ಶ್ರೀದೇವಿಯ ಚೆನ್ನೈ ಆಸ್ತಿ ವಿವಾದ: ಮದ್ರಾಸ್ ಹೈಕೋರ್ಟ್ ಮೆಟ್ಟಿಲೇರಿದ ಬೋನಿ ಕಪೂರ್ ಮತ್ತು ಮಕ್ಕಳು

ಬಾಲಿವುಡ್ ನ ಚಿತ್ರ ನಿರ್ಮಾಪಕ ಬೋನಿ ಕಪೂರ್ ಅವರು ತಮ್ಮ ಪುತ್ರಿಯರಾದ ಜಾಹ್ನವಿ ಕಪೂರ್ ಮತ್ತು ಖುಷಿ ಕಪೂರ್ ಜೊತೆಗೂಡಿ, ಚೆನ್ನೈನಲ್ಲಿ ದಿವಂಗತ ನಟಿ ಶ್ರೀದೇವಿ ಅವರಿಗೆ ಸೇರಿದ ಆಸ್ತಿಯ ಕುರಿತಾಗಿ ನಡೆಯುತ್ತಿರುವ ಕಾನೂನು ವಿವಾದಕ್ಕೆ ಸಂಬಂಧಿಸಿ ಮದ್ರಾಸ್ ಹೈಕೋರ್ಟ್‌ಗೆ ಮೊರೆ ಹೋಗಿದ್ದಾರೆ.

ಈ ಪ್ರಕರಣವು ಚೆನ್ನೈಯ ಈಸ್ಟ್ ಕೋಸ್ಟ್ ರೋಡ್ (ECR) ನಲ್ಲಿ ಇರುವ 4.7 ಏಕರೆ ಭೂಮಿಯ ಬಗ್ಗೆ ಆಗಿದ್ದು, ಇದನ್ನು ದಶಕಗಳ ಹಿಂದೆ ಶ್ರೀದೇವಿ ಖರೀದಿಸಿದ್ದರು. 2025ರಿಂದ ಈ ಆಸ್ತಿ ಕಾನೂನು ಪರಿಶೀಲನೆಯಲ್ಲಿದ್ದು, ಮೂವರು ಈ ಭೂಮಿಯ ಮೇಲೆ ಸುಳ್ಳು ಹಕ್ಕು ಹೇಳಿಕೊಂಡಿದ್ದಾರೆ ಎಂದು ಬೋನಿ ಕಪೂರ್ ಆರೋಪವಾಗಿದೆ.

ಚೆಂಗಲ್ಪಟ್ಟು ಕೆಳ ನ್ಯಾಯಾಲಯವು ಈ ವಿವಾದಿತ ಆಸ್ತಿಗೆ ಸಂಬಂಧಿಸಿದ ನಾಗರಿಕ ದಾವೆಯನ್ನು ರದ್ದುಪಡಿಸಲು ನಿರಾಕರಿಸಿದ ನಂತರ, ಕಪೂರ್ ಕುಟುಂಬ ಹೈಕೋರ್ಟ್‌ಗೆ ಮೊರೆ ಹೋದರು.

ಈ ಮೊದಲು, ತಮ್ಮ ವಿರುದ್ಧದ ಆರೋಪಗಳು ಆಧಾರರಹಿತವಾಗಿವೆ ಎಂದು ಹೇಳಿ ಪ್ರಕರಣವನ್ನು ತಳ್ಳಿಹಾಕುವಂತೆ ಕುಟುಂಬ ಮನವಿ ಮಾಡಿತ್ತು. ಆದರೆ, ಹಕ್ಕುದಾರರ ಬಗ್ಗೆ ಸ್ಪಷ್ಟತೆ ಪಡೆಯಲು ಸಂಪೂರ್ಣ ವಿಚಾರಣೆ ಅಗತ್ಯವೆಂದು ನ್ಯಾಯಾಲಯ ತೀರ್ಮಾನಿಸಿದ ಕಾರಣ, ಅವರು ಮೇಲ್ಮಟ್ಟದ ನ್ಯಾಯಾಲಯವನ್ನು ಸಂಪರ್ಕಿಸಿದರು.

ಈ ವಿವಾದವು ಮೋಸಪೂರಿತ ಹಕ್ಕುಗಳ ಆರೋಪಗಳನ್ನು ಒಳಗೊಂಡಿದೆ ಎಂದು ತಿಳಿದುಬಂದಿದೆ. ಕೆಲವರು ಸಂಶಯಾಸ್ಪದ ಕಾನೂನು ದಾಖಲೆಗಳನ್ನು ಆಧರಿಸಿ ಆಸ್ತಿಯ ಮೇಲೆ ಹಕ್ಕು ಹೇಳುತ್ತಿದ್ದಾರೆ ಎಂದು ಬೋನಿ ಕಪೂರ್ ಹಿಂದೆ ಹೇಳಿದ್ದರು.

ಆಸ್ತಿ ಆರ್ಥಿಕವಾಗಿ ಹಾಗೂ ಭಾವನಾತ್ಮಕವಾಗಿ ಮಹತ್ವದ್ದಾಗಿದ್ದು, ಹಲವು ವರ್ಷಗಳಿಂದ ಕುಟುಂಬದ ವಶದಲ್ಲಿದೆ ಮತ್ತು ಶ್ರೀದೇವಿಯವರ ಸ್ಮರಣೆಯಲ್ಲಿದೆ ಎಂದು ಕೂಡ ಹೇಳಿದ್ದರು.

