ಅಮೆರಿಕಾ ನಮ್ಮನ್ನು ಅಧಿಕೃತ ಪರಮಾಣು ಶಸ್ತ್ರಾಸ್ತ್ರ ರಾಷ್ಟ್ರ ಎಂದು ಗುರುತಿಸಬೇಕು: ಉತ್ತರ ಕೊರಿಯಾ

ಸಿಯೋಲ್: ಐದನೇ ಮತ್ತು ಅತಿ ದೊಡ್ಡ ಪರಮಾಣು ಪರೀಕ್ಷೆ ನಡೆಸಿರುವ ಉತ್ತರ ಕೊರಿಯಾ, ಅಮೆರಿಕಾ ದೇಶ ನಮ್ಮನ್ನು 'ಅಧಿಕೃತ ಪರಮಾಣು ಶಸ್ತ್ರಾಸ್ತ್ರ ರಾಷ್ಟ್ರ' ಎಂದು ಗುರುತಿಸಬೇಕೆಂದು ಭಾನುವಾರ ಆಗ್ರಹಿಸಿದೆ. 

"(ಅಮೇರಿಕ ಅಧ್ಯಕ್ಷ ಬರಾಕ್) ಒಬಾಮಾ, ಡಿ ಪಿ ಆರ್ ಕೆ (ಉತ್ತರ ಕೊರಿಯಾ) ಅಧಿಕೃತ ಪರಮಾಣು ಶಸ್ತ್ರಾಸ್ತ್ರ ರಾಷ್ಟ್ರವಾಗಿ, ಕುಶಲತೆಯಲ್ಲಿ ಉತ್ತಮ ಸ್ಥಾನದಲ್ಲಿದೆ ಎಂಬುದನ್ನು ಅಲ್ಲಗೆಳೆಯಲು ಕಷ್ಟ ಪಡುತ್ತಿದ್ದಾರೆ ಆದರೆ ಇದು ಅಂಗೈ ಅಡ್ಡ ಹಿಡಿದು ಸೂರ್ಯ ಇಲ್ಲ ಎಂದು ಹೇಳುವಷ್ಟು ಮೂರ್ಖತನ" ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಹೇಳಿರುವುದಾಗಿ ಕೆ ಎನ್ ಸಿ ಎ ನ್ಯೂಸ್ ಏಜೆನ್ಸಿ ವರದಿ ಮಾಡಿದೆ. 

ವಿಶ್ವದಾದ್ಯಂತ ವ್ಯಾಪಕ ಟೀಕೆಗೆ ಒಳಗಾಗಿರುವ ಪರಮಾಣು ಪರೀಕ್ಷೆಯನ್ನು ಸಮರ್ಥಿಸಿಕೊಂಡಿರುವ ವಕ್ತಾರ, ಅಮೆರಿಕಾ ಪರಮಾಣು ಬೆದರಿಕೆಗೆ ಇದು ನಮ್ಮ ಪ್ರತಿಕ್ರಿಯೆ ಎಂದು ಹೇಳಿರುವುದಾಗಿ ಮಾಧ್ಯಮ ವರದಿ ಮಾಡಿದೆ. 

'ಗುಣಮಟ್ಟ ಮತ್ತು ಸಂಖ್ಯೆಯಲ್ಲಿ' ಉತ್ತರ ಕೊರಿಯಾ ಪರಮಾಣು ಶಸ್ತ್ರಾಸ್ತ್ರಗಳನ್ನು ವೃದ್ಧಿಸಿಕೊಳ್ಳಲಿದೆ ಎಂದು ಹೇಳಿಕೆ ತಿಳಿಸಿದೆ.