ಗದಗ: 69 ವರ್ಷದ ಮಲ್ಲಿಕಾರ್ಜುನ ಖಂಡೆಮ್ಮನವರ್ ಗೆ ವರ್ಷಪೂರ್ತಿ ರಾಜ್ಯೋತ್ಸವ

ಗದಗ: 69 ವರ್ಷ ವಯಸ್ಸಿನ ಗದಗ ಪಟ್ಟಣದ ಸಮೀಪದ ಸಣ್ಣ ಗ್ರಾಮವಾದ ಕಳಸಾಪುರದ ಮಲ್ಲಿಕಾರ್ಜುನ ಖಂಡೆಮ್ಮನವರ್ ಅವರದ್ದು ಅಕ್ಷರಶಃ ವರ್ಣರಂಜಿತ ವ್ಯಕ್ತಿತ್ವ. ಮಲ್ಲಿಕಾರ್ಜುನ ಅವರು ಹಳದಿ ಕುರ್ತಾ, ಕೆಂಪು ಪ್ಯಾಂಟ್ ಮತ್ತು ಓವರ್‌ಕೋಟ್‌ ಧರಿಸಿರುತ್ತಾರೆ. ಅಷ್ಟೇ ಅಲ್ಲ, ಅವರ ಮನೆಯನ್ನು ಕೂಡ ಕನ್ನಡಾಭಿಮಾನದ ಬಣ್ಣಗಳಲ್ಲಿಯೇ ಚಿತ್ರಿಸಲಾಗಿದೆ. ಅದರ ಮೇಲೆ 50 ಕ್ಕೂ ಹೆಚ್ಚು ಧ್ವಜಗಳು ಹಾರುತ್ತಿವೆ.

ಮಲ್ಲಿಕಾರ್ಜುನ ಅವರು ಪ್ರತಿದಿನವೂ ರಾಜ್ಯೋತ್ಸವ ಆಚರಿಸುತ್ತಾರೆ. ಕಳೆದ 45 ವರ್ಷಗಳಿಂದ ಗದಗ ಜಿಲ್ಲೆಯಲ್ಲಿ ಕನ್ನಡ ಜಾಗೃತಿ ಮೂಡಿಸುತ್ತಿದ್ದಾರೆ. ತನ್ನ ಟ್ರೇಡ್‌ಮಾರ್ಕ್‌ನ ಪ್ರಕಾಶಮಾನವಾದ ಉಡುಪನ್ನು ಧರಿಸಿ, ತಮ್ಮ ಮೋಟಾರ್ ಸೈಕಲ್ ಏರಿ ಹೊರಡುತ್ತಾರೆ. ಅದು ಕೆಂಪು, ಕಪ್ಪು ಮತ್ತು ಹಳದಿ ಬಣ್ಣಗಳಲ್ಲಿ ರಥದಂತೆ ಕಾಣುತ್ತದೆ.

ಹಳ್ಳಿ, ನಗರಗಳಿಗೆ ಭೇಟಿ ನೀಡಿ ಜನರಿಗೆ ಕನ್ನಡ ಓದಲು, ಬರೆಯಲು ಮತ್ತು ಮಾತನಾಡಲು ಕಲಿಸುತ್ತಾರೆ ಮತ್ತು ಬಡವರಿಗೆ ಉಚಿತವಾಗಿ ಕಥೆ ಪುಸ್ತಕಗಳು, ಪಠ್ಯಪುಸ್ತಕಗಳು, ಕನ್ನಡ ಪತ್ರಿಕೆಗಳು ಮತ್ತು ನಿಯತಕಾಲಿಕೆಗಳನ್ನು ನೀಡುತ್ತಾರೆ. ಅವರು ಕನ್ನಡ ಪ್ರಚಾರಕ್ಕಾಗಿ ಶಾಲಾ-ಕಾಲೇಜುಗಳಿಗೂ ಭೇಟಿ ನೀಡುತ್ತಾರೆ ಮತ್ತು ಗದಗ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ‘ಕನ್ನಡ ಪರಿಚಾರಕ’ ಎಂದು ಪ್ರಸಿದ್ಧರಾಗಿದ್ದಾರೆ.

