ಪೊಲ್ಲಾಚಿ (ತಮಿಳುನಾಡು): ತನ್ನ ಗೆಳೆಯನ ಮಗಳು ತನ್ನ ಮಗಳು ಅಲ್ಲವೇ ಎಂದು ಯೋಚನೆ ಮಾಡಿದ್ದೇ ತಪ್ಪಾಯಿತು; ಯಾಕಂದ್ರೆ, ಹೀಗೆ ಗೆಳೆಯನ ಮೇಲಿನ ಅಪಾರ ಪ್ರೀತಿ, ಗೌರವದಿಂದ ಆತನ ಮಗಳನ್ನು ತನ್ನ ಸ್ವಂತ ಮಗಳಂತೆ ಭಾವಿಸಿ ಆಸರೆ ನೀಡಿದ ಆ ವ್ಯಕ್ತಿಯ ಮನೆಯಲ್ಲೇ ಚಿನ್ನಾಭರಣ ಎಗರಿಸಿ ಈಗ ಅಂದರ್ ಆಗಿದ್ದಾಳೆ. ಅದರಲ್ಲೂ, ಕದ್ದ ಚಿನ್ನ ಮಾರಿ ಬೈಕ್ ಖರೀದಿಸಿ, ಆ ಸಂಭ್ರಮವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದ ಜೋಡಿ ಸಿಕ್ಕಿಬಿದ್ದರ ಕುರಿತ ರೋಚಕ ಮಾಹಿತಿ ಇಲ್ಲಿದೆ.
ಏನಿದು ಘಟನೆ?
ತಮಿಳುನಾಡಿನ ಕೊಯಮತ್ತೂರು (ಕೋವೈ) ಜಿಲ್ಲೆಯ ಸರ್ಕಾರಿ ಕಲಾ ಕಾಲೇಜಿನಲ್ಲಿ ದ್ವಿತೀಯ ವರ್ಷದ ಬಿ.ಕಾಂ ಓದುತ್ತಿರುವ 19 ವರ್ಷದ ಆರ್ ಜಾಯ್ ಪ್ರಿನ್ಸಿ, ಆಗಸ್ಟ್ 16 ರಂದು ತನ್ನ ತಂದೆಯ ಸ್ನೇಹಿತರಾದ, ಕೊಯಮತ್ತೂರು ಜಿಲ್ಲೆಯ ಪೊಲ್ಲಾಚಿ ಸಮೀಪದ ಊಂಜವೇಲಂಪಟ್ಟಿಯ ನಿವಾಸಿ ತಮಿಳ್ಸೆಲ್ವನ್ ಎಂಬುವವರ ಮನೆಗೆ ಹೋಗಿದ್ದಳು. ಆದರೆ, ಆ ವೇಳೆ ಮನೆಯಲ್ಲಿ ಯಾರೂ ಇಲ್ಲದ ಸಮಯ ನೋಡಿ ಬೀರುವಿನಲ್ಲಿದ್ದ 72 ಗ್ರಾಂ ತೂಕದ ಚಿನ್ನದ ಸರವನ್ನು ಕದ್ದಿದ್ದಾಳೆ. ಇನ್ನು, ಕದ್ದ ಒಡವೆಯನ್ನು ಪೊಲ್ಲಾಚಿಯ ಜ್ಯುವೆಲ್ಲರಿ ಶಾಪ್ ಒಂದರಲ್ಲಿ ಮಾರಾಟ ಮಾಡಿ ಬರೋಬ್ಬರಿ ₹2.5 ಲಕ್ಷ ನಗದು ಪಡೆದುಕೊಂಡಿದ್ದಾಳೆ. ಅದರಲ್ಲೂ, ಆ ಹಣದಿಂದ ತನ್ನ ಬಾಯ್ಫ್ರೆಂಡ್ ಜಗನ್ ಶಿವ (25) ಎಂಬಾತನಿಗೆ ದುಬಾರಿ ಬೆಲೆಯ ಕೆಟಿಎಂ ಡ್ಯೂಕ್ ಬೈಕ್ ಖರೀದಿಸಿ ಸರ್ಪ್ರೈಸ್ ಗಿಫ್ಟ್ ನೀಡಿದ್ದಾಳೆ.
ಹಾಗಾದ್ರೆ, ಸಿಕ್ಕಿಬಿದ್ದಿದ್ದು ಹೇಗೆ?
ಬೀರುವಿನಲ್ಲಿದ್ದ ಒಡವೆ ಕಾಣೆಯಾಗಿರುವುದನ್ನು ಗಮನಿಸಿದ ತಮಿಳ್ಸೆಲ್ವನ್ ಪೊಲೀಸರಿಗೆ ದೂರು ನೀಡಿದ್ದರು. ಪೊಲೀಸರು ತನಿಖೆ ನಡೆಸಿ ಯುವತಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಆಕೆ ತಾನೇ ಕದ್ದಿರುವುದಾಗಿ ಒಪ್ಪಿಕೊಂಡಿದ್ದಾಳೆ. ಅಷ್ಟೇ ಅಲ್ಲದೆ, ಈ ಜೋಡಿ ಹೊಸ ಬೈಕ್ ಡೆಲಿವರಿ ಪಡೆಯುವಾಗ ಸಾಮಾಜಿಕ ಜಾಲತಾಣಗಳಲ್ಲಿ ರೀಲ್ಸ್ ವಿಡಿಯೋ ಮಾಡಿ ಹಂಚಿಕೊಂಡಿದ್ದರು. ಇದು ಕೂಡ ಪೊಲೀಸರಿಗೆ ಪ್ರಮುಖ ಸಾಕ್ಷ್ಯ ಒದಗಿಸಿದೆ.
ಏತನ್ಮಧ್ಯೆ, ಪೊಲೀಸರು ಯುವತಿಯನ್ನು ಬಂಧಿಸಿ ಕೊಯಮತ್ತೂರು ಕೇಂದ್ರ ಕಾರಾಗೃಹದಲ್ಲಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಆದರೆ, ಬೈಕ್ ಪಡೆದುಕೊಂಡ ಆಕೆಯ ಪ್ರಿಯಕರ ಜಗನ್ ಶಿವ ಸದ್ಯ ತಲೆಮರೆಸಿಕೊಂಡಿದ್ದು, ಪೊಲೀಸರು ಆತನಿಗಾಗಿ ಹುಡುಕಾಟ ನಡೆಸುತ್ತಿದ್ದಾರೆ.
