ಸಿಕ್ಕಳೋ ಸಿಕ್ಕಳಪ್ಪ ಮುಂಗಾರು ಹುಡುಗಿ-ಬೆಡಗಿ

ಬೆಂಗಳೂರು: ಮುಂಗಾರು ಮಳೆ-೨ ಕ್ಕೆ ನಡೆಯುತ್ತಿದ್ದ ನಾಯಕ ನಟಿಯ ಶೋಧಕ್ಕೆ ಅಂತ್ಯ ಕಾಣಿಸಿದ್ದಾರೆ ನಿರ್ದೇಶಕ ಶಶಾಂಕ್. ಈಗಾಗಲೇ ಗಣೇಶ್ ಮತ್ತು ರವಿಚಂದ್ರನ್ ಅವರನ್ನು ಅಂತಿಮಗೊಳಿಸಿದ್ದ ನಿರ್ದೇಶಕ ಈಗ ಹೊಸ ಮುಖ ನೇಹಾ ಶೆಟ್ಟಿ ಅವರನ್ನು ನಾಯಕ ನಟಿಯಾಗಿ ಆಯ್ಕೆ ಮಾಡಿದ್ದಾರೆ.

"ನೇಹಾ ಶೆಟ್ಟಿ ನೂತನ ಮುಂಗಾರು ಮಳೆ ಹುಡುಗಿ. ಅವಳು ಕನ್ನಡತಿ ಮತ್ತು ಮಿಸ್ ಮಂಗಳೂರು ಹಾಗೂ ಮಿಸ್ ದಕ್ಷಿಣ ಭಾರತ ಸ್ಪರ್ಧೆಯಲ್ಲಿ ಎರಡನೆ ಸ್ಥಾನದಲ್ಲಿದ್ದವಳು" ಎಂದು ನಿರ್ದೇಶಕ ಶಶಾಂಕ್ ತಿಳಿಸಿದ್ದಾರೆ.

ಫೆಬ್ರವರಿ ತಿಂಗಳಲ್ಲಿ ದಿನಪತ್ರಿಕೆಯೊಂದರಲ್ಲಿ ನೇಹಾ ಅವರ ಫೋಟೋ ನೋಡಿದ್ದರಂತೆ ಶಶಾಂಕ್. ಆದರೆ ನೇಹಾ ಅವರಿಗೆ ಪಿಯುಸಿ ಪರೀಕ್ಷೆ ಇದ್ದದ್ದರಿಂದ ಹಾಗು ಸಿನೆಮಾ ಚಿತ್ರೀಕರಣ ಕೂಡ ಮುಂದೆ ಹೋದದ್ದರಿಂದ ಈಗ ಒಟ್ಟಿಗೆ ಕಾಲ ಕೂಡಿಬಂದಿದೆಯಂತೆ.

ರವಿಶಂಕರ್ ಮತ್ತು ಸಾಧುಕೋಕಿಲಾ ಕೂಡ ನಟಿಸುತ್ತಿರುವ ಈ ಸಿನೆಮಾದ ಚಿತ್ರೀಕರಣ ಜುಲೈ ೨೮ರಿಂದ ಪ್ರಾರಂಭವಾಗಲಿದೆ.