ಅಣ್ಣ ತಂದ ಪೇಟೆಯಿಂದ
ಹೊಸ ದಿನದರ್ಶಿಕೆ
ಹತ್ತರ ಮೇಲೆ ಎರಡು ಪುಟ
ಹಬ್ಬದ ಸಾಲಿನ ಸೂಚಿಕೆ
ಜನವರಿ ತಿಂಗಳ ಮೊದಲು
ಸಂಕ್ರಾಂತಿ ಹಬ್ಬ ಅದರಲ್ಲಿ
ಎರಡನೆಯ ಪುಟ ಫೆಬ್ರವರಿ
ಶಿವನ ಆರಾಧನೆಯ ಮಾತಲ್ಲಿ
ಹೊಸ ವರ್ಷದ ಯುಗಾದಿ
ಮಾರ್ಚ್‌ನಲ್ಲಿ ಇತ್ತು
ಏಪ್ರಿಲ್ ಒಂದನೆ ದಿನ
ಮೂರ್ಖರ ದಿನವು ಆಗಿತ್ತು
ಮೇ ತಿಂಗಳ ಮೊದಲು
ಶ್ರಮ ಜೀವಗಳ ನೆನಪು
ಹಿಂದೆಯೆ ಬಂತು ಜೂನ್
ಸೂರ್ಯನ ಕಿರಣದ ಹೊಳಪು
ಗಾಳಿಯ ಕಾಲದ ಆಷಾಡ
ಜುಲೈ ತಿಂಗಳ ಒಳಗೆ
ಆಗಸ್ಟ್‌ನಲ್ಲಿ ಸ್ವಾತಂತ್ರ್ಯದ ಹಬ್ಬ
ವಿನಾಯಕ ವ್ರತದ ಜೊತೆಗೆ
ನವರಾತ್ರಿಯು ಆರಂಭ
ಸೆಪ್ಟೆಂಬರ್ ಬಂದು ನಿಂತರೆ
ಅಕ್ಟೋಬರ್ ಎರಡನೆ ದಿನ
ಅಜ್ಜ ಗಾಂಧಿ ಬರ್ತಾರೆ
ಕನ್ನಡ ತಾಯಿ ಉತ್ಸವ
ನವೆಂಬರ್ ಮೊದಲಲ್ಲಿ
ಕಡೆಯದಾಗಿ ಡಿಸೆಂಬರ್
ನಡುಗುವ ಗಡಗಡ ಚಳಿಯಲ್ಲಿ
- ಶಿವನಪುರ ನರಸಿಂಹಮೂರ್ತಿ
