ಬಾತ್ ಟಬ್ ನಲ್ಲಿ ಮುಗ್ಗರಿಸಿದ ಹಿಲರಿ ಕ್ಲಿಂಟನ್ ಕೈ ಮುರಿತ ,ವೈದ್ಯರಿಂದ ಚಿಕಿತ್ಸೆ

ನವದೆಹಲಿ: ಅಮೆರಿಕಾದ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಅವರ ಪತ್ನಿ ಹಿಲರಿ ಕ್ಲಿಂಟನ್  ಬಾತ್ ಟಬ್ ನಲ್ಲಿ ಮುಗ್ಗರಿಸಿ ಬಿದ್ದ ಕಾರಣ ಕೈ ಮುರಿದುಕೊಂಡಿದ್ದಾರೆ ಎಂದು ವರದಿಯಾಗಿದೆ. 

ಭಾರತ ಪ್ರವಾಸದಲ್ಲಿರುವ ಹಿಲರಿ ಕ್ಲಿಂಟನ್  ರಾಜಾಸ್ಥಾನದ ಜೋಧಪುರದ ಉಮೈದ್ ಭವನ್ ಪ್ಯಾಲೇಸ್ ನಲ್ಲಿ ತಂಗಿದ್ದರು.  

ಬಾತ್ ಟಬ್ ನಲ್ಲಿ ಬಿದ್ದ ಕಾರಣ ಅವರ ಬಲ ಕೈಗೆ ನೋವಾಗಿತ್ತು. ಇದೀಗ ಅವರನ್ನು ಚಿಕಿತ್ಸೆಗೆ ಒಳಪಡಿಸಲಾಗುತ್ತಿದೆ.ಎಂದು ಗೋಯಲ್ ಆಸ್ಪತ್ರೆಯ ವೈದ್ಯರು ಎ ಎಫ್ ಪಿಗೆ ತಿಳಿಸಿದ್ದಾರೆ. ನಾವು ಸಿಟಿ ಸ್ಕ್ಯಾನ್ ಮತ್ತು ಎಕ್ಸ್ ರೆ ಮಾಡಿದ್ದೇವೆ. ಕ್ಲಿಂಟನ್ ಅವರ ಮಣಿಕಟ್ಟಿನ ಭಾಗ ಮುರಿದಿರುವುದು ಕಂಡುಬಂದಿದೆ. ಅವರಿಗೆ ಕೆಲ ದಿನಗಳ ಕಾಲ ವಿಶ್ರಾಂತಿ ಅಗತ್ಯವಿದೆ  ಆಕೆಗೆ ಕ್ರೇಪ್ ಬ್ಯಾಂಡೇಜ್ ಬಳಸಲು ಸಲಹೆ ನಿಡಿದ್ದೇವೆ." ವೈದ್ಯರು ಹೇಳಿದ್ದಾರೆ.

ಕಳೆದ ಐದು ತಿಂಗಳ ಹಿಂದೆ ಲಂಡನ್ ನಲ್ಲಿ ಕ್ಲಿಂಟನ್ ತಮ್ಮ ಕಾಲಿನ ಬೆರಳು ಮುರಿತಕ್ಕೆ ಒಳಗಾಗಿದ್ದರು, ಇಂದು ಮತ್ತೆ ಬಾತ್ ಟಬ್ ನಲ್ಲಿ ಬೀಳುವ ಮೂಲಕ ಕೈ ಮುರಿದುಕೊಂಡಿದ್ದಾರೆ ಎಂದು ಅಂತರಾಷ್ಟ್ರೀಯ ಮಾದ್ಯಮಗಳು ವರದಿ ಮಾಡಿದೆ.

ಡೊನಾಲ್ಡ್ ಟ್ರಂಪ್ ವಿರುದ್ಧ 2016 ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸೋತ ಕಥೆಯನ್ನು ಹೇಳುವ ಕ್ಲಿಂಟನ್ ಅವರ ಪುಸ್ತಕ ’ವಾಟ್ಸ್ ಹ್ಯಾಪನಡ್’ ನ ಪ್ರಚಾರಕ್ಕಾಗಿ ಆಕೆ ಬಾರತಕ್ಕೆ ಆಗಮಿಸಿದ್ದಾರೆ.