1982 ರಲ್ಲಿ ಕನ್ನಡ ಧ್ವಜಧಾರಿಯಾಗಿ ಅವರ ಪ್ರಯಾಣ ಪ್ರಾರಂಭವಾಯಿತು. ಮಲ್ಲಿಕಾರ್ಜುನ ಅವರು ಮೈಸೂರಿಗೆ ಹೋಗಿ ವಿ.ಕೆ. ಗೋಕಾಕ್ ವರದಿಯನ್ನು ಜಾರಿಗೆ ತರಲು ಪ್ರತಿಭಟನೆಯಲ್ಲಿ ಭಾಗವಹಿಸಿದರು. ಪ್ರತಿಭಟನೆಯ ಭಾಗವಾಗಿ ತಲೆಯ ಮೇಲೆ ಕಲ್ಲು ಹೊತ್ತುಕೊಂಡು ಇತರ ಕಾರ್ಯಕರ್ತರೊಂದಿಗೆ ತೆರಳಿದರು. ಅಂದು 150ಕ್ಕೂ ಹೆಚ್ಚು ಕಾರ್ಯಕರ್ತರನ್ನು ಪೊಲೀಸರು ಬಂಧಿಸಿದ್ದರು.

ಹಿರಿಯ ನಟ ರಾಜ್‌ಕುಮಾರ್ ಅವರು ಮೈಸೂರಿಗೆ ಆಗಮಿಸಿ ಎಲ್ಲ ಕಾರ್ಯಕರ್ತರನ್ನು ಬಿಡುಗಡೆ ಮಾಡಿಸಿದರು. 'ಡಾ ರಾಜ್‌ಕುಮಾರ್ ಕನ್ನಡದ ಕುರಿತು ಭಾಷಣ ಮಾಡಿ ನಮಗೆ ಸ್ಫೂರ್ತಿ ತುಂಬಿದರು. ಆ ದಿನದಿಂದ ನಾನು ಕನ್ನಡ ಭಾಷೆಯನ್ನು ಜನಪ್ರಿಯಗೊಳಿಸಲು ಕೆಲಸ ಮಾಡಲು ನಿರ್ಧರಿಸಿದೆ' ಎಂದು ಮಲ್ಲಿಕಾರ್ಜುನ ಹೇಳಿದರು.

ಇದನ್ನೂ ಓದಿ: ಅದ್ಧೂರಿ ಸಮಾರಂಭದಲ್ಲಿ ರಾಜ್ಯದ 67 ಸಾಧಕರಿಗೆ ರಾಜ್ಯೋತ್ಸವ ಪ್ರಶಸ್ತಿ ಪ್ರದಾನ!

ಅವರು 1982 ರಲ್ಲಿ ತಮ್ಮ ಕಾರ್ಯಾಚರಣೆಯನ್ನು ಪ್ರಾರಂಭಿಸಿದರೂ ಕೂಡ, 1995 ರಲ್ಲಿ ಕೆಂಪು ಮತ್ತು ಹಳದಿ ಬಟ್ಟೆಗಳನ್ನು ಧರಿಸಲು ಪ್ರಾರಂಭಿಸಿದರು. ಅವರು ರಾಷ್ಟ್ರೀಯ ಮತ್ತು ಪ್ರಾದೇಶಿಕ ಉತ್ಸವಗಳಲ್ಲಿ ಶಾಲಾ ಕಾಲೇಜುಗಳಿಗೆ ಭೇಟಿ ನೀಡುತ್ತಾರೆ ಮತ್ತು ವಿದ್ಯಾರ್ಥಿಗಳಿಗೆ ವಚನಗಳು, ಕಥೆ ಪುಸ್ತಕಗಳು ಮತ್ತು ಸಾಹಿತ್ಯದ ಬರಹಗಳನ್ನು ನೀಡುತ್ತಾರೆ.

