ಉಕ್ರೇನ್‌: ಡ್ರೋನ್ ದಾಳಿಯಲ್ಲಿ 23 ವರ್ಷದ ಭಾರತೀಯ ಸಾವು

ನವದೆಹಲಿ: ಕೆಲ ಭಾರತೀಯರು ರಷ್ಯಾದ ಸೇನೆಯಲ್ಲಿ ಸಹಾಯಕ ಉದ್ಯೋಗಗಳಿಗೆ ಸಹಿ ಹಾಕಿದ್ದಾರೆ ಎಂದು ಭಾರತ ಅಧಿಕೃತವಾಗಿ ಒಪ್ಪಿಕೊಂಡ ಎರಡು ದಿನಗಳಲ್ಲೇ ಇದೀಗ ಉಕ್ರೇನ್‌ನಲ್ಲಿ ಡ್ರೋನ್ ದಾಳಿಯಲ್ಲಿ 23 ವರ್ಷದ ಭಾರತೀಯ ಸಾವನ್ನಪ್ಪಿದ್ದಾನೆ ಎಂದು ವರದಿಯಾಗಿದೆ.

ವರದಿಗಳ ಪ್ರಕಾರ, ಫೆಬ್ರವರಿ 21 ರಂದು ರಷ್ಯಾದ ಗಡಿಯ ಸಮೀಪವಿರುವ ಡೊನೆಟ್ಸ್ಕ್‌ನಲ್ಲಿ ಡ್ರೋನ್ ದಾಳಿಯಲ್ಲಿ ಸೂರತ್‌ ಮೂಲದ 23 ವರ್ಷದ ಗುಜರಾತಿ ನಿವಾಸಿ ಕೊಲ್ಲಲ್ಪಟ್ಟಿದ್ದಾರೆ ಎಂದು ತಿಳಿದುಬಂದಿದೆ. ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (MEA) ಇದುವರೆಗೆ ಈ ಘಟನೆಯ ಬಗ್ಗೆ ಪ್ರತಿಕ್ರಿಯೆ ನೀಡಿಲ್ಲ. ಆದಾಗ್ಯೂ, ಎರಡು ದಿನಗಳ ಹಿಂದೆ, ವಿದೇಶಾಂಗ ಇಲಾಖೆ ಭಾರತೀಯರ ನೇಮಕಾತಿಗಳ ಬಗ್ಗೆ ತಿಳಿದಿದೆ ಎಂದು ಒಪ್ಪಿಕೊಂಡಿದೆ.

ರಷ್ಯಾ ಸೇನೆಗೆ ಭಾರತೀಯರ ನೇಮಕಾತಿ

ಕಳೆದ ವರ್ಷದಲ್ಲಿ ರಷ್ಯಾದ ಸೇನೆಯು 100 ಭಾರತೀಯರ ಭದ್ರತಾ ಸಹಾಯಕರನ್ನು ನೇಮಿಸಿಕೊಂಡಿದೆ ಎಂದು ವರದಿಯಾಗಿದೆ. ಈ ಬಗ್ಗೆ ಮಾಹಿತಿ ನೀಡಿರುವ MEA ವಕ್ತಾರ ರಣಧೀರ್ ಜೈಸ್ವಾಲ್, "ಕೆಲವು ಭಾರತೀಯ ಪ್ರಜೆಗಳು ರಷ್ಯಾದ ಸೈನ್ಯದೊಂದಿಗೆ ಬೆಂಬಲ ಉದ್ಯೋಗಗಳಿಗೆ ಸಹಿ ಹಾಕಿದ್ದಾರೆ ಎಂದು ನಮಗೆ ತಿಳಿದಿದೆ. ಭಾರತೀಯ ರಾಯಭಾರ ಕಚೇರಿಯು ಈ ವಿಷಯವನ್ನು ರಷ್ಯಾದ ಸಂಬಂಧಿತ ಅಧಿಕಾರಿಗಳೊಂದಿಗೆ ನಿಯತಕಾಲಿಕವಾಗಿ ಅವರ ಆರಂಭಿಕ ಬಿಡುಗಡೆಗಾಗಿ ತೆಗೆದುಕೊಂಡಿದೆ. ಜೊತೆಗೆ, ಭಾರತವು ತನ್ನ ಪ್ರಜೆಗಳಿಗೆ ಸರಿಯಾದ ಎಚ್ಚರಿಕೆಯನ್ನು ವಹಿಸುವಂತೆ ಮತ್ತು ಈ ಸಂಘರ್ಷದಿಂದ ದೂರವಿರಲು ಒತ್ತಾಯಿಸಿದೆ ಎಂದು ಹೇಳಿದರು.

