6,100 ಕೋಟಿಯ 41 ಧ್ರುವ ಹೆಲಿಕಾಪ್ಟರ್ ನಿರ್ಮಾಣದ ಗುತ್ತಿಗೆ ಪಡೆದ ಎಚ್ಎಎಲ್

ಬೆಂಗಳೂರು: ಹಿಂದೂಸ್ಥಾನ್ ಏರೋನಾಟಿಕ್ಸ್ ಲಿಮಿಟೆಡ್ (ಎಚ್ ಎಎಲ್) ಭಾರತೀಯ ಸೇನೆ ಮತ್ತು ನೌಕಾ ಪಡೆಗಾಗಿ 6,100ಕೋಟಿ ರುಪಾಯಿ ಮೊತ್ತದ ಅತ್ಯಾಧುನಿಕ ಲಘು ಹೆಲಿಕಾಪ್ಟರ್(ಎಎಲ್​ಎಚ್ ಧ್ರುವ)ಗಳನ್ನು ನಿರ್ಮಿಸುವ ಮತ್ತೊಂದು ಗುತ್ತಿಗೆಯನ್ನು ಪಡೆದುಕೊಂಡಿದೆ.

ಮುಂದಿನ 60 ತಿಂಗಳಲ್ಲಿ 41 ಧ್ರುವ ಹೆಲಿಕಾಪ್ಟರ್ ಗಳನ್ನು ನಿರ್ಮಿಸಲಾಗುತ್ತಿದ್ದು, ಕೇಂದ್ರ ಸರ್ಕಾರದ ಈ ಹೊಸ ಆದೇಶದಿಂದ ಎಚ್ಎಎಲ್ ಸಾಮರ್ಥ್ಯದ ಮೇಲಿನ ವಿಶ್ವಾಸ ಹೆಚ್ಚಿದೆ ಮತ್ತು ಮೇಕ್ ಇನ್ ಇಂಡಿಯಾ ಅಭಿಯಾನಕ್ಕೆ ಪ್ರೋತ್ಸಾಹ ನೀಡಿದಂತಾಗಿದೆ ಎಂದು ಎಚ್ಎಎಲ್ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಟಿ ಸುವರ್ಣ ರಾಜು ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಈ ಸಂಬಂಧ ಕಳೆದ ಮಾರ್ಚ್ ನಲ್ಲಿ ಭಾರತೀಯ ರಕ್ಷಣಾ ಸಚಿವಾಲಯ ಹಾಗೂ ಹಿಂದುಸ್ತಾನ್ ಏರೋನಾಟಿಕ್ಸ್ ಸಂಸ್ಥೆಯ ನಡುವೆ ಒಪ್ಪಂದವಾಗಿತ್ತು. ಎಚ್​ಎಎಲ್​ನಿಂದ ನಿರ್ವಿುಸಲಾದ ಒಟ್ಟು 32 ಧ್ರುವ ಹೆಲಿಕಾಪ್ಟರ್​ಗಳಿಗೆ 5 ವರ್ಷ ಕಾರ್ಯಕ್ಷಮತೆ ಆಧಾರದ ಲಾಜಿಸ್ಟಿಕ್ ಸೇವೆಗಳನ್ನು (ಪಿಬಿಎಲ್) ಒದಗಿಸಲಿದೆ. ಭಾರತೀಯ ಕರಾವಳಿ ರಕ್ಷಣಾ ಪಡೆ ಹಾಗೂ ಭಾರತೀಯ ನೌಕಾಪಡೆಗೆ ತಲಾ 16 ಹೆಲಿಕಾಪ್ಟರ್​ಗಳಾಗಿ ವಿಭಾಗಿಸಲಾಗಿದೆ.