ವಿಮಾನ ಲ್ಯಾಂಡ್ ಆಗುತ್ತಿದ್ದಂತೆಯೇ ಭಾರತೀಯ ಮೂಲದ ಡೆಲ್ಟಾ ಏರ್ ಲೈನ್ಸ್ ಪೈಲಟ್ ಬಂಧನ!

ಮಿನ್ನಿಯಾಪೋಲಿಸ್: ಭಾನುವಾರ ಬೆಳಿಗ್ಗೆ 7:05 IST ಸುಮಾರಿಗೆ ಸ್ಯಾನ್ ಫ್ರಾನ್ಸಿಸ್ಕೋ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಡೆಲ್ಟಾ ಏರ್‌ಲೈನ್ಸ್‌ನ ಸಹ-ಪೈಲಟ್‌ ಓರ್ವನನ್ನು ವಿಮಾನ ಲ್ಯಾಂಡ್ ಆದ 10 ನಿಮಿಷಗಳ ನಂತರ ಬಂಧಿಸಲಾಗಿದೆ.

ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯದ ಆರೋಪದ ಮೇಲೆ 34 ವರ್ಷದ ರುಸ್ತಮ್ ಭಾಗ್ವಾಗರ್ ಅವರನ್ನು ವಶಕ್ಕೆ ಪಡೆಯಲಾಗಿದೆ.

ಡೆಲ್ಟಾ ಫ್ಲೈಟ್ 2809, ಬೋಯಿಂಗ್ 757-300, ಅಮೆರಿಕದ ಮಿನ್ನಿಯಾ ಪೋಲಿಸ್‌ನಿಂದ ಬಂದ ಸ್ವಲ್ಪ ಸಮಯದ ನಂತರ ಕಾಂಟ್ರಾ ಕೋಸ್ಟಾ ಕೌಂಟಿ ಶೆರಿಫ್ ಇಲಾಖೆಯ ಅಧಿಕಾರಿಗಳು ಮತ್ತು ಹೋಮ್‌ಲ್ಯಾಂಡ್ ಸೆಕ್ಯುರಿಟಿ ಇನ್ವೆಸ್ಟಿಗೇಷನ್ಸ್‌ನ ಏಜೆಂಟ್ ಗಳು ಕಾಕ್‌ಪಿಟ್‌ಗೆ ನುಗ್ಗಿ ಪ್ರಯಾಣಿಕರು ಇನ್ನೂ ಇಳಿಯಲು ತಯಾರಿ ನಡೆಸುತ್ತಿರುವಾಗ ಪೈಲಟ್ ನ್ನು ಬಂಧಿಸಿದ್ದಾರೆ ಎಂದು USA ಟುಡೇ ವರದಿ ಪ್ರಕಟಿಸಿದೆ.

ಗೇಟ್‌ನಲ್ಲಿ ನಿಲ್ಲಿಸಿದ ತಕ್ಷಣ ಕನಿಷ್ಠ 10 DHS ಏಜೆಂಟರು ವಿಮಾನವನ್ನು ಹತ್ತಿದರು ಮತ್ತು ಪೈಲಟ್ ನ್ನು ವಶಕ್ಕೆ ಪಡೆದರು ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದಾರೆ.

ಭಾಗ್ವಾಗರ್ ಅವರ ಸಹ ಪೈಲಟ್ ಈ ಬೆಳವಣಿಗೆಯಿಂದಾಗಿ ಆಶ್ಚರ್ಯಚಕಿತರಾದರು ಮತ್ತು ಅವರ ಬಂಧನದ ಬಗ್ಗೆ ಅವರಿಗೆ ಯಾವುದೇ ಮಾಹಿತಿ ಇರಲಿಲ್ಲ ಎಂದು ಹೇಳಿದ್ದಾರೆ. ಭಾಗ್ವಾಗರ್ ಅವರಿಗೆ ಸಹ ಪೈಲಟ್ ಮಾಹಿತಿ ನೀಡಬಹುದೆಂಬ ಶಂಕೆಯಿಂದಾಗಿ ಅವರಿಗೆ ಬಂಧನದ ಬಗ್ಗೆ ಮೊದಲೇ ತಿಳಿಸಲಾಗಿರಲಿಲ್ಲ. ತಪ್ಪಿಸಿಕೊಳ್ಳಲು ಯಾವುದೇ ಅವಕಾಶವಿಲ್ಲದೆಂತೆ ಅವರನ್ನು ಬಂಧಿಸಲು ಏಜೆಂಟರು ಬಯಸಿದ್ದರು.

ಕಾಂಟ್ರಾ ಕೋಸ್ಟಾ ಶೆರಿಫ್ ಅವರ ಫೇಸ್‌ಬುಕ್ ಪೋಸ್ಟ್ ಪ್ರಕಾರ, ಮಗುವಿನ ವಿರುದ್ಧ ಲೈಂಗಿಕ ಅಪರಾಧಗಳ ವರದಿಯನ್ನು ಸ್ವೀಕರಿಸಿದ ನಂತರ ಪತ್ತೆದಾರರು ಏಪ್ರಿಲ್ 2025 ರಿಂದ ತನಿಖೆ ನಡೆಸುತ್ತಿದ್ದಾರೆ. ನಂತರ ಶಂಕಿತನ ವಿರುದ್ಧ ಬಂಧನ ವಾರಂಟ್ ಪಡೆಯಲಾಗಿತ್ತು.

ಏಪ್ರಿಲ್‌ನಲ್ಲಿ 10 ವರ್ಷದೊಳಗಿನ ಮಗುವಿನೊಂದಿಗೆ ಸಂಭೋಗವನ್ನು ಒಳಗೊಂಡ ಪ್ರಕರಣದಲ್ಲಿ ಭಾಗ್ವಾಗರ್ ಅವರನ್ನು ಶಂಕಿತ ಎಂದು ಗುರುತಿಸಿದ ನಂತರ ಅವರ ಬಂಧನವಾಗಿದೆ.

ಸಿಬಿಎಸ್ ನ್ಯೂಸ್ ಪಡೆದ ಹೇಳಿಕೆಯಲ್ಲಿ ಡೆಲ್ಟಾ ಏರ್‌ಲೈನ್ಸ್, "ಡೆಲ್ಟಾ ಕಾನೂನುಬಾಹಿರ ನಡವಳಿಕೆಯನ್ನು ಸಹಿಸುವುದಿಲ್ಲ ಮತ್ತು ಕಾನೂನು ಜಾರಿ ಸಂಸ್ಥೆಗಳೊಂದಿಗೆ ಸಂಪೂರ್ಣವಾಗಿ ಸಹಕರಿಸುತ್ತದೆ" ಎಂದು ಹೇಳಿದೆ, "ಬಂಧನಕ್ಕೆ ಸಂಬಂಧಿಸಿದ ಆರೋಪಗಳ ವರದಿಗಳಿಂದ ನಾವು ದಿಗ್ಭ್ರಮೆಗೊಂಡಿದ್ದೇವೆ ಮತ್ತು ಪ್ರಶ್ನಾರ್ಹ ವ್ಯಕ್ತಿಯನ್ನು ತನಿಖೆಯವರೆಗೆ ಅಮಾನತುಗೊಳಿಸಲಾಗಿದೆ."