ಹಸಿದವನು ಆಹಾರ ಕದ್ದರೆ ಅದು ಅಪರಾಧವಲ್ಲ: ಇಟಲಿ ನ್ಯಾಯಾಲಯ

ರೋಮ್: ಹೊಟ್ಟೆಗೆ ಆಹಾರವಿಲ್ಲದಿರುವಾಗ ಆಹಾರವನ್ನು ಕದಿಯುವುದು ಅಪರಾಧ ಎಂದೆನಿಸಲ್ಲ ಎಂದು ಇಟಲಿಯ ಪರಮೋಚ್ಛ ನ್ಯಾಯಾಲಯ ಹೇಳಿದೆ. ಹಸಿವು ನೀಗಿಸಲು ಸೂಪರ್ ಮಾರ್ಕೆಟ್‌ನಿಂದ ಚೀಸ್ ಮತ್ತು ಸಾಸೇಜ್ ಕದ್ದ ರೋಮನ್ ಓಸ್ಟ್ರೀಯೋಕೋವ್ ಎಂಬಾತನನ್ನು ಕೋರ್ಟ್ ಆರೋಪ ಮುಕ್ತ ಮಾಡಿದೆ.

ಹಸಿವಿನಿಂದ ಬಳಲುತ್ತಿದ್ದ  ಉಕ್ರೇನ್ ಮೂಲದ ಓಸ್ಟ್ರೀಯೋಕೋವ್ (36) ಆಹಾರ ಕದಿಯುವಾಗ ಸಿಕ್ಕಿ ಬಿದ್ದಿದ್ದನು. ಈತನನ್ನು ಪೊಲೀಸರಿಗೆ ಒಪ್ಪಿಸಿ ಕೋರ್ಟ್‌ಗೆ ಹಾಜರು ಪಡಿಸಿದಾಗ 100 ಯುರೋ ದಂಡ ಪಾವತಿಸುವಂತೆ ಆದೇಶಿಸಿ 6 ತಿಂಗಳು ಜೈಲು ಶಿಕ್ಷೆ ವಿಧಿಸಲಾಗಿತ್ತು. ಆದರೆ ದಂಡ ಪಾವತಿ ಮಾಡುವ ದುಡ್ಡು ಆತನಲ್ಲಿರಲಿಲ್ಲ.

ಸೋಮವಾರ ಈ ಪ್ರಕರಣದ ಬಗ್ಗೆ ವಿಚಾರಣೆ ನಡೆಸಿದ ನ್ಯಾಯಾಲಯವು ಬಡವಓಸ್ಟ್ರೀಯೋಕೋವ್ ಒಂದು ಹೊತ್ತಿನ ಹಸಿವು ನೀಗಿಸಲು ಸ್ವಲ್ಪ ಆಹಾರವನ್ನು ಕದ್ದಿದ್ದಾನೆ. ಹಸಿವಿನಿಂದ ಆಹಾರ ಕದ್ದ ಕಾರಣ ಇದನ್ನು ಅಪರಾಧವೆಂದು ಪರಿಗಣಿಸಲು ಸಾಧ್ಯವಿಲ್ಲ ಎಂದು ಹೇಳಿದ ನ್ಯಾಯಾಧೀಶರು ಪ್ರಸ್ತುತ ಪ್ರಕರಣವನ್ನು ತಳ್ಳಿ, ಆರೋಪಿಯನ್ನು ಬಂಧಮುಕ್ತಗೊಳಿಸುವಂತೆ ಆದೇಶಿಸಿದ್ದಾರೆ.