ಧ್ರುವ ಸರ್ಜಾ 'ಪೊಗರು' ಚಿತ್ರದ ಹಿಂದಿ ಹಕ್ಕುಗಳು 7.2 ಕೋಟಿ ರೂ. ಗೆ ಮಾರಾಟ!

ಧ್ರುವ ಸರ್ಜಾ ಅಭಿನಯದ ಬಹುನಿರೀಕ್ಷಿತ ಚಿತ್ರ "ಪೊಗರು" ಪೋಸ್ಟರ್‌ಗಳು, ಟೀಸರ್ ಮತ್ತು ಜನಪ್ರಿಯ ಕರಾಬು ಹಾಡಿನೊಂದಿಗೆ ಸಖತ್ ಸೌಂಡ್ ಮಾಡುತ್ತಿದೆ.  ನಿರ್ದೇಶಕ ನಂದ ಕಿಶೋರ್ ಅವರ ಮಾಸ್ ಕಮರ್ಷಿಯಲ್ ಎಂಟರ್ಟೈನರ್ ಆಗಿರುವ ಈ ಚಿತ್ರದ ಹಿಂದಿ ಹಕ್ಕುಗಳನ್ನು ಬಾಲಿವುಡ್ ನಿರ್ಮಾಪಕ ಆರ್ ಕೆ ದುಗ್ಗಲ್ ಅವರಿಗೆ 7.2 ಕೋಟಿ ರೂ.ಗೆ ಮಾರಾಟ ಮಾಡಲಾಗಿದೆ.

ನಾಲ್ಕು ಚಿತ್ರಗಳಲ್ಲಿ ಕಾಣಿಸಿಕೊಂಡಿರುವ ನಟನ ಚಿತ್ರವೊಂದು ಇಷ್ಟು ದುಬಾರಿ ಮೊತ್ತಕ್ಕೆ ಹಿಂದಿ ಭಾಷೆಗೆ ಹೋಗುತ್ತಿರುವುದು ಅದು ಮೊದಲೆನ್ನಲಾಗಿದೆ. ಕನ್ನಡ ಹಾಗೂ ತೆಲುಗಿನಲ್ಲಿ ತಯಾರಾದ ಈ ಚಿತ್ರವನ್ನು ಇದೀಗ ಹಿಂದಿ ಭಾಷೆಯಲ್ಲೂ ಡಬ್ ಮಾಡಿ ಬಿಡುಗಡೆ ಮಾಡಲಾಗುವುದು.

ಕೊರೋನಾ ಸಾಂಕ್ರಾಮಿಕದ ಅವಧಿಯಲ್ಲಿ ಚಲನಚಿತ್ರದ ಸಂಬಂಧ ಇಂತಹಾ ಬೆಳವಣಿಗೆ ನಡೆದಿರುವುದು ತಯಾರಕರಲ್ಲಿ ಖುಷಿ ಹೆಚ್ಚಿಸಿದೆ. ಬಿಕೆ ಗಂಗಾಧರ್ ನಿರ್ಮಿಸಿದ "ಪೊಗರು" ಚಿತ್ರದಲ್ಲಿ ರಶ್ಮಿಕಾ ಮಂದಣ್ಣ ನಾಯಕಿಯಾಗಿದ್ದಾರೆ.

ಧನಂಜಯ್, ಮಯೂರಿ, ರವಿಶಂಕರ್, ಚಿಕ್ಕಣ್ಣ ಮತ್ತು ಕುರಿ ಪ್ರತಾಪ್ ಸೇರಿ ಬಹುತಾರಾಂಗಣವಿರುವ ಈ ಚಿತ್ರ ಡಿಸೆಂಬರ್ 25 ಅಥವಾ ಜನವರಿ 14ಕ್ಕೆ ತೆರೆ ಕಾಣಲಿದೆ.  ಚಿತ್ರಕ್ಕೆ ಚಂದನ್ ಶೆಟ್ಟಿ ಸಂಗೀತ ವಿಜಯ್ ಮಿಲ್ಟನ್ ಛಾಯಾಗ್ರಹಣ ಇದೆ.