ನವದೆಹಲಿ: ಭಾರತದಲ್ಲಿ 14-18 ರ ನಡುವಿನ ವಯಸ್ಸಿನ ಶೇ.25 ರಷ್ಟು ಮಕ್ಕಳಿಗೆ ತಮ್ಮ ಮಾತೃ ಭಾಷೆಯಲ್ಲಿ 2 ನೇ ತರಗತಿ ಶ್ರೇಣಿಯ ಪಠ್ಯಗಳನ್ನು ನಿರರ್ಗಳವಾಗಿ ಓದಲು ಮಾತ್ರ ಸಾಧ್ಯ ಎಂಬ ಮಾಹಿತಿ ಅಂಕಿ-ಅಂಶಗಳಿಂದ ತಿಳಿದುಬಂದಿದೆ.
ವಾರ್ಷಿಕ ಶಿಕ್ಷಣ ಸ್ಥಿತಿ ವರದಿ (ಎಎಸ್ಇಆರ್) ಬಿಡುಗಡೆ ಮಾಡಿರುವ ವರದಿ ಇದಾಗಿದೆ. ಇಂಗ್ಲಿಷ್ ಓದುವ ವಿಷಯಕ್ಕೆ ಬಂದರೆ, ಸುಮಾರು 42% ಜನರಿಗೆ ಸರಳ ವಾಕ್ಯಗಳನ್ನು ಓದಲು ಸಾಧ್ಯವಾಗುತ್ತಿಲ್ಲ. "ಅರ್ಧಕ್ಕಿಂತ ಸ್ವಲ್ಪ ಹೆಚ್ಚು ಮಂದಿ (57.3%) ಇಂಗ್ಲಿಷ್‌ನಲ್ಲಿ ವಾಕ್ಯಗಳನ್ನು ಓದಬಲ್ಲರು. ಇಂಗ್ಲಿಷ್‌ನಲ್ಲಿ ವಾಕ್ಯಗಳನ್ನು ಓದಬಲ್ಲವರಲ್ಲಿ, ಸುಮಾರು ಮುಕ್ಕಾಲು ಭಾಗದಷ್ಟು ಜನರು ಅದರ ಅರ್ಥಗಳನ್ನು (73.5%) ಹೇಳಬಲ್ಲರು” ಎಂದು ವರದಿ ಹೇಳಿದೆ.
ಗಣಿತ ಹೆಚ್ಚಿನವರಿಗೆ ಆಸಕ್ತಿ ಇಲ್ಲದ ವಿಷಯವಾಗಿದೆ. ಸಮೀಕ್ಷೆಗೆ ಒಳಪಟ್ಟ 34,745 ಮಂದಿ ಹರೆಯದವರ ಪೈಕಿ ಶೇ.43.3 ರಷ್ಟು ಮಂದಿಗೆ 3ನೇ ಹಾಗೂ 4 ನೇ ತರಗತಿಗಳ ವಿದ್ಯಾರ್ಥಿಗಳಲ್ಲಿ ಇರಬೇಕಿರುವ ಕೌಶಲ್ಯವಿದ್ದು ಮೂರು-ಅಂಕಿಯ ಸಂಖ್ಯೆಯನ್ನು ಏಕ-ಅಂಕಿಯ ಸಂಖ್ಯೆಯಿಂದ ಭಾಗಿಸುವ ಸಮಸ್ಯೆಗಳನ್ನು ಬಗೆಹರಿಸುವುದು ಸಾಧ್ಯವಾಗಿದೆ. ಆದಾಗ್ಯೂ, 2017 ರ ಸಮೀಕ್ಷೆಯ ಅಂಕಿ- ಅಂಶಗಳಿಗಿಂತಲೂ ಇದು ಸುಧಾರಿತ ಸ್ಥಿತಿಯಾಗಿದೆ. 2017 ರಲ್ಲಿ ಕೇವಲ 39.5% ಮಂದಿ ಮಾತ್ರ ಇದೇ ರೀತಿಯ ಸಮಸ್ಯೆಯನ್ನು ಪರಿಹರಿಸಲು ಸಮರ್ಥರಾಗಿದ್ದರು.