ಮದ್ರಾಸ್ ಹೈಕೋರ್ಟ್ ವಿಚಾರಣೆ ಕೈಗೆತ್ತಿಕೊಂಡಿದ್ದು, ತಾತ್ಕಾಲಿಕ ಪರಿಹಾರವಾಗಿ ಕೆಳ ನ್ಯಾಯಾಲಯದ ವಿಚಾರಣೆಗೆ ತಾತ್ಕಾಲಿಕ ತಡೆ ನೀಡಿದೆ.

ನ್ಯಾಯಮೂರ್ತಿ ಟಿ.ವಿ. ತಮಿಳ್‌ಸೆಲ್ವಿ ಅವರು ಕಳೆದ ಸೋಮವಾರ ಕಪೂರ್ ಕುಟುಂಬ ಸಲ್ಲಿಸಿದ ಜಂಟಿ ನಾಗರಿಕ ಪರಿಷ್ಕರಣೆ ಅರ್ಜಿಯನ್ನು ಮಾರ್ಚ್ 26ರಂದು ವಿಚಾರಣೆಗೆ ಸ್ವೀಕರಿಸಲು ತೀರ್ಮಾನಿಸಿ, ಅಷ್ಟರವರೆಗೆ ಜಿಲ್ಲಾ ನ್ಯಾಯಾಲಯದ ಎಲ್ಲಾ ಪ್ರಕ್ರಿಯೆಗಳನ್ನು ಸ್ಥಗಿತಗೊಳಿಸಿದರು.

ಈ ಪ್ರಕರಣವು ಚಂದ್ರಬಾನು ಎಂಬ ಮಹಿಳೆ ಮತ್ತು ಅವರ ಇಬ್ಬರು ಮಕ್ಕಳು ಎಂ.ಸಿ. ಶಿವಕಾಮಿ ಹಾಗೂ ಎಂ.ಸಿ. ನಟರಾಜನ್ ಅವರು ಈ ಆಸ್ತಿಯಲ್ಲಿ ತಮ್ಮ ಪಾಲು ಇದೆ ಎಂದು ಹೇಳಿ ದಾವೆ ಹೂಡಿದಾಗ ವಿವಾದ ಆರಂಭವಾಯಿತು.

ಆದರೆ, ಚಂದ್ರಬಾನು ಅವರು ಈ ಆಸ್ತಿಯ ನಿಜವಾದ ಮಾಲೀಕರಾದ ಎಂ.ಸಿ. ಚಂದ್ರಶೇಖರನ್ ಅವರೊಂದಿಗೆ, ಅವರ ಮೊದಲ ಪತ್ನಿ ಇರುವಾಗಲೇ ಮತ್ತೊಂದು ಮದುವೆಯಾಗಿದ್ದರು ಎಂದು ಕಪೂರ್ ಕುಟುಂಬ ಆರೋಪಿಸಿದೆ. ಹಾಗಾಗಿ, ದ್ವಿವಿವಾಹವನ್ನು ಕಾನೂನು ಅನುಮತಿಸದ ಹಿನ್ನೆಲೆ, ಈ ಮದುವೆಯನ್ನು ಅಮಾನ್ಯವೆಂದು ಪರಿಗಣಿಸಬೇಕು ಎಂದು ಅವರು ಹೇಳಿದ್ದಾರೆ.

ಇದಲ್ಲದೆ, ಈ ಪ್ರಕರಣದ ಮೂವರು ಅರ್ಜಿದಾರರು ತಮ್ಮ ವಂಶವೃಕ್ಷದಲ್ಲಿ ಈ ವಿಷಯವನ್ನು ಬಹಿರಂಗಪಡಿಸಿಲ್ಲ ಎಂದು ಕಪೂರ್ ಕುಟುಂಬ ಆರೋಪಿಸಿದೆ.

ಇಂತಹ ಪ್ರಮುಖ ಹಾಗೂ ಕಾನೂನುಪರ ವಿಷಯವನ್ನು ಮರೆಮಾಡಿರುವುದು ನ್ಯಾಯಾಲಯವನ್ನು ತಪ್ಪು ದಾರಿಗೆಳೆವ ಉದ್ದೇಶಿತ ಪ್ರಯತ್ನವಾಗಿದ್ದು, ಇದು ಮೋಸಕ್ಕೆ ಸಮಾನವಾಗಿದೆ. ಇದರಿಂದ ಅವರ ಹಕ್ಕಿನ ಆಧಾರವೇ ದುರ್ಬಲವಾಗುತ್ತದೆ. ಮೂರನೇ ಪ್ರತಿವಾದಿ (ಚಂದ್ರಬಾನು) ಅವರಿಗೆ 1975 ಫೆಬ್ರವರಿ 5ರಂದು ನಡೆದ ಮದುವೆ, ಚಂದ್ರಶೇಖರನ್ ಅವರ ಮೊದಲ ಹಾಗೂ ಕಾನೂನುಬದ್ಧ ವಿವಾಹದ ಅವಧಿಯಲ್ಲೇ ನಡೆದಿತ್ತು ಎಂಬುದು ಸಂಪೂರ್ಣ ತಿಳಿದಿತ್ತು ಎಂದು ಕಪೂರ್ ಕುಟುಂಬ ವಾದಿಸಿದೆ.