ಚಿಕಿತ್ಸೆಗೆ ಸ್ಪಂದಿಸಿದ ಪಾಕಿಸ್ತಾನದ 'ಸೋಲಾರ್ ಕಿಡ್ಸ್‌'

ಇಸ್ಲಾಮಾಬಾದ್: ಪಾಕಿಸ್ತಾನ ಕ್ವೆಟ್ಟಾದಲ್ಲಿರುವ ಸೋಲಾರ್ ಕಿಡ್ಸ್ ಚಿಕಿತ್ಸೆಗೆ ಸ್ಪಂದಿಸಿದ್ದು, ಅವರೀಗ ಸಾಮಾನ್ಯ ಮಕ್ಕಳಂತೆ ಲವಲವಿಕೆಯಿಂದ ಬದುಕಬಲ್ಲರು ಎಂದು ವೈದ್ಯರು ಹೇಳಿದ್ದಾರೆ.

ಪಾಕಿಸ್ತಾನದ ರಶೀದ್ ಮತ್ತು ಶೊಯೇಬ್ ಎಂಬ ಈ ಮಕ್ಕಳನ್ನು ಸೋಲಾರ್ ಕಿಡ್ಸ್ ಎಂದೇ ಕರೆಯಲಾಗುತ್ತಿದೆ. ಸೋಲಾರ್ ಕಿಡ್ಸ್ ಎಂದು ಇವರನ್ನು ಯಾಕೆ ಕರೆಯುತ್ತಾರೆ ಎಂದರೆ ಈ ಮಕ್ಕಳು ಸೂರ್ಯಪ್ರಕಾಶವಿರುವಷ್ಟು ಹೊತ್ತು ಮಾತ್ರ ಸಾಮಾನ್ಯ ಮಕ್ಕಳಂತೆ ಇರಬಲ್ಲರು. ರಾತ್ರಿಯಾಗುತ್ತಿದ್ದಂತೆ ಇವರ ದೇಹ ಮುದುಡಿಹೋಗುತ್ತದೆ. ಈ ಮಕ್ಕಳು ಸೂರ್ಯಪ್ರಕಾಶವಿಲ್ಲದ ವೇಳೆ ಅರ್ಧ ಸತ್ತಂತೆಯೇ ಇರುತ್ತಾರೆ. ಈ ಮಕ್ಕಳ ಚಿಕಿತ್ಸೆಗಾಗಿ ಇವರ ಅಪ್ಪ ಕಳೆದ ಮೂರು ವರುಷಗಳಿಂದ ಕಷ್ಟ ಪಡುತ್ತಲೇ ಇದ್ದರು.

ಸೋಲಾರ್ ಕಿಡ್ಸ್ ಬಗ್ಗೆ ಮಾಧ್ಯಮಗಳು ಸುದ್ದಿ ಮಾಡಿದ್ದೇ ತಡ, ಪಾಕಿಸ್ತಾನ್ ಇನ್ಸಿಟ್ಯೂಟ್ ಆಫ್ ಮೆಡಿಕಲ್ ಸಯನ್ಸ್ (ಪಿಆಎಂಎಸ್) ಈ ಮಕ್ಕಳಿಗೆ ಚಿಕಿತ್ಸೆ ನೀಡಲು ಮುಂದೆ ಬಂದಿತ್ತು.

ಚಿಕಿತ್ಸೆಯ ನಂತರ ಈ ಮಕ್ಕಳು ಸಾಮಾನ್ಯ ಮಕ್ಕಳಂತೆ ಆಗಿದ್ದಾರೆ. ಈಗ ಅವರ ಆರೋಗ್ಯ ಸ್ಥಿತಿಯೂ ಚೆನ್ನಾಗಿದೆ. ರಾತ್ರಿ ಹೊತ್ತು ಇವರು ಆಸ್ಪತ್ರೆಯಲ್ಲಿ ಸೆಲ್ಫಿಗಳನ್ನು ತೆಗೆದುಕೊಂಡು ಲವಲವಿಕೆಯಿಂದ ಕಾಲ ಕಳೆದಿದ್ದಾರೆ ಎಂದು ಪಿಐಎಂಎಸ್ ಉಪಕುಲಪತಿ ಡಾ ಡಾವೇದ್ ಅಕ್ರಮ್ ಹೇಳಿದ್ದಾರೆ.