ಒಂದೇ ಡೋಸ್: ಕೋತಿಗೆ ತಗುಲಿದ್ದ ಕೋವಿಡ್ ಸೋಂಕು ನಿವಾರಿಸಿದ ಜೆ&ಜೆ ಸಂಸ್ಥೆಯ ಲಸಿಕೆ!

ನ್ಯೂಯಾರ್ಕ್: ಕೋವಿಡ್-19 ನಿವಾರಣೆಗೆ ಜಾಗತಿಕ ಹೆಲ್ತ್ ಕೇರ್ ಸಂಸ್ಥೆ ಜಾನ್ಸನ್&ಜಾನ್ಸನ್ ತಯಾರಿಸಿರುವ ಲಸಿಕೆ ಜಗತ್ತಿನ ಗಮನ ಸೆಳೆಯುತ್ತಿದೆ. 

ಸಂಸ್ಥೆ ತಯಾರಿಸಿರುವ ಲಸಿಕೆಯನ್ನು ಸಾರ್ಸ್-ಸಿಒವಿ-2 ಸೋಂಕು ತಗುಲಿರುವ ಕೋತಿಗಳ ಮೇಲೆ ಪ್ರಯೋಗಿಸಲಾಗಿದ್ದು ಒಂದೇ ಡೋಸ್ ಗೆ ದೃಢವಾದ ರಕ್ಷಣೆ ನೀಡಿದ್ದು ಸೋಂಕು ಗುಣಮುಖವಾಗುತ್ತಿರುವ ಲಕ್ಷಣಗಳು ಗೋಚರಿಸಿವೆ ಎಂದು ತಿಳಿದುಬಂದಿದೆ. 

ರೀಸಸ್ ಮಕಾಕ್ ಗಳಿಗೆ ಈ ಲಸಿಕೆ ಹಾಕಲಾಗಿದ್ದು, ಅದನ್ನೇ ಈಗ ಮಾನವರಿಗೂ ಹಾಕುವುದರ ಬಗ್ಗೆ ಚಿಂತನೆ ನಡೆಸಲಾಗುತ್ತಿದೆ ಎಂದು ಅಧ್ಯಯನದಲ್ಲಿ ತೊಡಗಿದ್ದ ಸಂಶೋಧಕ ಯುಎಸ್ ನಲ್ಲಿರುವ ಬೆತ್ ಇಸ್ರೇಲ್ ಡಿಕಾನೆಸ್ ಮೆಡಿಕಲ್ ಸೆಂಟರ್ (ಬಿಐಡಿಎಂಸಿ) ನ ಡಾನ್ ಎಚ್. ಬರೂಚ್ ಹೇಳಿದ್ದಾರೆ. 

ಅಡೆನೊವೈರಸ್ ಸಿರೊಟೈಪ್ 26 (ಆಡ್ 26) ಎಂಬ ಸಾಮಾನ್ಯ ಶೀತದ ವೈರಾಣು ವನ್ನು ಸಾರ್ಸ್-ಸಿಒವಿ-2 ಸ್ಪೈಕ್ ಪ್ರೊಟೀನ್ ನ್ನು ಹೋಸ್ಟ್ ಸೆಲ್ ಗಳಿಗೆ ರವಾನಿಸುತ್ತದೆ. ಇದರಿಂದಾಗಿ ಕೊರೋನಾ ವಿರುದ್ಧದ ರೋಗನಿರೋಧಕ ವ್ಯವಸ್ಥೆ ಹೆಚ್ಚಾಗಲಿದೆ ಎಂದು ತಿಳಿದುಬಂದಿದೆ. 

ಜನವರಿ ತಿಂಗಳಲ್ಲಿ ಚೀನಾ ಸಾರ್ಸ್-ಸಿಒವಿ-2 ಜಿನೋಮ್ ನ್ನು ಬಿಡುಗಡೆ ಮಾಡಿದಾಗಿನಿಂದಲೂ ಡಾನ್ ಎಚ್. ಬರೂಚ್ ಕೋವಿಡ್-19 ಲಸಿಕೆ ಅಭಿವೃದ್ಧಿಪಡಿಸುವುದರಲ್ಲಿ ಮಗ್ನರಾಗಿದ್ದರು.