ಮುಸ್ಲಿಮರ ಬಗ್ಗೆ ಕಾಳಜಿ ಇದ್ದೆರೆ ಹಾಸನ ಮುಸ್ಲಿಮರಿಗೆ ಬಿಟ್ಟುಕೊಡಿ: ಗೌಡರಿಗೆ ಜಮೀರ್ ಅಹ್ಮದ್ ಸವಾಲು

ಬೆಂಗಳೂರು: ರಾಜ್ಯಸಭೆ ಚುನಾವಣೆಗೆ ಬಿ.ಎಂ.ಫಾರೂಕ್ ಅವರಿಗೆ ಜೆಡಿಎಸ್ ನಿಂದ ಟಿಕೆಟ್ ನೀಡಿರುವುದಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿರುವ ಚಾಮರಾಜಪೇಟೆ ಜೆಡಿಎಸ್ ಶಾಸಕ ಜಮೀರ್ ಅಹ್ಮದ್ ಖಾನ್ ಅವರು, ನಿಮಗೆ ನಿಜಕ್ಕೂ ಮುಸ್ಲಿಮರ ಬಗ್ಗೆ ಕಾಳಜಿ ಇದ್ದರೆ ಹಾಸನವನ್ನೋ ಅಥವಾ ರಾಮನಗರ ಲೋಕಸಭಾಕ್ಷೇತ್ರವನ್ನು ಮುಸ್ಲಿಂ ಅಭ್ಯರ್ಥಿಗಳಿಗೆ ಬಿಟ್ಟುಕೊಡಿ ಎಂದು ಜೆಡಿಎಸ್ ವರಿಷ್ಠ ಮಾಜಿ ಪ್ರಧಾನಿ ಎಚ್. ಡಿ. ದೇವೇಗೌಡ ಅವರಿಗೆ ಸವಾಲು ಹಾಕಿದ್ದಾರೆ.

ಇಂದು ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಜಮೀರ್ ಅಹ್ಮದ್ ಖಾನ್, ದೇವೇಗೌಡರಿಗೆ ಹಾಗೂ ಜೆಡಿಎಸ್ ರಾಜ್ಯಾಧ್ಯಕ್ಷ ಎಚ್.ಡಿ.ಕುಮಾರಸ್ವಾಮಿ ಅವರ ಮುಸ್ಲಿಮರ ಕಾಳಜಿ ಕೇವಲ ನಾಟಕ ಎಂದರು.

ದೇವೇಗೌಡರು ತಮ್ಮ ಮಗನ ವ್ಯವಹಾರಕ್ಕಾಗಿ ರಾಜ್ಯಸಭಾ ಟಿಕೇಟನ್ನು ಕಾಂಗ್ರೆಸ್‌ನಿಂದ ಬಂದ ಫಾರೂಕ್‌ ಅವರಿಗೆ ನೀಡಿದ್ದಾರೆ. ನಮ್ಮಲ್ಲೂ ಮುಸ್ಲಿಂ ಅಭ್ಯರ್ಥಿಗಳಿರಲಿಲ್ಲವೇ? ಡ್ಯಾನಿಷ್‌ ಅಲಿ ಇದ್ದರು, ಜಫ್ರುಲ್ಲಾ ಖಾನ್‌ ಇದ್ದರು. ಇವರೆನ್ನೆಲ್ಲಾ ಬಿಟ್ಟು ಫಾರೂಕ್‌ಗೆ ಟಿಕೆಟ್ ನೀಡಿರುವುದು ಏಕೆ ಎಂದು ಪ್ರಶ್ನಿಸಿದರು.

ಇದೇ ವೇಳೆ ನಮ್ಮ ಮತ ಏನಿದ್ದರು ಕಾಂಗ್ರೆಸ್‌ಗೆ ಎಂದು ಜಮೀರ್‌ ಅಹ್ಮದ್ ಒತ್ತಿ ಹೇಳಿದರು.