ರಾಣಿಗೆ ಇನ್ನಿಲ್ಲ ಶಬ್ದದ ಕಿರಿಕಿರಿ ಅರಮನೆ ಇನ್ನು ಸೌಂಡ್‍ಪ್ರೂಫ್

ಲಂಡನ್: ``ಸಂತೆಯೊಳಗೊಂದು ಮನೆಯ ಮಾಡಿ ಶಬ್ದಕ್ಕೆ ನಾಚಿದರೆ ಹೇಗೆ'' ಎಂದು ಇಲ್ಲಿ ಕೇಳುವ ಹಾಗಿಲ್ಲ. ವಿಮಾನ ನಿಲ್ದಾಣದ ಪಕ್ಕದಲ್ಲೇ ಅರಮನೆಯಿದ್ದರೂ ರಾಣಿಯ ಕಿವಿಗೆ ವಿಮಾನದ ಶಬ್ದ ಕೇಳಲೇಬಾರದು. ಅದಕ್ಕಾಗಿ ಬ್ರಿಟನ್‍ನ ಸಾರಿಗೆ ಇಲಾಖೆ ರಾಣಿ ಎಲಿಜಬೆತ್ 2 ಅವರ ಮನೆಯನ್ನೇ   ನಾಯ್ಸ್ ಪ್ರೂಫ್(ಶಬ್ದ ನಿರೋಧಕ ವ್ಯವಸ್ಥೆ) ಮಾಡಲು ಹೊರಟಿದೆ. ಇಲ್ಲಿನ ಹೀಥ್ರೋ ವಿಮಾನ ನಿಲ್ದಾಣದಲ್ಲಿ ಮೂರನೇ ರನ್ ವೇ ನಿರ್ಮಾಣಕ್ಕೆ ಇಲಾಖೆ ಮುಂದಾಗಿದೆ. ಆದರೆ, ವಿಮಾನ ನಿಲ್ದಾಣದ ಪಕ್ಕದಲ್ಲೇ ವಿಂಡ್ಸರ್ ಅರಮನೆಯಿದೆ. 89 ವರ್ಷದ ರಾಣಿ ಹೆಚ್ಚಾಗಿ ತಮ್ಮ ವಾರಾಂತ್ಯವನ್ನು 900 ವರ್ಷಗಳಷ್ಟು ಹಳೆಯ ಈ ಅರಮನೆಯಲ್ಲೇ ಕಳೆಯುತ್ತಾರೆ. ವಿಮಾನಗಳ ಟೇಕ್‍ಆಫ್ ಹಾಗೂ ಲ್ಯಾಂಡಿಂಗ್ ವೇಳೆ ಶಬ್ದವಾಗುವುದು ಸಹಜ. ಈ ಶಬ್ದವು ರಾಣಿಯ ಕಿವಿಗೆ ಬಿದ್ದು ಕಿರಿಕಿರಿ ಉಂಟುಮಾಡಬಾರದೆಂದು, ರಾಣಿಗೆ ಬರೋಬ್ಬರಿ 700 ದಶಲಕ್ಷ ಪೌಂಡ್(ರು.6,883 ಕೋಟಿ) ಪರಿಹಾರ ನೀಡಲು ನಿರ್ಧರಿಸಲಾಗಿದೆ. ಇಲ್ಲಿ ಪರಿಹಾರವೆಂದರೆ ಹಣವಲ್ಲ, 13 ಎಕರೆಯಲ್ಲಿ ವ್ಯಾಪಿಸಿರುವ ಈ ಅರಮನೆಗೆ ವಿಮಾನಗಳ ಶಬ್ದ ಕೇಳದಂತೆ ನಿರೋಧಕ ವ್ಯವಸ್ಥೆಯನ್ನು ಅಳವಡಿಸುವುದು. ಒಟ್ಟಿನಲ್ಲಿ 3ನೇ ರನ್‍ವೇ ನಿರ್ಮಾಣಕ್ಕೂ ಮೊದಲು ರು.6,888 ಕೋಟಿ ವೆಚ್ಚದಲ್ಲಿ ವಿಂಡ್ಸರ್ ಅರಮನೆಯನ್ನು ಸೌಂಡ್ ಪ್ರೂಫ್ ಮಾಡುವ ಹೊಣೆಯನ್ನು ಸಾರಿಗೆ ಇಲಾಖೆ ಹೊತ್ತುಕೊಂಡಿದೆ.