ಹಿಮಾಚಲ ಪ್ರದೇಶ: ನಾಪತ್ತೆಯಾಗಿದ್ದ 8 ಮಂದಿ ಪ್ರವಾಸಿಗರು ಸುರಕ್ಷಿತ: ಅಧಿಕಾರಿಗಳು

ಶಿಮ್ಲಾ: ಹಿಮಾಚಲ ಪ್ರದೇಶದಲ್ಲಿ ಟ್ರೆಕಿಂಗ್ ಗೆ ತೆರಳಿ ಸೋಮವಾರ ರಾತ್ರಿ ನಾಪತ್ತೆಯಾಗಿದ್ದ 8 ಮಂದಿ ಪ್ರವಾಸಿಗರು ಸುರಕ್ಷಿತವಾಗಿದ್ದಾರೆ ಎಂದು ಸೇನಾಧಿಕಾರಿಗಳು ತಿಳಿಸಿದ್ದಾರೆ.

ಈ ಬಗ್ಗೆ ಮಾಹಿತಿ ನೀಡಿರುವ ಕೀಲಾಂಗ್ ಎಸ್ ಡಿಎಂ ಅಮರ್ ಸಿಂಗ್ ನೇಗಿ ಅವರು, ಸೋಮವಾರ ಹಿಮಾಚಲ ಪ್ರದೇಶದ ಲಹೌಲ್ ಮತ್ತು ಸ್ಪಿಟಿಯಲ್ಲಿ ಟ್ರೆಕಿಂಗ್ ಗೆ ತೆರಳಿದ್ದ 8 ಪ್ರವಾಸಿಗರ ತಂಡ ನಾಪತ್ತೆಯಾಗಿತ್ತು. ಹೀಗಾಗಿ ನಾಪತ್ತೆಯಾದವರಿಗಾಗಿ ಶೋಧ ಕಾರ್ಯಾಚರಣೆ ಆರಂಭವಾಗಿತ್ತು. ಇದೀಗ ಈ ತಂಡ ಸುರಕ್ಷಿತವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ನೇಗಿ ಮಾಹಿತಿ ನೀಡಿದರು.

ನೇಗಿ ನೀಡಿರುವ ಮಾಹಿತಿಯನ್ವಯ ಬ್ರುನೇ ಮೂಲದ ಓರ್ವ ಮಹಿಳೆಯೂ ಸೇರಿದಂತೆ ಎಲ್ಲ 8 ಮಂದಿ ಪ್ರವಾಸಿಗರೂ ಸುರಕ್ಷಿತವಾಗಿದ್ದಾರೆ. ಈ 8 ಮಂದಿಯ ಪೈಕಿ ಓರ್ವ ಮಹಿಳೆ ಬ್ರೂನೇ ಮೂಲದವರಾಗಿದ್ದು, ಓರ್ವ ವ್ಯಕ್ತಿ ನೆದರ್ ಲ್ಯಾಂಡ್ ನವನಾಗಿದ್ದಾನೆ. ಆತನ ಹೆಸರು ಆಬ್ಬಿ ಲಿಮ್ ಎಂದು ಗುರುತಿಸಲಾಗಿದೆ. ಅಂತೆಯೇ ಪ್ರಿಯಾಂಕೋ ವೋರಾ, ಪಾಯಲ್ ದೇಸಾಯಿ, ದೀಪಿಕಾ, ದಿವ್ಯಾ ಅಗರ್ವಾಲ್, ಅಭಿನವ್ ಚಂಡಾಲ್ ಮತ್ತು ಅಶೋಕ್ ಎಂಬ ಭಾರತೀಯ ಪ್ರವಾಸಿಗರನ್ನು ರಕ್ಷಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಇನ್ನು ಇದೇ ಲಹೌಲ್ ಮತ್ತು ಸ್ಪಿಟಿಯಲ್ಲಿ ನಾಪತ್ತೆಯಾಗಿರುವ 45 ಟ್ರೆಕ್ಕರ್ ಗಳ ಕುರಿತು ಇನ್ನೂ ಮಾಹಿತಿ ಲಭ್ಯವಾಗಿಲ್ಲ.