ಒಟ್ಟಾರೆಯಾಗಿ, ಪ್ರತಿಕ್ರಿಯಿಸಿದವರಲ್ಲಿ 86.8% ಶಿಕ್ಷಣ ಸಂಸ್ಥೆಗಳಲ್ಲಿ ದಾಖಲಾಗಿದ್ದಾರೆ. ವಯಸ್ಸಾದ ಯುವಕರು ದಾಖಲಾಗದಿರುವ ಸಾಧ್ಯತೆ ಹೆಚ್ಚಾಗಿದೆ. ಸಮೀಕ್ಷೆಯಲ್ಲಿ ಭಾಗವಹಿಸಿದ 18 ವರ್ಷ ವಯಸ್ಸಿನ 32.6% ರಷ್ಟು ಪ್ರಸ್ತುತ ದಾಖಲಾಗಿಲ್ಲದೇ ಇದ್ದರೆ, 14 ವರ್ಷ ವಯಸ್ಸಿನ 3.9% ಮಂದಿ ಶಿಕ್ಷಣ ಸಂಸ್ಥೆಗಳಿಗೆ ದಾಖಲಾಗಿಲ್ಲ.
89% ಮನೆಯಲ್ಲಿ ಸ್ಮಾರ್ಟ್ಫೋನ್ ಗಳು ಮಕ್ಕಳಿಗೆ ಲಭ್ಯವಿದೆ. ಮತ್ತು 94.7% ಪುರುಷರು ಮತ್ತು 89.8% ಮಹಿಳೆಯರು ಅದನ್ನು ಹೇಗೆ ಬಳಸಬೇಕೆಂದು ತಿಳಿದಿದ್ದಾರೆ ಎಂದು ಸಮೀಕ್ಷೆಯಲ್ಲಿ ತಿಳಿದುಬಂದಿದೆ. ಆದಾಗ್ಯೂ, ಕೇವಲ 19.8% ಮಹಿಳೆಯರು ಮತ್ತು 43.7% ಪುರುಷರು ಮಾತ್ರ ಸ್ಮಾರ್ಟ್ಫೋನ್ ಹೊಂದಿದ್ದಾರೆ.
ಈ ಸಮೀಕ್ಷೆಯು 10 ನೇ ತರಗತಿಯ ನಂತರ ವಿದ್ಯಾರ್ಥಿಗಳಿಗೆ ಮಾನವಶಾಸ್ತ್ರ ಕ್ಷೇತ್ರ (Humanities) ಹೆಚ್ಚಿನ ಆದ್ಯತೆಯಾಗಿದೆ ಎಂಬುದನ್ನು ಕಂಡುಕೊಂಡಿದೆ. ಸಮೀಕ್ಷೆಯಲ್ಲಿ ಭಾಗಿಯಾದ 11 ಮತ್ತು 12 ನೇ ತರಗತಿಯ ವಿದ್ಯಾರ್ಥಿಗಳಲ್ಲಿ 55% ಮಾನವಶಾಸ್ತ್ರ, 31% ವಿಜ್ಞಾನ, ತಂತ್ರಜ್ಞಾನ, ಇಂಜಿನಿಯರಿಂಗ್ ಮತ್ತು ಗಣಿತ (STEM) ಮತ್ತು 9% ವಾಣಿಜ್ಯವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ.
ಮಾಧ್ಯಮಿಕ ಶಿಕ್ಷಣವನ್ನು ಸಾರ್ವತ್ರೀಕರಣಗೊಳಿಸುವ ಸರ್ಕಾರದ ಒತ್ತಡದ ಮಧ್ಯೆ ಶಾಲೆಯಿಂದ ಹೊರಗುಳಿದ ಮಕ್ಕಳು ಮತ್ತು ಯುವಕರ ಪ್ರಮಾಣವು ಕುಸಿಯುತ್ತಿದೆ ಎಂದು ವರದಿಯು ಗಮನಿಸಿದೆ.
Advertisement