನ್ಹಾ ಅವರು ಸೂಚಿಸಿದ ಹಿನ್ನೆಲೆಯಲ್ಲಿ ದಲೈ ಲಾಮಾ ಕಾರ್ಯಕ್ರಮವನ್ನು ದೆಹಲಿಯಿಂದ ಧರ್ಮಶಾಲಾಗೆ ಸ್ಥಳಾಂತರಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.