ಮಲ್ಲಿಕಾರ್ಜುನ ಅವರು ‘ಡಿ’ ಗ್ರೂಪ್ ಉದ್ಯೋಗಿಯಾಗಿ ಸರ್ಕಾರಿ ಸೇವೆಗೆ ಸೇರಿದ್ದರು. ಆದರೆ, ಕನ್ನಡದ ಬಗ್ಗೆ ಜಾಗೃತಿ ಮೂಡಿಸುವುದನ್ನು ನಿಲ್ಲಿಸುವಂತೆ ಹಿರಿಯ ಅಧಿಕಾರಿಗಳು ಕೇಳಿದ್ದರಿಂದ 2008 ರಲ್ಲಿ ರಾಜೀನಾಮೆ ನೀಡಿದರು. ಅವರು ವಿಆರ್‌ಎಸ್ ಆಯ್ಕೆ ಮಾಡಿಕೊಂಡರು ಮತ್ತು ಈಗ ಅವರು ತಮ್ಮ ಕುಟುಂಬದೊಂದಿಗೆ ಸಂತೋಷದಿಂದ ಬದುಕುತ್ತಿದ್ದಾರೆ ಎಂದು ಹೇಳುತ್ತಾರೆ. ಅವರ ಮಕ್ಕಳಾದ ಬಸವರಾಜ್ ಮತ್ತು ಚಂದ್ರಶೇಖರ್ ಅವರು ಗದಗ ಪಟ್ಟಣದಲ್ಲಿ ಕೆಎಂಎಫ್ ನಂದಿನಿ ಹಾಲಿನ ಕೇಂದ್ರವನ್ನು ನಡೆಸುತ್ತಿದ್ದರೆ, ಮಲ್ಲಿಕಾರ್ಜುನ ಅವರು ತಮ್ಮ ಮಿಷನ್ ಅನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ.

ಕಡಿಮೆ ಸಂಬಳ ಪಡೆಯುತ್ತಿದ್ದ ಮಲ್ಲಿಕಾರ್ಜುನ ಅವರಿಗೆ ಆರಂಭದ ದಿನಗಳು ಕಠಿಣವಾಗಿತ್ತು. ತಮ್ಮ ಹೋರಾಟದ ದಿನಗಳಲ್ಲಿ ತಮ್ಮ ಮನೆಗೆ ಬೆಲ್ಲ, ಗೋಧಿ, ಅಕ್ಕಿ ಮೂಟೆಗಳನ್ನು ಕಳುಹಿಸಿಕೊಟ್ಟಿದ್ದ ದಿವಂಗತ ತೋಂಟದಾರ್ಯ ಸಿದ್ದಲಿಂಗ ಶ್ರೀಗಳನ್ನು ನೆನಪಿಸಿಕೊಳ್ಳುತ್ತಾರೆ. ಶ್ರೀಗಳಿಗೆ ಮಲ್ಲಿಕಾರ್ಜುನ ಮತ್ತು ಅವರ ಆರ್ಥಿಕ ಸ್ಥಿತಿಯ ಬಗ್ಗೆ ತಿಳಿದಿದ್ದರಿಂದ ಅವರಿಗೆ ಸಹಾಯ ಮಾಡಿದರು.

ಮಲ್ಲಿಕಾರ್ಜುನರ ಪತ್ನಿ ಅನಸೂಯಾ ಬೆಂಬಲ

ನನ್ನ ಪತಿ ಕಳೆದ 40 ವರ್ಷಗಳಿಂದ ಸಮಾಜಸೇವೆ ಮಾಡುತ್ತಾ ಕನ್ನಡ ಭಾಷೆಯ ಪ್ರಚಾರ ಮಾಡುತ್ತಿದ್ದಾರೆ. ಅವರನ್ನು ಜಿಲ್ಲೆಯಲ್ಲಿ ‘ಕನ್ನಡದ ಮನುಷ್ಯ’ ಎಂದು ಪ್ರೀತಿಯಿಂದ ಕರೆಯುತ್ತಾರೆ. ಅದರ ಬಗ್ಗೆ ನನಗೆ ತುಂಬಾ ಸಂತೋಷವಾಗಿದೆ. ಕೆಲವರಿಗೆ ಅಭ್ಯಾಸ ಮತ್ತು ಹವ್ಯಾಸಗಳಿರುತ್ತವೆ. ಅದರಂತೆ ನನ್ನ ಪತಿಗೆ ಸಮಾಜ ಸೇವೆ ಇದೆ ಮತ್ತು ಅನೇಕ ಜನರು ಅವರನ್ನು ಪ್ರೀತಿಸುತ್ತಾರೆ. ನಾನು ಯಾವಾಗಲೂ ಅವರೊಂದಿಗೆ ಇದ್ದೇನೆ ಮತ್ತು ನನ್ನ ಪುತ್ರರು ಮತ್ತು ಸೊಸೆಯರು ಸಹ ಅವರನ್ನು ಬೆಂಬಲಿಸುತ್ತಾರೆ. ನಾನು ಅವರಿಗೆ ಕೆಲವು ದಿನಗಳವರೆಗೆ ಸ್ವಲ್ಪ ವಿಶ್ರಾಂತಿ ತೆಗೆದುಕೊಳ್ಳುವಂತೆ ಹೇಳುತ್ತಿದ್ದೆ, ಆದರೆ ಅವರು ಯಾವಾಗಲೂ ಕಾರ್ಯನಿರತನಾಗಿರುತ್ತಾರೆ ಮತ್ತು ಪ್ರತಿ ವಾರ ನಮ್ಮ ಮನೆಯಲ್ಲಿ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಾರೆ.

