ಪಶ್ಚಿಮ ಬಂಗಾಳ ಸಚಿವರಿಗೆ ಖಾತೆ ಹಂಚಿಕೆ; ಪತ್ರಕರ್ತರಾಗಿದ್ದ ಸ್ವಪನ್ ದಾಸ್‌ಗುಪ್ತಾಗೆ ಹಣಕಾಸು ಇಲಾಖೆ

ಕೋಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿ ಸರ್ಕಾರದಲ್ಲಿ ಪೂರ್ಣ ಪ್ರಮಾಣದ ಸಚಿವ ಸಂಪುಟ ಅಸ್ತಿತ್ವಕ್ಕೆ ಬಂದ 10 ದಿನಗಳ ನಂತರ ಬುಧವಾರ ಸಚಿವರಿಗೆ ಖಾತೆಗಳನ್ನು ಹಂಚಿಕೆ ಮಾಡಲಾಗಿದೆ. ಹಿರಿಯ ನಾಯಕ ತಪಸ್ ರಾಯ್ ಅವರಿಗೆ ಕೈಗಾರಿಕಾ ಸಚಿವ ಸ್ಥಾನ ಮತ್ತು ಪತ್ರಕರ್ತ-ರಾಜಕಾರಣಿ ಸ್ವಪನ್ ದಾಸ್‌ಗುಪ್ತ ಅವರಿಗೆ ಹಣಕಾಸು ಖಾತೆ ನೀಡಲಾಗಿದೆ.

ರಾಜ್ಯ ಗೃಹ ಇಲಾಖೆ ಹೊರಡಿಸಿದ ಅಧಿಸೂಚನೆಯ ಪ್ರಕಾರ ಬಿಧಾನ್‌ನಗರದ ಬಿಜೆಪಿ ಶಾಸಕ ಡಾ. ಶರದ್ವತ್ ಮುಖರ್ಜಿ ಅವರನ್ನು ಆರೋಗ್ಯ ಸಚಿವ ಸ್ಥಾನಕ್ಕೆ ನೇಮಿಸಲಾಗಿದೆ.

ಬಿರ್ಭಮ್ ಜಿಲ್ಲೆಯ ಸೂರಿ ವಿಧಾನಸಭಾ ಸ್ಥಾನವನ್ನು ಗೆದ್ದ ಮತ್ತೊಬ್ಬ ಪತ್ರಕರ್ತ-ರಾಜಕಾರಣಿ ಜಗನ್ನಾಥ್ ಚಟ್ಟೋಪಾಧ್ಯಾಯ ಅವರಿಗೆ ರಾಜ್ಯದ ಉನ್ನತ ಶಿಕ್ಷಣ ಇಲಾಖೆಯ ಜವಾಬ್ದಾರಿಯನ್ನು ನೀಡಲಾಗಿದೆ.

ಬಿರ್ಭಮ್‌ನ ಬಿಜೆಪಿ ನಾಯಕ ದೂಧ್ ಕುಮಾರ್ ಮಂಡಲ್ ಅವರನ್ನು ಕೃಷಿ ಸಚಿವರನ್ನಾಗಿ ನೇಮಿಸಲಾಗಿದ್ದರೆ, ಅಲಿಪುರ್ದುವಾರ್ ಜಿಲ್ಲೆಯ ಫಲಕಟಾದ ಉತ್ತರ ಬಂಗಾಳದ ನಾಯಕ ದೀಪಕ್ ಬರ್ಮನ್ ಅವರಿಗೆ ರಾಜ್ಯ ಶಾಲಾ ಶಿಕ್ಷಣ ಇಲಾಖೆಯ ಉಸ್ತುವಾರಿ ವಹಿಸಲಾಗಿದೆ.

ಇತರ ಮಹತ್ವದ ಖಾತೆಗಳಲ್ಲಿ, ಪ್ರವಾಸೋದ್ಯಮ ಮತ್ತು ಸಂಸದೀಯ ವ್ಯವಹಾರಗಳನ್ನು ಸಿಲಿಗುರಿ ಶಾಸಕ ಶಂಕರ್ ಘೋಷ್ ಅವರಿಗೆ ನೀಡಲಾಗಿದ್ದರೆ, ಕಾರ್ಮಿಕ ಮತ್ತು ಸಾರಿಗೆ ಖಾತೆಗಳನ್ನು ನೋಪಾರಾ ಶಾಸಕ ಅರ್ಜುನ್ ಸಿಂಗ್ ಅವರಿಗೆ ವಹಿಸಲಾಗಿದೆ.

ಸ್ವತಂತ್ರ ಉಸ್ತುವಾರಿ ಹೊಂದಿರುವ ರಾಜ್ಯ ಸಚಿವರಾದ ಇಂದ್ರಾನಿಲ್ ಖಾನ್ ಅವರನ್ನು ಕ್ರೀಡೆ ಮತ್ತು ಯುವಜನ ಮತ್ತು ಗ್ರಾಹಕ ವ್ಯವಹಾರಗಳ ಸಚಿವರನ್ನಾಗಿ ನೇಮಿಸಲಾಗಿದೆ, ಬಿಜೆಪಿಯ ಕೂಚ್ ಬೆಹಾರ್ ಜಿಲ್ಲಾ ನಾಯಕಿ ಮಾಲತಿ ರಾವ ರಾಯ್ ಅವರಿಗೆ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಖಾತೆಯನ್ನು ಹಂಚಿಕೆ ಮಾಡಲಾಗಿದೆ.

ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಮೇ 9 ರಂದು ಐದು ಕ್ಯಾಬಿನೆಟ್ ಸಚಿವರೊಂದಿಗೆ ಪ್ರಮಾಣ ವಚನ ಸ್ವೀಕರಿಸಿದರು - ದಿಲೀಪ್ ಘೋಷ್, ಅಗ್ನಿಮಿತ್ರ ಪಾಲ್, ಅಶೋಕ್ ಕೀರ್ತಾನಿಯಾ, ನಿಸಿತ್ ಪ್ರಾಮಾಣಿಕ್ ಮತ್ತು ಕ್ಷುದಿರಾಮ್ ತುಡು ಅವರಿಗೆ ಈಗಾಗಲೇ ಇಲಾಖೆಗಳ ಹೊಣೆಯನ್ನು ವಹಿಸಲಾಗಿದೆ.