ನವದೆಹಲಿ: ಸೂಪರ್ ಸ್ಟಾರ್ ರಜನಿಕಾಂತ್ ಎರಡನೇ ಪುತ್ರಿ ಸೌಂದರ್ಯ ಫೆಬ್ರವರಿಯಲ್ಲಿ ವಿವಾಹವಾಗಲಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ಸೌಂದರ್ಯ ನಟ, ಉದ್ಯಮಿ ವಿಶಾಖನ್ ವನಂಗಮುಡಿ ಜೊತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಹೀಗಾಗಿ ಫೆಬ್ರವರಿ 11ರಂದು ಸಪ್ತಪದಿ ತುಳಿಯಲಿದ್ದಾರೆ ಎಂದು ಹೇಳಲಾಗುತ್ತಿದೆ, ಫೆಬ್ರವರಿ 9 ರಿಂದ ವಿವಾಹ ಸಂಪ್ರದಾಯ ವಿಧಿ ವಿಧಾನಗಳು ನೆರವೇರಲಿವೆ,
ಪೊಯೆಸ್ ಗಾರ್ಡನ್ ನಲ್ಲಿರುವ ರಜನಿಕಾಂತ್ ನಿವಾಸದಲ್ಲಿ ಈ ಎಲ್ಲಾ ಪ್ರಕ್ರಿಯೆಗಳು ನಡೆಯಲಿವೆ, ಸೌಂದರ್ಯ ಅವರ ಹಿರಿಯ ಸಹೋದರಿ ಐಶ್ವರ್ಯಾ ಧನುಷ್ ವಿವಾಹದ ಸಿದ್ಧತೆ ನೋಡಿಕೊಳ್ಳಲಿದ್ದಾರೆ, ವಿವಾಹಕ್ಕೆ ಅಗತ್ಯವಾಗಿರುವ ಶಾಪಿಂಗ್ ನಲ್ಲಿ ಸೌಂದರ್ಯ ಭಾಗಿಯಾಗಿದ್ದಾರೆ.
ಸೌಂದರ್ಯ ಮತ್ತು ಅಶ್ವಿನ್ ದಂಪತಿಗೆ ಗಂಡು ಮಗು ಜನಿಸಿದ್ದು, ಅದಕ್ಕೆ ವೇದ್ ಎಂದು ಹೆಸರಿಟ್ಟಿದ್ದರು. ಆದರೆ ದಂಪತಿ ನಡುವೆ ಹೊಂದಾಣಿಕೆಯ ಸಮಸ್ಯೆಯಿಂದಾಗಿ ವಿಚ್ಛೇದನ ಪಡೆದು ದೂರಾಗಿದ್ದರು
ವಿಶಾಖನ್ ಕೂಡಾ ಮೊದಲ ಪತ್ನಿಯಿಂದ ವಿಚ್ಛೇದನ ಪಡೆದಿದ್ದರು. ಪತ್ರಿಕಾ ಸಂಪಾದಕಿಯಾಗಿದ್ದ ಕನಿಕಾ ಕುಮಾರನ್ ಅವರನ್ನು ವಿಶಾಖನ್ ವಿವಾಹವಾಗಿದ್ದು, ಇಬ್ಬರ ನಡುವೆ ಹೊಂದಾಣಿಕೆಯಾಗದ ಪರಿಣಾಮ ವಿವಾಹ ವಿಚ್ಛೇದನ ಪಡೆದಿದ್ದರು