ಎರಡು ದಶಕಗಳ ನಂತರ ಕನಕಪುರದಲ್ಲಿ ಮೊದಲ ಬಾರಿಗೆ ನೈಜ ಸ್ಪರ್ಧೆ; ದಾದಾಗಿರಿ-ಗೂಂಡಾಗಿರಿಯಿಲ್ಲದೆ ಮತದಾನ: ಅಶೋಕ್ (ಸಂದರ್ಶನ)

ಬೆಂಗಳೂರು: ಮೇ 10 ರಂದು ನಡೆಯಲಿರುವ ವಿಧಾನಸಭಾ ಚುನಾವಣೆಯಲ್ಲಿ ರಾಜ್ಯ ಕಾಂಗ್ರೆಸ್ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಅವರ ಭದ್ರಕೋಟೆಯಾದ ಕನಕಪುರದಲ್ಲಿ ಬಿಜೆಪಿಯ ಹಿರಿಯ ನಾಯಕ  ಸಚಿವ ಆರ್.ಅಶೋಕ್ ಕಣಕ್ಕಿಳಿದಿದ್ದಾರೆ.

ಸುಮಾರು ಎರಡು ದಶಕಗಳ ನಂತರ ಈ ಪ್ರದೇಶದಲ್ಲಿ ಮೊದಲ ಬಾರಿಗೆ ನೈಜ ಸ್ಪರ್ಧೆ ನಡೆಯುತ್ತಿದೆ ಎಂದು ಪಿಟಿಐ ಸುದ್ದಿ ಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ. ಕನಕಪುರ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯಲ್ಲಿ ಬರುವ ಈ ಗ್ರಾಮದಲ್ಲಿ ಚುನಾವಣಾ ಪ್ರಚಾರದಲ್ಲಿ ಪಾಲ್ಗೊಂಡಿದ್ದ ಅಶೋಕ ಅವರು ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ, ಈ ಪ್ರದೇಶದಲ್ಲಿ ದೀರ್ಘಕಾಲದಿಂದ ಅಸ್ತಿತ್ವದಲ್ಲಿದ್ದ ಆಡಳಿತ ವಿರೋಧಿ ಅಲೆಗೆ ನಾನೇ ಪರಿಹಾರ ಎಂದು ಭಾವಿಸಿದ್ದೇನೆ ಎಂದು ಹೇಳಿದ್ದಾರೆ.

ಅಚ್ಚರಿಯ ನಡೆಯಲ್ಲಿ ಒಕ್ಕಲಿಗ ಭದ್ರಕೋಟೆಯಾಗಿರುವ ಒಕ್ಕಲಿಗ ಪ್ರಬಲ ನಾಯಕ ಶಿವಕುಮಾರ್  ವಿರುದ್ಧ ಪಕ್ಷದ ಒಕ್ಕಲಿಗ  ಪ್ರಭಾವಿ ಮುಖಂಡ ಎಂದೇ ಪರಿಗಣಿಸಲ್ಪಟ್ಟಿರುವ ಅಶೋಕ ಅವರನ್ನು ಕಣಕ್ಕಿಳಿಸುವ ಮೂಲಕ ಬಿಜೆಪಿಯು ಪ್ರತಿಪಕ್ಷಗಳ ಪಾಳೆಯಕ್ಕೆ ಹೊಸ ಸವಾಲು ನೀಡಿದೆ.  ಪಕ್ಷದ ನಿರ್ದೇಶನದ ಮೇರೆಗೆ ಕನಕಪುರದಿಂದ ಕಣದಲ್ಲಿದ್ದು, ವಾಸ್ತವಿಕವಾಗಿ ಅಸ್ತಿತ್ವವೇ ಇಲ್ಲದ ಕ್ಷೇತ್ರದಲ್ಲಿ ಪಕ್ಷವನ್ನು ಕಟ್ಟುವ ಜತೆಗೆ ಕ್ಷೇತ್ರವನ್ನು ಗೆಲ್ಲಿಸುವುದು ನನ್ನ ಕಾರ್ಯವಾಗಿದೆ ಎಂದು ಅಶೋಕ ಹೇಳಿದರು.