ನಾನು ಬಾಲ್ಯದಿಂದಲೂ ಕನ್ನಡ ಪ್ರೇಮಿಯಾಗಿದ್ದೆ, ಆದರೆ ಅದನ್ನು ಹೇಗೆ ವ್ಯಕ್ತಪಡಿಸಬೇಕೆಂದು ತಿಳಿದಿರಲಿಲ್ಲ. ಬಾಲ್ಯದಲ್ಲಿ ಭಾಷಣ ಸ್ಪರ್ಧೆ ಮತ್ತಿತರ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ಭಾಗವಹಿಸುತ್ತಿದ್ದೆ. ನಾನು 1982ರಲ್ಲಿ ಗೋಕಾಕ್ ಚಳವಳಿಯಲ್ಲಿ ಭಾಗವಹಿಸಿದಾಗ ಉತ್ತರ ಕರ್ನಾಟಕದ ಕೆಲವು ಭಾಗಗಳಲ್ಲಿ ಪ್ರಸಿದ್ಧಿ ಪಡೆದು ಕನ್ನಡದ ಬಗ್ಗೆ ಜಾಗೃತಿ ಮೂಡಿಸಲು ವೇದಿಕೆಯನ್ನು ಬಳಸಿಕೊಂಡೆ. ನನ್ನ ಕುಟುಂಬವೂ ಬೆಂಬಲ ನೀಡುತ್ತಿದೆ. ಈಗ ನನಗೆ 69 ವರ್ಷ ಮತ್ತು ನನಗೆ 100 ವರ್ಷವಾಗುವವರೆಗೂ ಕನ್ನಡ ಕಾರ್ಯಕರ್ತನಾಗಿರಲು ಬಯಸುತ್ತೇನೆ.

ಸಿದ್ದಲಿಂಗ ಶ್ರೀಗಳ ವಿದ್ಯಾರ್ಥಿ

ಮಲ್ಲಿಕಾರ್ಜುನ ಅವರು 40 ವರ್ಷಗಳಿಂದ ತೋಂಟದಾರ್ಯ ಸಿದ್ದಲಿಂಗ ಶ್ರೀಗಳ ಪ್ರಾಮಾಣಿಕ ಅನುಯಾಯಿ ಹಾಗೂ ಶಿಷ್ಯ. ಅನೇಕ ಪ್ರತಿಭಾವಂತ ಬರಹಗಾರರಿಗೆ ಕನ್ನಡದಲ್ಲಿ ಪುಸ್ತಕಗಳನ್ನು ಪ್ರಕಟಿಸಲು ಶ್ರೀಗಳು ಸಹಾಯ ಮಾಡಿದ್ದಾರೆ ಎಂದು ತಿಳಿದುಬಂದಿದೆ.

ಮನೆಯಲ್ಲಿ ಚಿಕ್ಕ ಗ್ರಂಥಾಲಯ

ಮಲ್ಲಿಕಾರ್ಜುನ ಅವರು ಶ್ರೀಗಳಿಂದ ಅನೇಕ ಪುಸ್ತಕಗಳನ್ನು ಪಡೆದಿದ್ದಾರೆ ಮತ್ತು ಕಳಸಾಪುರದ ಅವರ ಮನೆಯಲ್ಲಿದ್ದ ಅವರ ಸಣ್ಣ ಗ್ರಂಥಾಲಯದ ಭಾಗವಾಗಿರುವ ಕನ್ನಡ ಪುಸ್ತಕಗಳು ಮತ್ತು ಬಸವ ತತ್ವಶಾಸ್ತ್ರದ ಪುಸ್ತಕಗಳನ್ನು ಸಹ ಖರೀದಿಸಿದರು. ಅವರು ಬಡ ವಿದ್ಯಾರ್ಥಿಗಳಿಗೆ ಓದಲು ಉಚಿತವಾಗಿ ಪುಸ್ತಕಗಳನ್ನು ನೀಡುತ್ತಾರೆ ಮತ್ತು ಇತರರು ಪುಸ್ತಕಗಳನ್ನು ಎರವಲು ಪಡೆಯಲು ಅವರು ಮೊದಲು ಪಡೆದಿದ್ದ ಪುಸ್ತಕಗಳನ್ನು ಹಿಂತಿರುಗಿಸಬೇಕು.

