ಲಾಲು ಹೇಳಿಕೆಗೆ ಕೌಂಟರ್: ಬಿಜೆಪಿಯಿಂದ ಮೋದಿ ಕಾ ಪರಿವಾರ್ ಅಭಿಯಾನ!

ನವದೆಹಲಿ: ಪ್ರಧಾನಿ ಮೋದಿಗೆ ಕುಟುಂಬ ಇಲ್ಲ ಎಂಬ ಆರ್ ಜೆಡಿ ನಾಯಕ ಲಾಲು ಪ್ರಸಾದ್ ಯಾದವ್ ಹೇಳಿಕೆಗೆ ಬಿಜೆಪಿ ಭರ್ಜರಿ ಕೌಂಟರ್ ನೀಡಿದೆ. ಅಮಿತ್ ಶಾ, ಪಕ್ಷದ ಅಧ್ಯಕ್ಷ ಜೆಪಿ ನಡ್ದಾ ಸೇರಿದಂತೆ ಬಿಜೆಪಿಯ ಹಿರಿಯ ನಾಯಕರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹೆಸರಿನ ಪಕ್ಕ ಮೋದಿ ಕಾ ಪರಿವಾರ್ (ಮೋದಿ ಕುಟುಂಬದವರು) ಎಂದು ಬರೆದಿದ್ದಾರೆ.

ಇದನ್ನು ಮೋದಿ ಕಾ ಪರಿವಾರ್ ಅಭಿಯಾನವನ್ನಾಗಿ ಮಾಡಲಾಗಿದ್ದು, ದೇಶದ ಬಹುತೇಕ ಬಿಜೆಪಿ ನಾಯಕರು ಅಭಿಯಾನಕ್ಕೆ ಕೈ ಜೋಡಿಸಿದ್ದು ತಾವೂ ಸಹ ಮೋದಿ ಪರಿವಾರದವರು ಎಂದು ಬರೆದುಕೊಂಡಿದ್ದಾರೆ. ಲಾಲೂ ಆರೋಪಕ್ಕೆ ತೆಲಂಗಾಣದ ಆದಿಲಾಬಾದ್ ನಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ತಿರುಗೇಟು ನೀಡಿದ್ದ ಪ್ರಧಾನಿ ಮೋದಿ, ದೇಶದಲ್ಲಿನ ಕುಟುಂಬ ರಾಜಕಾರಣದ ವಿರುದ್ಧ ವಾಗ್ದಾಳಿ ನಡೆಸಿದ್ದರು.

ಕುಟುಂಬ ರಾಜಕಾರಣ ನಡೆಸುತ್ತಿರುವವರಿಗೆ ಹಲವು ಮುಖಗಳಿರಬಹುದು ಆದರೆ ಸುಳ್ಳು ಮತ್ತು ಲೂಟಿ ಮಾಡುವುದು ಕುಟುಂಬ ರಾಜಕಾರಣದಲ್ಲಿ ತೊಡಗಿರುವವರಲ್ಲಿ ಕಾಣುವ ಸಾಮಾನ್ಯ ಅಂಶ ಎಂದು ಮೋದಿ ಗುಡುಗಿದ್ದರು. ಇದಷ್ಟೇ ಅಲ್ಲದೇ ದೇಶದ 140 ಕೋಟಿ ಮಂದಿ ತಮ್ಮ ಪರಿವಾರದವರೆಂದು ಮೋದಿ ಹೇಳಿದ್ದರು.