ಪ್ರ: ಕನಕಪುರದಿಂದ ಸ್ಪರ್ಧಿಸಲು ನೀವು ಹಿಂದೇಟು ಹಾಕುತ್ತಿರುವಂತೆ ಕಂಡುಬಂತಲ್ಲ?

ಕನಕಪುರದಿಂದ ಸ್ಪರ್ಧಿಸಲು  ನನಗೆ ಆಸಕ್ತಿ ಇದೆಯೋ ಇಲ್ಲವೋ ಎಂದು ಚರ್ಚಿಸಲು ನನ್ನನ್ನು ಮೊದಲೇ ಸಂಪರ್ಕಿಸಲಿಲ್ಲ. ನೇರವಾಗಿ, ನನಗೆ ಕರೆ ಬಂತು.  ಕನಕಪುರದಿಂದ ಸ್ಪರ್ಧಿಸಬೇಕು ಎಂದು  ಪಕ್ಷ ನಿರ್ಧರಿಸಿತ್ತು. ನಾನು ಅಥವಾ ವಿ ಸೋಮಣ್ಣ (ಸಿದ್ದರಾಮಯ್ಯ ವಿರುದ್ಧ ವರುಣಾ ಕ್ಷೇತ್ರದಲ್ಲಿ ಸ್ಪರ್ಧಿಸುತ್ತಿರುವ ಸಹ ಸಚಿವರು) ಪಕ್ಷದ ನಿರ್ಧಾರವನ್ನು ಒಪ್ಪಿಕೊಳ್ಳಲು ನಾವು ಒಂದು ನಿಮಿಷವೂ ತೆಗೆದುಕೊಳ್ಳಲಿಲ್ಲ.  ಪಕ್ಷ ಹೇಳಿದ ಕೂಡಲೇ ನಾವು ಸಿದ್ಧರಿದ್ದೇವೆ ಎಂದು ಹೇಳಿದರು.

ಪ್ರ. ಪಕ್ಷದ ನಿರ್ಧಾರವಾದ್ದರಿಂದ ಸ್ಪರ್ಧಿಸುತ್ತಿದ್ದೀರಾ ಅಥವಾ  ಕನಕಪುರದಿಂದ  ಕಣಕ್ಕಿಳಿಯುವ ಆಸಕ್ತಿ ಇತ್ತೇ?

ನಾಯಕನಾಗಿ ನಾನು ಸ್ಪರ್ಧಿಸುತ್ತಿದ್ದೇನೆ. ಅಂತಹ ಸವಾಲುಗಳಿಗೆ ನಾನು ಸಿದ್ಧರಾಗಿರಬೇಕು ಇಲ್ಲದಿದ್ದರೆ  ಕೇವಲ ಬೆಂಗಳೂರಿಗೆ ಮಾತ್ರ ಸೀಮಿತವಾಗುತ್ತಿದ್ದೆ. ಬೇರೆ ಕ್ಷೇತ್ರಗಳಿಂದ ಸ್ಪರ್ಧಿಸುವುದರಿಂದ ನನ್ನ ವರ್ಚಸ್ಸು ಹೆಚ್ಚುತ್ತದೆ. ಜಗದೀಶ್ ಶೆಟ್ಟರ್ ಮತ್ತು ಲಕ್ಷ್ಮಣ ಸವದಿ (ಬಿಜೆಪಿ ತೊರೆದು ಕಾಂಗ್ರೆಸ್ ಸೇರಿದವರು) ಮನವಿ ಮಾಡಿದರೂ ಒಂದು ಸ್ಥಾನ ನೀಡಲಿಲ್ಲ. ನನಗೆ ಎರಡು ಸ್ಥಾನಗಳನ್ನು ನೀಡಲಾಗಿದೆ (ಪದ್ಮನಾಭನಗರ ಕೂಡ). ನನಗೆ ನೀಡಿದ ಗೌರವದ ಬಗ್ಗೆ ನನಗೆ ಸಂತೋಷವಾಗಿದೆ. ಇಲ್ಲಿ ಪಕ್ಷಕ್ಕೆ ಹಾಗೂ ಕಾರ್ಯಕರ್ತರಿಗೆ ಶಕ್ತಿ ತುಂಬುತ್ತೇನೆ ಎಂದು ಭಾವಿಸಿ ಟಿಕೆಟ್ ನೀಡಲಾಗಿದೆ.

