ಪಂಜಾಬ್: 21 ವರ್ಷದ ಯುವತಿಯನ್ನು ಕಾರಿನಿಂದ ಎಳೆದು 10 ಪುರುಷರಿಂದ ಅತ್ಯಾಚಾರ!

ಲೂಧಿಯಾನ: ಸ್ನೇಹಿತನೊಂದಿಗೆ ಕಾರಿನಲ್ಲಿ ತೆರಳುತ್ತಿದ್ದ 21 ವರ್ಷದ ಯುವತಿಯನ್ನು 10 ಪುರುಷರ ಗುಂಪೊಂದು ಕಾರಿನಿಂದ ಎಳೆದು ಅತ್ಯಾಚಾರವೆಸಗಿರುವ ಘಟನೆ ಪಂಜಾಬ್ ನ ಲೂಧಿಯಾನದ ಸಿದ್ವನ್ ಕಾಲುವೆ ಬಳಿ ನಡೆದಿದೆ.

ಲೂಧಿಯಾನದಿಂದ ಇಸೆವಾಲ್ ಗ್ರಾಮಕ್ಕೆ ತನ್ನ ಸ್ನೇಹಿತನೊಂದಿಗೆ ತೆರಳುತ್ತಿದ್ದ ಯುವತಿಯಿದ್ದ ಕಾರನ್ನು ದ್ವಿಚಕ್ರವಾಹನದಲ್ಲಿ ಹಿಂಬಾಲಿಸಿಕೊಂಡು ಹೋಗಿದ್ದ 3 ಜನ ಕಾಮುಕರು ಮಾರ್ಗಮಧ್ಯದಲ್ಲಿ ಕಾರನ್ನು ನಿಲ್ಲಿಸಿದ್ದಾರೆ.  ಕಾರು ನಿಲ್ಲಿಸುತ್ತಿದ್ದಂತೆಯೇ  ಮೊದಲಿಗೆ ಕಲ್ಲು ಹಾಗೂ ಇಟ್ಟಿಗೆಗಳಿಂದ ದಾಳಿ ನಡೆಸಿರುವ ಕಿಡಿಗೇಡಿಗಳು ಇಬ್ಬರನ್ನೂ ಕಾಲುವೆಯಲ್ಲಿ ನಿರ್ಜನ ಪ್ರದೇಶಕ್ಕೆ ಎಳೆದೊಯ್ದಿದ್ದಾರೆ, ಈ ವೇಳೆ ಮತ್ತೆ 7 ಜನರನ್ನು ಕರೆದಿದ್ದು ಸಾಮೂಹಿಕ ಅತ್ಯಾಚಾರವೆಸಗಿದ್ದಾರೆ ಎಂದು ಎಸ್ ಪಿ ತರುಣ್ ಹೇಳಿದ್ದಾರೆ. 

ಸಂತ್ರಸ್ತೆಯನ್ನು ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಲಾಗಿದ್ದು ಆಕೆಯ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದಿರುವುದನ್ನು ವೈದ್ಯರು ದೃಢಪಡಿಸಿದ್ದಾರೆ. ಘಟನೆಯ ಬಗ್ಗೆ ಪಂಜಾಬ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.