ಅದಾನಿ ಸಾಮ್ರಾಜ್ಯವನ್ನು ಹಿಂದಿಕ್ಕಿದ ಬೈಟ್‌ಡ್ಯಾನ್ಸ್ ಒಡೆಯ: ₹8.7 ಲಕ್ಷ ಕೋಟಿ ಆಸ್ತಿಯೊಂದಿಗೆ ಜಾಂಗ್ ಯಿಮಿಂಗ್ ಏಷ್ಯಾದ ನಂ.1 ಶ್ರೀಮಂತ!

Asia's Richest Person: ವೇಗದ ತಂತ್ರಜ್ಞಾನ ಲೋಕದಲ್ಲಿ ನಂ.1 ಕುಬೇರನ ಸ್ಥಾನಕ್ಕಾಗಿ ಶ್ರೀಮಂತರ ನಡುವೆಯೇ ಭಾರೀ ಪೈಪೋಟಿ ನಡೆಯುತ್ತಿದ್ದು, ಇದೀಗ ಟಿಕ್‌ಟಾಕ್ ಸಂಸ್ಥಾಪಕ ಜಾಂಗ್ ಯಿಮಿಂಗ್ ಅವರು ಭಾರತದ ಪ್ರಮುಖ ಉದ್ಯಮಿ ಗೌತಮ್ ಅದಾನಿಯನ್ನು ಹಿಂದಿಕ್ಕಿ ಏಷ್ಯಾದ ಅತ್ಯಂತ ಶ್ರೀಮಂತ ವ್ಯಕ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಬ್ಲೂಮ್‌ಬರ್ಗ್ ವರದಿಯ ಪ್ರಕಾರ, ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದ ತ್ವರಿತ ವಿಸ್ತರಣೆಯು ಜಾಂಗ್ ಅವರ ಟೆಕ್ ಸಾಮ್ರಾಜ್ಯದ ಮೌಲ್ಯವನ್ನು ಹೆಚ್ಚಿಸಿದ್ದು, ಅವರ ಒಟ್ಟು ಸಂಪತ್ತು ಬರೋಬ್ಬರಿ 105 ಬಿಲಿಯನ್ ಡಾಲರ್ ಗಡಿ ದಾಟಿದೆ. ಆ ಕುರಿತ ವರದಿ ಇಲ್ಲಿದೆ:

₹8.7 ಲಕ್ಷ ಕೋಟಿಗೂ ಅಧಿಕ ಆಸ್ತಿ!

ಬ್ಲೂಮ್‌ಬರ್ಗ್ ಬಿಲಿಯನೇರ್ಸ್ ಇಂಡೆಕ್ಸ್ ಇತ್ತೀಚೆಗೆ ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ, ಜನಪ್ರಿಯ ಸೋಶಿಯಲ್ ಮೀಡಿಯಾ ಆ್ಯಪ್ ಟಿಕ್‌ಟಾಕ್‌ನ ಮಾತೃಸಂಸ್ಥೆಯಾದ ಬೈಟ್‌ಡ್ಯಾನ್ಸ್ ಸಂಸ್ಥಾಪಕ 43 ವರ್ಷದ ಜಾಂಗ್ ಯಿಮಿಂಗ್ ಅವರ ಒಟ್ಟು ಆಸ್ತಿ ಮೌಲ್ಯ 105 ಬಿಲಿಯನ್ ಡಾಲರ್ (ಸುಮಾರು ₹8.7 ಲಕ್ಷ ಕೋಟಿಗೂ ಅಧಿಕ) ದಾಟಿದೆ. ಮತ್ತೊಂದೆಡೆ, ಜೂನ್ ತಿಂಗಳಲ್ಲಿ ಗೌತಮ್ ಅದಾನಿ ಅವರ ಆಸ್ತಿ ಮೌಲ್ಯ 120 ಬಿಲಿಯನ್ ಡಾಲರ್ ತಲುಪಿತ್ತಾದರೂ, ಇತ್ತೀಚಿನ ದಿನಗಳಲ್ಲಿ ಎಂಎಸ್‌ಸಿಐ ಸೂಚ್ಯಂಕದಲ್ಲಿನ ಷೇರುಗಳ ಮರುಸಂಘಟನೆ ಹಾಗೂ ಜಾಗತಿಕ ಮಾರುಕಟ್ಟೆಯ ಏರುಪೇರಿನಿಂದಾಗಿ ಅವರ ಒಟ್ಟು ಸಂಪತ್ತಿನ ಮೌಲ್ಯದಲ್ಲಿ ಇಳಿಕೆಯಾಗಿದೆ.

ಹಾಗಾದ್ರೆ, ಜಾಂಗ್ ಯಿಮಿಂಗ್ ನಂಬರ್ 1 ಪಟ್ಟಕ್ಕೇರಲು ಕಾರಣಗಳೇನು?