ಪ್ರ. ಕನಕಪುರದಲ್ಲಿ ಬಿಜೆಪಿ ಸಂಘಟನೆಯಾಗಿ ಅಸ್ತಿತ್ವವಿದೆಯೇ?

2013ರ ಚುನಾವಣೆಯಲ್ಲಿ ನಾವು ಕೇವಲ 1,600  ಮತಗಳನ್ನು ಗಳಿಸಿದ್ದೇವೆ. ಹಿಂದಿನ ಚುನಾವಣೆಯಲ್ಲಿ (2018) ಸುಮಾರು 6,000 ಮತಗಳು. ನಾನು ಕಸದಿಂದ ನಿಧಿ ತೆಗೆಯುವ ಕೆಲಸ ಮಾಡಬೇಕು. ಅದು ಸವಾಲು.

ಪ್ರ: ಕನಕಪುರದಿಂದ ಸ್ಪರ್ಧಿಸುತ್ತಿರುವುದು ಗೆಲ್ಲಲೋ ಅಥವಾ ಹೋರಾಟ ನೀಡಲೋ?

ಗೆಲ್ಲುವ ಉದ್ದೇಶದಿಂದ ನಾನು ಕನಕಪುರದಿಂದ ಸ್ಪರ್ಧಿಸಿದ್ದೇನೆ. ಮೊದಲು  ಹೋರಾಟ ಆಮೇಲೆ ಗೆಲವು. ಈ ಹಿಂದೆ ಬಿಜೆಪಿ ಅಭ್ಯರ್ಥಿಯೊಬ್ಬರು ನಾಮಪತ್ರ ಸಲ್ಲಿಸುವಾಗ ಅವರ ಜತೆ 10 ಮಂದಿ ಮಾತ್ರ ತೆರಳುತ್ತಿದ್ದರು. ಈ ಬಾರಿ ನನ್ನೊಂದಿಗೆ 5,000 ಜನರಿದ್ದರು. ಕರ್ನಾಟಕದ ಉಸ್ತುವಾರಿ ಪ್ರಧಾನ ಕಾರ್ಯದರ್ಶಿ (ಅರುಣ್ ಸಿಂಗ್) ಅವರಂತಹ ನಮ್ಮ ರಾಷ್ಟ್ರೀಯ ನಾಯಕರು ಬಂದಿದ್ದರು. ಪಕ್ಷ ಕಟ್ಟುವ ಜತೆಗೆ ಗೆಲ್ಲಿಸಲು ಇಲ್ಲಿಗೆ ಕಳುಹಿಸಲಾಗಿದೆ.

ಪ್ರ. ಕ್ಷೇತ್ರದಲ್ಲಿ ನಿಮಗೆ ಆತ್ಮವಿಶ್ವಾಸವನ್ನು ನೀಡುತ್ತಿರುವುದು ಯಾವುದು?