ಕೋಮು ಸೌಹಾರ್ದ ಪ್ರಶಸ್ತಿ

ಗದಗ ಜಿಲ್ಲೆಯಲ್ಲಿ ಯುವಕರು ಮತ್ತು ಸಮಾಜದಲ್ಲಿ ಸಾಮರಸ್ಯದ ಅರಿವು ಮೂಡಿಸುವಲ್ಲಿ ಮಲ್ಲಿಕಾರ್ಜುನ ಅವರು ಪ್ರಮುಖ ಪಾತ್ರ ವಹಿಸಿದ್ದಾರೆ. ತೋಂಟದಾರ್ಯ ಮಠ, ಅಕ್ಷರದೀಪ ಸಾಹಿತ್ಯ ವೇದಿಕೆ, ಸೇವಾ ರತ್ನ, ದಲಿತ ಸಂಘರ್ಷ ಸಮಿತಿ, ಗದಗ ಜಿಲ್ಲಾಡಳಿತ ಹಾಗೂ ಇತರೆ ತಾಲೂಕು ಮಟ್ಟದ ಸಂಘ ಸಂಸ್ಥೆಗಳಿಂದ ಕೋಮು ಸೌಹಾರ್ದ ಪ್ರಶಸ್ತಿ ಸ್ವೀಕರಿಸಿದ್ದಾರೆ.

ಕನ್ನಡ ರಥ

ಮಲ್ಲಿಕಾರ್ಜುನ ಅವರ ಚಿಕ್ಕ ಮೋಟಾರ್‌ ಸೈಕಲ್ ಅನ್ನು ಮಾರ್ಪಡಿಸಲು 12,000 ರೂಪಾಯಿ ಖರ್ಚು ಮಾಡಿದ್ದು, ಅದನ್ನು ಕನ್ನಡದ ರಥ ಎಂದು ಕರೆಯಲಾಗುತ್ತದೆ. ಇದು ನಾಲ್ಕು ದೊಡ್ಡ ಕನ್ನಡ ಧ್ವಜಗಳು ಮತ್ತು ಮುಂಭಾಗದಲ್ಲಿ ಕೆಲವು ಸಂದೇಶಗಳಿಂದ ಅಲಂಕರಿಸಲ್ಪಟ್ಟಿದೆ. ಬೈಕ್‌ನ ಎಲ್ಲಾ ಬದಿಗಳನ್ನು ಹಳದಿ ಮತ್ತು ಕೆಂಪು ಹೂವುಗಳಿಂದ ಅಲಂಕರಿಸಲಾಗಿದೆ.

ಮನೆಯ ಬಣ್ಣಗಳು

ಮಲ್ಲಿಕಾರ್ಜುನ ಅವರ ಮನೆಯ ಹೊರಗೆ ಮತ್ತು ಒಳಗೆ ಕೆಂಪು ಮತ್ತು ಹಳದಿ ಬಣ್ಣವನ್ನು ಬಳಿಯಲಾಗಿದೆ. ಆ ಮನೆಯನ್ನು ನೋಡಿದ ಕೂಡಲೇ 'ಕನ್ನಡಿಗನ' ಮನೆ ಎಂದು ಸುಲಭವಾಗಿ ಗುರುತಿಸಬಹುದು. ಮನೆಯ ಎಲ್ಲಾ ಕಡೆಗಳಲ್ಲಿ ಮತ್ತು ಟೆರೇಸ್‌ನಲ್ಲಿ 53 ಸಣ್ಣ ಮತ್ತು ದೊಡ್ಡ ಧ್ವಜಗಳನ್ನು ಹಾರಿಸುತ್ತದೆ. ಮನೆಯು ಗ್ರಾಮದ ಪ್ರವೇಶ ದ್ವಾರದಲ್ಲಿಯೇ ಇದೆ.