ಅಮೆರಿಕದಲ್ಲಿ ಹಿಂದು ದೇವಾಲಯಕ್ಕೆ ಮುಸ್ಲಿಂ ಪೊಲೀಸ್ ಭದ್ರತೆ

ವಾಷಿಂಗ್ಟನ್: ಅಮೆರಿಕದ ಇಂಡಿಯಾನಾಪೊಲಿಸ್ ನಗರದಲ್ಲಿರುವ ಹಿಂದು ದೇವಸ್ಥಾನದ ಭದ್ರತಾ ಅಧಿಕಾರಿಯಾಗಿ ಭಾರತದ ಮುಂಬೈ ಮೂಲದ ಪೊಲೀಸ್ ಅಧಿಕಾರಿ ಲೆಫ್ಟಿನೆಂಟ್ ಜಾವೇದ್ ಖಾನ್ ರನ್ನು ಅಮೆರಿಕ ನೇಮಕ ಮಾಡಿದೆ. 

ಮುಂಬರುವ ಅಮೆರಿಕದ ಅಧ್ಯಕ್ಷೀಯ ಚುನಾವಣೆ ಪೂರ್ವಭಾವಿಯಾಗಿ ಜನಾಂಗೀಯ ಘರ್ಷಣೆ ನಡೆಯದಿರಲಿ ಎಂದು ಭದ್ರತೆ ಏರ್ಪಡಿಸಲಾಗಿದೆ. 2001ರಲ್ಲಿ ಇಂಡಿಯಾನಕ್ಕೆ ಬಂದು ನೆಲೆಯೂರಿರುವ ಜಾವೇದ್ ಖಾನ್ ಕರಾಟೆ ಬ್ಲಾಕ್ ಬೆಲ್ಟ್ ಮತ್ತು ಟೆಕ್ವಾಂಡೋ ಸಮರ ಕಲೆ ಜತೆಗೆ ಕಿಕ್ ಬಾಕ್ಸಿಂಗ್ ಕಲಾ ಪ್ರವೀಣರಾಗಿದ್ದಾರೆ. 

ಜಾವೀದ್ ಖಾನ್ ಹಿಂದೂ ಸಂಸ್ಕೃತಿ ಬಗ್ಗೆ ಅಪಾರ ಗೌರವ ಹೊಂದಿದ್ದು ತಾನೊಬ್ಬ ಭಾರತೀಯನಾಗಿರುವುದರಿಂದ ಹಿಂದುತ್ವವು ನನ್ನ ರಕ್ತದಲ್ಲಿದೆ. ಈ ಹಿಂದೆ ತನ್ನ ಮಗಳ ವಿವಾಹವನ್ನು ಇದೇ ಮಂದಿರದಲ್ಲಿ ನೆರವೇರಿಸಿದ್ದರು. ಆಗಿನಿಂದ ಈ ದೇವಸ್ಥಾನ ಮತ್ತು ಹಿಂದೂ ಸಂಸ್ಕೃತಿ ಕುರಿತು ಹೆಚ್ಚು ಒಲವು ವ್ಯಕ್ತವಾಯಿತು ಎಂದು ಹೇಳಿದ್ದಾರೆ. 

ಈ ದೇವಾಲಯಕ್ಕೆ ದಿನಂಪ್ರತಿ 400ಕ್ಕೂ ಹೆಚ್ಚು ಭಕ್ತಾಧಿಗಳು ಭೇಟಿ ನೀಡುತ್ತಾರೆ, ವಾರಾಂತ್ಯದಲ್ಲಿ ದೇವರ ದರ್ಶನಕ್ಕಾಗಿ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಆಗಮಿಸುತ್ತಾರೆ ಎಂದು ದೇವಸ್ಥಾನ ಕಮಿಟಿ ಮುಖ್ಯಸ್ಥರು ತಿಳಿಸಿದ್ದಾರೆ.