ಇಲ್ಲಿಯವರೆಗೆ ಜನರು ನನಗೆ ಅಭೂತಪೂರ್ವ  ಬೆಂಬಲ ನೀಡಿದ್ದಾರೆ. ಮುಖ್ಯವಾದುದೆಂದರೆ, ಸುಮಾರು 20 ವರ್ಷಗಳ ನಂತರ ಇದೇ ಮೊದಲ ಬಾರಿಗೆ ಕನಕಪುರದಲ್ಲಿ ಚುನಾವಣೆ (ಸ್ಪರ್ಧೆ) ನಡೆಯುತ್ತಿದೆ, ಅದರ ಬಗ್ಗೆ ಜನರು ಸಂತೋಷಪಟ್ಟಿದ್ದಾರೆ. ಚುನಾವಣೆಯ ಸಂದರ್ಭದಲ್ಲಿ ಯಾವುದೇ ಮತದಾನಕ್ಕೆ ಸಂಬಂಧಿಸಿದ ಬೋಗಸ್ ಅಥವಾ 'ದಾದಾಗಿರಿ' (ಬೆದರಿಕೆ) ಇರುವುದಿಲ್ಲ ಎಂಬ ವಿಶ್ವಾಸ ಮತ್ತು ಸಂತೋಷವಿದೆ. ಜನರು ಮುಕ್ತವಾಗಿ ಮತ ಚಲಾಯಿಸಬಹುದು ಎಂದು ಖುಷಿಯಾಗಿದ್ದಾರೆ. ಕೇಂದ್ರದಲ್ಲಿ ನರೇಂದ್ರ ಮೋದಿ ಸರ್ಕಾರವಿದೆ, ರಾಜ್ಯದಲ್ಲಿ ಬಿಜೆಪಿ ಸರ್ಕಾರವಿದೆ ಮತ್ತು ಇಲ್ಲಿ 'ಗೂಂಡಾಗಿರಿ' (ಗೂಂಡಾಗಿರಿ)ಗೆ ಅವಕಾಶ ನೀಡುವುದಿಲ್ಲ. ಜನರಿಗೆ ಮುಕ್ತ ಮತ್ತು ನ್ಯಾಯಸಮ್ಮತ ಚುನಾವಣೆಯ ಭರವಸೆ ನೀಡುವುದು ನನ್ನ ಮೊದಲ ಆದ್ಯತೆಯಾಗಿದೆ. ಸುಮಾರು 20 ವರ್ಷಗಳಿಂದ ಜನರು ತಮ್ಮಲ್ಲಿ ತುಂಬಿದ್ದ ಅಕ್ರೋಶವನ್ನು  ಮತಗಳ ಮೂಲಕ ಹೊರಹಾಕಲು ನಾನೇ ಸಾಧನ.

ಪ್ರ. ಕನಕಪುರದಲ್ಲಿ ಜನರು ಎದುರಿಸುತ್ತಿರುವ ಪ್ರಮುಖ ಸಮಸ್ಯೆಗಳೇನು?

ಇಲ್ಲಿ ಇರುವ ಸ್ಥಳೀಯ ವ್ಯವಸ್ಥೆಯಿಂದಾಗಿ ಹೆಚ್ಚಿನ ಸ್ವಾತಂತ್ರ್ಯವಿಲ್ಲ ಎಂದು ಇಲ್ಲಿನ ಜನರು ಭಾವಿಸುತ್ತಾರೆ. ಸ್ವಾತಂತ್ರ್ಯ ಅವರ ಮೊದಲ ಆದ್ಯತೆ. ನಂತರ ರಸ್ತೆಗಳು ಬರುತ್ತವೆ. ಬೆಂಗಳೂರಿಗೆ ಸಂಪರ್ಕ ಕಲ್ಪಿಸುವ ಎಲ್ಲ ಪ್ರಮುಖ ರಸ್ತೆಗಳು ಪೂರ್ಣಗೊಂಡಿವೆ, ಆದರೆ ಕನಕಪುರ ರಸ್ತೆ ಮಾತ್ರ ಕಳೆದ 20 ವರ್ಷಗಳಿಂದ ಪೂರ್ಣಗೊಂಡಿಲ್ಲ. ಅಲ್ಲದೆ, ಈ ಹಿಂದೆ ಅವರು (ಡಿ ಕೆ ಶಿವಕುಮಾರ್) ಪ್ರಬಲ ಸಚಿವರಾಗಿದ್ದರೂ ಇಲ್ಲಿ ಹೆಚ್ಚಿನ ಅಭಿವೃದ್ಧಿಯಾಗಿಲ್ಲ.

ಪ್ರಶ್ನೆ: ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಶಿವಕುಮಾರ್ ಮುಖ್ಯಮಂತ್ರಿ ಆಕಾಂಕ್ಷಿ ಎಂದು ಬಿಂಬಿಸಿದ್ದು, ಒಕ್ಕಲಿಗ ಮತಗಳು ಅವರ ಪರವಾಗಿ ಕ್ರೋಢೀಕರಿಸುವುದಿಲ್ಲವೇ?

