ಗರ್ಲ್ ಫ್ರೆಂಡ್ ಗಾಗಿ ವಿಮಾನ ಹೈಜಾಕ್ ಮೇಲ್ ಮಾಡಿದ್ದ ಹೈದರಾಬಾದ್ ವ್ಯಕ್ತಿ ಬಂಧನ

ಹೈದರಾಬಾದ್: ತನ್ನ ಗರ್ಲ್ ಫ್ರೆಂಡ್ ವಿಮಾನ ಪ್ರಯಾಣ ತಪ್ಪಿಸುವುದಕ್ಕಾಗಿ ವಿಮಾನ ಹೈಜಾಕ್ ಡ್ರಾಮಾ ಸೃಷ್ಟಿಸಿದ ಹೈದರಾಬಾದ್ ಮೂಲದ ಸಾರಿಗೆ ಏಜೆಂಟ್ ನನ್ನು ಗುರುವಾರ ಪೊಲೀಸರು ಬಂಧಿಸಿದ್ದಾರೆ.

ಬಂಧಿತ ಹೈಜಾಕ್ ಆರೋಪಿ ಮೊತಪರ್ತಿ ವಂಶಿ ಕೃಷ್ಣ ಎಂದು ಗುರುತಿಸಲಾಗಿದ್ದು, ಕಳೆದ ಶನಿವಾರ ಹೈದರಾಬಾದ್, ಮುಂಬೈ, ಚೆನ್ನೈ ವಿಮಾನ ನಿಲ್ದಾಣಗಳಲ್ಲಿ ವಿಮಾನ ಹೈಜಾಕ್ ಮಾಡುವ ಸಾಧ್ಯತೆ ಇದೆ ಎಂದು ಮುಂಬೈ ಪೊಲೀಸರಿಗೆ ಮೇಲ್ ಮಾಡಿದ್ದ.

ವಂಶಿ ಕೃಷ್ಣನಿಗೆ ಮದುವೆಯಾಗಿದ್ದು, ಓರ್ವ ಮಗಳು ಸಹ ಇದ್ದಾಳೆ. ಆದರೆ ಇತ್ತೀಚಿಗೆ ಫೇಸ್ ಬುಕ್ ನಲ್ಲಿ ಪರಿಚಯವಾಗಿದ್ದ ಚೆನ್ನೈ ಮೂಲದ ಯುವತಿ ಏಪ್ರಿಲ್ 16ರಂದು ಚೆನ್ನೈನಿಂದ ಮುಂಬೈಗೆ ಟಿಕೆಟ್ ಬುಕ್ ಮಾಡುವಂತೆ ಮತ್ತು ಅಲ್ಲೆ ತನ್ನನ್ನು ಭೇಟಿಯಾಗುವಂತೆ ತಿಲಿಸಿದ್ದಳು. ಆದರೆ ಟಿಕೆಟ್ ಬುಕ್ ಮಾಡಲು ತನ್ನ ಬಳಿ ಹಣ ಇಲ್ಲದ ಕಾರಣ ಆರೋಪಿ ಏಪ್ರಿಲ್ 15ಕ್ಕೆ ನಕಲಿ ಟಿಕೆಟ್ ಬುಕ್ ಮಾಡಿದ್ದ. ಬಳಿಕ ಆಕೆಯ ಪ್ರಮಾಣವನ್ನು ಮುಂದೂಡಬೇಕು ಎಂಬ ಉದ್ದೇಶದಿಂದ ಮಹಿಳೆಯ ಹೆಸರಿನಲ್ಲಿ ಮುಂಬೈ ಪೊಲೀಸರಿಗೆ ಮೇಲ್ ಮಾಡಿ, ಆರು ಮಂದಿಯ ತಂಡ ಮುಂಬೈ, ಚೆನ್ನೈ ಹಾಗೂ ಹೈದರಾಬಾದ್ ನಿಂದ ಹೊರಡುವ ವಿಮಾನಗಳನ್ನು ಹೈಜಾಕ್ ಮಾಡುವ ಸಾಧ್ಯತೆ ಇದೆ ಎಂದು ಎಚ್ಚರಿಸಿರುವುದಾಗಿ ಆರೋಪಿ ವಿಚಾರಣೆ ವೇಳೆ ತಪ್ಪೊಪ್ಪಿಕೊಂಡಿದ್ದಾನೆ.

ಈ ಬೆದರಿಕೆ ಹಿನ್ನೆಲೆಯಲ್ಲಿ ಮೂರು ವಿಮಾನ ನಿಲ್ಡಾಣಗಳಲ್ಲಿ ತೀವ್ರ ಕಟ್ಟೆಚ್ಚರ ವಹಿಸಲಾಗಿತ್ತು.