ಆಂಧ್ರ: ಪೂಜೆ ಮಾಡುತ್ತಿರುವಾಗಲೇ ಹೃದಯಾಘಾತ, ಪಂಚರಾಮ ಕ್ಷೇತ್ರದ ಅರ್ಚಕ ನಿಧನ

ವಿಜಯವಾಡ: ಪಶ್ಚಿಮ ಗೋದಾವರಿಯ ಪ್ರಸಿದ್ಧ ಪಂಚರಾಮ ಕ್ಷೇತ್ರದ ಸಹಾಯಕ ಮುಖ್ಯ ಅರ್ಚಕ ಕೋಟ ನಾಗ ವೆಂಕಟ ವರ ಪ್ರಸಾದ್ ಅವರು ಸೋಮವಾರ ಹೃದಯಾಘಾತದಿಂದ ನಿಧನರಾಗಿದ್ದಾರೆ.

ಶ್ರೀ ಕ್ಷೀರ ರಾಮಲಿಂಗೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ಈ ಘಟನೆ ನಡೆದಿದ್ದು, ವರ ಪ್ರಸಾದ್ ಅವರು ಇಂದು ಬೆಳಗಿನ ಜಾವ ಕಾರ್ತಿಕ ಸೋಮವಾರದ ಪೂಜೆ ಮಾಡುತ್ತಿದ್ದಾಗ  ಹೃದಾಯಾಘಾತದಿಂದ ಕುಸಿದು ಬಿದ್ದಿದ್ದು, ಕೂಡಲೇ ಅವರನ್ನು ಸಮೀಪದ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಆದರೆ ದಾರಿ ಮಧ್ಯೆಯೇ ಅರ್ಚಕರು ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ. 

ಕಾರ್ತಿಕ ಸೋಮವಾರದಂದು ದೇವಸ್ಥಾನಕ್ಕೆ ಸಾವಿರಾರು ಭಕ್ತರು ಭೇಟಿ ನೀಡುತ್ತಾರೆ. ಆದರೆ ಇಂದು ಅರ್ಚಕ ವರ ಪ್ರಸಾದ್ ಅವರು ನಿಧನರಾದ ಹಿನ್ನೆಲೆಯಲ್ಲಿ ದೇವಸ್ಥಾನ ಬಂದ್ ಮಾಡಲಾಗಿದ್ದು, ದೇವಸ್ಥಾನಕ್ಕೆ ಆಗಮಿಸದಂತೆ ಭಕ್ತರಿಗೆ ಮನವಿ ಮಾಡಿದ್ದಾರೆ.

ರಾಜ್ಯದ ಪಂಚರಾಮ ಕ್ಷೇತ್ರದಲ್ಲಿ ನಡೆಯುತ್ತಿರುವ ಎರಡನೇ ಘಟನೆ ಇದಾಗಿದ್ದು, ಕಳೆದ ಜೂನ್ ನಲ್ಲಿ ಭೀಮಾವರಂನ  ಸೋಮೇಶ್ವರ ಜನಾರ್ಧನ ಸ್ವಾಮಿ ದೇವಸ್ಥಾನದ ಅರ್ಚಕರು ಸಹ ಶಿವ ಲಿಂಗಕ್ಕೆ ಅಭಿಶೇಕ ಮಾಡುತ್ತಿರುವಾಗಲೇ ಹೃದಯಾಘತದಿಂದ ನಿಧನರಾಗಿದ್ದರು.