ಅಶೋಕ: ಹಾಗಿದ್ದರೆ, ಕುರುಬರು ಮತ್ತು ಇತರ ಹಿಂದುಳಿದ ಸಮುದಾಯಗಳು, ಎಸ್‌ಸಿ/ಎಸ್‌ಟಿಗಳು ಸಹ ತಿರುಗಿ ಬೀಳಬೇಕು (ಶಿವಕುಮಾರ್), ಅವರೂ ಇಲ್ಲಿ ಉತ್ತಮ ಸಂಖ್ಯೆಯಲ್ಲಿದ್ದಾರೆ.

ಪ್ರ: ನೀವು ನೋಡುತ್ತಿರುವ ಗೆಲುವಿನ ಅಂತರ ಎಷ್ಟು?

ನನಗೆ ಈಗ ಮಾರ್ಜಿನ್ ಮುಖ್ಯವಲ್ಲ. ಗೆಲುವು ಮುಖ್ಯ. ನಾನು ಒಂದು ಮತದಿಂದ ಗೆದ್ದರೆ ಅದು 10,000 ಮತಗಳ ಅಂತರದ ಗೆಲುವಿನಂತೆ. ಈ ಬಾರಿ ನನ್ನ ಗೆಲುವಿನ ಬಗ್ಗೆ ನಿಮಗೆ ವಿಶ್ವಾಸ ಇಲ್ಲದಿರಬಹುದು, ಅದು ಸಹಜ, ಆದರೆ ದೇವೇಗೌಡರು ಪ್ರಧಾನಿಯಾದ ನಂತರ ಚುನಾವಣೆಯಲ್ಲಿ ಸೋತಿದ್ದಾರೆ ಎಂಬುದನ್ನು ಮರೆಯಬೇಡಿ. ರಾಜ್ ನಾರಾಯಣ್ ವಿರುದ್ಧ (ಮಾಜಿ ಪ್ರಧಾನಿ) ಇಂದಿರಾಗಾಂಧಿ ಸೋಲಲಿಲ್ಲವೇ, (ಮಾಜಿ ಸಿಎಂಗಳು) ಬಿ ಎಸ್ ಯಡಿಯೂರಪ್ಪ ಮತ್ತು ಸಿದ್ದರಾಮಯ್ಯ ಸೋತಿಲ್ಲವೇ? ರಾಹುಲ್ ಗಾಂಧಿ ತಮ್ಮ ಕುಟುಂಬದ ಸಾಂಪ್ರದಾಯಿಕ ಕ್ಷೇತ್ರವಾದ ಅಮೇಥಿಯಲ್ಲಿ ಹೊರಗಿನವರಾಗಿದ್ದ ಸ್ಮೃತಿ ಇರಾನಿ ವಿರುದ್ಧ ಸೋತರು. ನೀವು ಜನರ ಹೃದಯವನ್ನು ಮುಟ್ಟಿದರೆ, ಅವರು ಬೇರೆಯವರ ಬಗ್ಗೆ ಕಾಳಜಿ ವಹಿಸುವುದಿಲ್ಲ.

ಪ್ರ. ಕರ್ನಾಟಕದಲ್ಲಿ ಚುನಾವಣೆಗೆ ಇನ್ನೂ ಒಂದು ವಾರ ಬಾಕಿ ಇರುವಾಗ ಬಿಜೆಪಿ ಎಲ್ಲಿ ನಿಂತಿದೆ?

ಕಳೆದ ಒಂದೂವರೆ ತಿಂಗಳಲ್ಲಿ ಬಿಜೆಪಿ ಹಂತ ಹಂತವಾಗಿ ಪರಿಸ್ಥಿತಿ ಸುಧಾರಿಸಿದೆ. ಪ್ರಧಾನಿ ಮೋದಿಯವರ ಪ್ರಚಾರ ಮತ್ತು ರ್ಯಾಲಿಗಳು ಪ್ರಾರಂಭವಾದ ನಂತರ, ಪಕ್ಷದ ಗೆಲಪವಿನ ವಿಶ್ವಾಸವನ್ನು ಹೆಚ್ಚಿಸಿದೆ. ಜತೆಗೆ ಕಾಂಗ್ರೆಸ್‌ನ ತಪ್ಪುಗಳೂ ಹೆಚ್ಚಿವೆ. ಭಜರಂಗದಳದ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಲಾಗಿದೆ ಎಂದಿದ್ದಾರೆ.