ನೇಮಕಾತಿ ಬಳಿಕ ವಂಚನೆ ಆರೋಪ

ಇನ್ನು ಹೀಗೆ ಸೇನೆಗೆ ನೇಮಕಗೊಂಡವರಲ್ಲಿ ಹಲವರು ತಮಗೆ ಅನ್ಯಾಯವಾಗಿದೆ ಎಂದು ಆರೋಪಿಸಿದ್ದಾರೆ. ವರದಿಯ ಪ್ರಕಾರ, ಈ ಭಾರತೀಯ ಪ್ರಜೆಗಳಲ್ಲಿ ಅನೇಕರ ಸಂಬಂಧಿಕರು ರಷ್ಯಾದಲ್ಲಿ ವಿದೇಶಿ ನೇಮಕಾತಿದಾರರು ತಮ್ಮ ಕುಟುಂಬ ಸದಸ್ಯರನ್ನು ವಂಚಿಸಿದ್ದಾರೆ ಮತ್ತು ವ್ಯಾಗ್ನರ್ ಗ್ರೂಪ್ (ಖಾಸಗಿ ಮಿಲಿಟರಿ ಕಂಪನಿ) ಗೆ ಸೇರಲು ಬಲವಂತಪಡಿಸಿದ್ದಾರೆ ಎಂದು ಆರೋಪಿಸಿದ್ದಾರೆ.

ವ್ಯಾಗ್ನರ್ ಗ್ರೂಪ್, PMC ವ್ಯಾಗ್ನರ್ ಎಂದು ಕರೆಯಲ್ಪಡುತ್ತದೆ, ಇದು ರಷ್ಯಾದ ಅಧ್ಯಕ್ಷ ಪುಟಿನ್ ಅವರ ನಿಕಟ ಮಿತ್ರರಾದ ಯೆವ್ಗೆನಿ ಪ್ರಿಗೊಝಿನ್ರಿಂದ ನಿಯಂತ್ರಿಸಲ್ಪಟ್ಟ ರಷ್ಯಾದ ರಾಜ್ಯ-ಧನಸಹಾಯದ ಸೈನ್ಯವಾಗಿದೆ. ಯೆವ್ಗೆನಿ ಪ್ರಿಗೊಜಿನ್ ಕಳೆದ ವರ್ಷ ವಿಮಾನ ಅಪಘಾತದಲ್ಲಿ ಸಾವನ್ನಪ್ಪಿದ್ದರು. ಈ ಪಡೆಗಳು ರಷ್ಯಾದ ಸೈನ್ಯದಿಂದ ಮೂಲಸೌಕರ್ಯ ಬೆಂಬಲವನ್ನು ಹೊಂದಿವೆ ಮತ್ತು ರಷ್ಯಾ ಮತ್ತು ಉಕ್ರೇನ್ ನಡುವೆ ನಡೆಯುತ್ತಿರುವಂತಹ ಸಂಘರ್ಷಗಳಲ್ಲಿ ಹೋರಾಡಲು ಸೈನಿಕರನ್ನು ಕಳುಹಿಸಲಾಗುತ್ತದೆ.

ಫೆಬ್ರವರಿ 24, 2022 ರಂದು ರಷ್ಯಾ ಉಕ್ರೇನ್ ಮೇಲೆ ಆಕ್ರಮಣ ಮಾಡಿತು. ಉಕ್ರೇನ್‌ನಲ್ಲಿನ ರಷ್ಯಾದ ಯುದ್ಧವು ಭಯಾನಕ ಮಾನವ ನಷ್ಟ ಉಂಟುಮಾಡಿದೆ ಮತ್ತು ಲಕ್ಷಾಂತರ ಜನರಿಗೆ ನೋವನ್ನುಂಟುಮಾಡಿದೆ ಎಂದು ವಿಶ್ವಸಂಸ್ಥೆಯ ಹಕ್ಕುಗಳ ಮುಖ್ಯಸ್ಥರು ಫೆಬ್ರವರಿ 22 ರಂದು ಆಕ್ರಮಣದ ಎರಡನೇ ವಾರ್ಷಿಕೋತ್ಸವದ ಮೊದಲು ಹೇಳಿದರು.