• AI ತಂತ್ರಜ್ಞಾನದ ಆವಿಷ್ಕಾರ: ಬೈಟ್‌ಡ್ಯಾನ್ಸ್ ಸಂಸ್ಥೆಯು ಚೀನಾದಲ್ಲಿ ಬಿಡುಗಡೆ ಮಾಡಿರುವ 'Doubao' ಎಐ ಚಾಟ್‌ಬಾಟ್ ಮತ್ತು 'Seedance' ವಿಡಿಯೋ ಜನರೇಷನ್ ಟೂಲ್ ಭಾರಿ ಯಶಸ್ಸು ಕಂಡಿವೆ.

• ಜಾಗತಿಕ ಹೂಡಿಕೆ ಮೌಲ್ಯ: ಬ್ಲ್ಯಾಕ್‌ರಾಕ್  ಮತ್ತು ಫಿಡೆಲಿಟಿಯಂತಹ ಜಾಗತಿಕ ಹೂಡಿಕೆ ಸಂಸ್ಥೆಗಳು ಬೈಟ್‌ಡ್ಯಾನ್ಸ್‌ನ ಮೌಲ್ಯಮಾಪನವನ್ನು ಇತ್ತೀಚೆಗೆ ಹೆಚ್ಚಿಸಿವೆ.

• ಅದಾನಿ ಷೇರುಗಳ ಕುಸಿತ: ತೈಲ ಬೆಲೆ ಏರಿಕೆ ಹಾಗೂ ಬಾಂಡ್ ಯೀಲ್ಡ್ ಏರಿಕೆಯಿಂದಾಗಿ ಇತ್ತೀಚಿನ ದಿನಗಳಲ್ಲಿ ಅದಾನಿ ಸಮೂಹದ ಷೇರುಗಳಲ್ಲಿ ಸ್ವಲ್ಪ ಕುಸಿತ ಕಂಡುಬಂದಿರುವುದು ಕೂಡ ಈ ಬದಲಾವಣೆಗೆ ಕಾರಣವಾಗಿದೆ.

ಮುಂದುವರೆದು, ಬ್ಲೂಮ್‌ಬರ್ಗ್ 2019 ರಲ್ಲಿ ಝಾಂಗ್ ಅವರ ಆಸ್ತಿಯನ್ನು ಟ್ರ್ಯಾಕ್ ಮಾಡಲು ಪ್ರಾರಂಭಿಸಿದಾಗ ಅದು ಕೇವಲ 13 ಬಿಲಿಯನ್ ಡಾಲರ್ ಇತ್ತು. ಆದರೆ ಬೈಟ್‌ಡ್ಯಾನ್ಸ್ ಸಂಸ್ಥೆಯ AI ತಂತ್ರಜ್ಞಾನಗಳಾದ 'Doubao' ಚಾಟ್‌ಬಾಟ್ ಮತ್ತು 'Seedance' ವಿಡಿಯೋ ಜನರೇಟರ್ ಉಪಕರಣಗಳ ಭಾರಿ ಯಶಸ್ಸು ಅವರ ಸಂಪತ್ತನ್ನು 8 ಪಟ್ಟು ಹೆಚ್ಚಾಗುವಂತೆ ಮಾಡಿದೆ.

ಏಷ್ಯಾದ ಟಾಪ್ 5 ಶ್ರೀಮಂತರು ಯಾರು ಯಾರು?

1. ಚೀನಾದ ಬೈಟ್‌ಡ್ಯಾನ್ಸ್ ಮಾಲೀಕ ಜಾಂಗ್ ಯಿಮಿಂಗ್: $105+ ಶತಕೋಟಿ

2. ಭಾರತದ ಅದಾನಿ ಗ್ರೂಪ್ ಮಾಲೀಕ ಗೌತಮ್ ಅದಾನಿ: $100 - $110 ಶತಕೋಟಿ

3. ಭಾರತದ ರಿಲಯನ್ಸ್ ಇಂಡಸ್ಟ್ರೀಸ್ ಮಾಲೀಕ ಮುಖೇಶ್ ಅಂಬಾನಿ: $90 - $100 ಶತಕೋಟಿ

4. ಚೀನಾದ ಟೆನ್ಸೆಂಟ್ ಮಾಲೀಕ ಪೋನಿ ಮಾ (ಮಾ ಹುವಾಟೆಂಗ್): $55 - $65 ಶತಕೋಟಿ

5. ಜಪಾನ್ ದೇಶದ ಯೂನಿಕ್ರೋ ಮಾಲೀಕ ತದಾಶಿ ಯಾನೈ: $50 - $55 ಶತಕೋಟಿ