Ramayana Part 1 Box Office Collection: ಬಾಕ್ಸಾಫೀಸ್ ಲೋಕದಲ್ಲಿ ಹೊಸ ಅಲೆ ಎಬ್ಬಿಸಿರುವ ರಣಬೀರ್ ಕಪೂರ್, ಯಶ್ ಮತ್ತು ಸಾಯಿ ಪಲ್ಲವಿ ಅಭಿನಯದ ರಾಮಾಯಣ: ರೈಸ್ ಆಫ್ ಎ ಲಜೆಂಡ್ ಚಿತ್ರವು ಬಿಡುಗಡೆಯಾದ ದಿನದಿಂದಲೂ ಹೊಸ ದಾಖಲೆಗಳನ್ನು ಬರೆಯುತ್ತಾ ಮುನ್ನಡೆಯುತ್ತಿದೆ. ಅದರಲ್ಲೂ, ಬಿಡುಗಡೆಯಾದ ಕೇವಲ ಒಂಬತ್ತೇ ದಿನಗಳಲ್ಲಿ ಈ ಮಹಾಕಾವ್ಯ ಚಿತ್ರವು ಹಿಂದಿನ ಎಲ್ಲಾ ದೊಡ್ಡ ಬ್ಲಾಕ್ ಬಸ್ಟರ್ ಚಿತ್ರಗಳ ದಾಖಲೆಗಳನ್ನು ಪುಡಿಗಟ್ಟಿದೆ. ವಿಶೇಷವಾಗಿ ಒಂಬತ್ತನೇ ದಿನದ ಕಲೆಕ್ಷನ್ ನಲ್ಲಿ ವಿಕ್ಕಿ ಕೌಶಲ್ ಅವರ ಚಾವಾ ಚಿತ್ರದ ಜೀವಿತಾವಧಿ ಗಳಿಕೆಯನ್ನು ಹಿಂದಿಕ್ಕುವ ಮೂಲಕ ಈ ಸಿನಿಮಾ ದೇಶಾದ್ಯಂತ ಸಂಚಲನ ಸೃಷ್ಟಿಸಿದೆ. ಪ್ರತಿಯೊಬ್ಬರ ಹುಬ್ಬೇರಿಸುವಂತೆ ಜಾಗತಿಕ ಮಟ್ಟದಲ್ಲಿ 1,100 ಕೋಟಿ ರೂಪಾಯಿಗಳಿಕೆ ಕಂಡು, ವಿಕ್ಕಿ ಕೌಶಲ್ ಅವರ 'ಛಾವಾ' ಚಿತ್ರದ ಭಾರತದ ಜೀವಮಾನದ ಕಲೆಕ್ಷನ್ ದಾಖಲೆಯನ್ನು ಮುರಿದು ಹೊಸ ಇತಿಹಾಸ ಸೃಷ್ಟಿಸಿದೆ. ಆ ಕುರಿತ ವರದಿ ಇಲ್ಲಿದೆ:
ಒಂಬತ್ತನೇ ದಿನದ ಕಲೆಕ್ಷನ್
ಸ್ಯಾಕ್ನಿಲ್ಕ್ ವರದಿಯ ಪ್ರಕಾರ, ಬಿಡುಗಡೆಯಾದ 9ನೇ ದಿನ (ಶುಕ್ರವಾರ) ಈ ಚಿತ್ರವು ಭಾರತದಲ್ಲಿ ಸುಮಾರು 22,993 ಶೋಗಳಿಂದ ₹47.85 ಕೋಟಿ ನೆಟ್ ಕಲೆಕ್ಷನ್ ಮಾಡಿದೆ. ಇದರೊಂದಿಗೆ ದೇಶೀಯ ಒಟ್ಟು ನೆಟ್ ಕಲೆಕ್ಷನ್ ₹612.45 ಕೋಟಿ (ಗ್ರಾಸ್ ₹732.20 ಕೋಟಿ) ತಲುಪಿದೆ. ಇದರೊಂದಿಗೆ, ವಿದೇಶಿ ಮಾರುಕಟ್ಟೆಯಲ್ಲಿ 9ನೇ ದಿನ ₹25 ಕೋಟಿ ಗಳಿಸುವ ಮೂಲಕ, ಚಿತ್ರದ ಒಟ್ಟು ವಿದೇಶಿ ಗಳಿಕೆ ₹378.50 ಕೋಟಿಗೆ ಏರಿದೆ. ಜೊತೆಗೆ, ಭಾರತ ಮತ್ತು ವಿದೇಶಿ ಗಳಿಕೆ ಸೇರಿ ಚಿತ್ರದ ಒಟ್ಟು ವಿಶ್ವಾದ್ಯಂತ ಕಲೆಕ್ಷನ್ ₹1,110.70 ಕೋಟಿ ದಾಟಿದೆ. ಈ ಮೂಲಕ 'ಕೆಜಿಎಫ್-2' ಬಳಿಕ ₹1,000 ಕೋಟಿ ಕ್ಲಬ್ ಸೇರಿದ ಯಶ್ ಅವರ ಎರಡನೇ ಸಿನಿಮಾ ಇದಾಗಿದೆ.
ಭಾಷಾವಾರು ಗಳಿಕೆ (9ನೇ ದಿನ)
9ನೇ ದಿನದ ₹47.85 ಕೋಟಿ ಗಳಿಕೆಯಲ್ಲಿ ವಿವಿಧ ಭಾಷೆಗಳ ಕೊಡುಗೆ,
ಹಿಂದಿ: ₹36.25 ಕೋಟಿ
ಮಲಯಾಳಂ: ₹3.25 ಕೋಟಿ
ಕನ್ನಡ: ₹3.00 ಕೋಟಿ
ತಮಿಳು: ₹2.75 ಕೋಟಿ
ತೆಲುಗು: ₹2.60 ಕೋಟಿ
'ಛಾವಾ' ಸೇರಿ ಹಲವು ಬ್ಲಾಕ್‌ಬಸ್ಟರ್‌ಗಳ ದಾಖಲೆ ಧೂಳೀಪಟ
2025ರ ಅತಿ ದೊಡ್ಡ ಬ್ಲಾಕ್‌ಬಸ್ಟರ್ ಎನಿಸಿಕೊಂಡಿದ್ದ ವಿಕ್ಕಿ ಕೌಶಲ್ ಅವರ 'ಛಾವಾ' ಚಿತ್ರವು ಭಾರತದಲ್ಲಿ ಒಟ್ಟು ₹601.57 ಕೋಟಿ ನೆಟ್ ಕಲೆಕ್ಷನ್ ಮಾಡಿತ್ತು. 'ರಾಮಾಯಣ' ಕೇವಲ 9 ದಿನಗಳಲ್ಲಿ ₹612.45 ಕೋಟಿ ಗಳಿಸುವ ಮೂಲಕ 'ಛಾವಾ' ಚಿತ್ರದ ಜೀವಮಾನದ ದಾಖಲೆಯನ್ನು ಹಿಂದಿಕ್ಕಿದೆ. ಇದಕ್ಕೂ ಮುನ್ನ ರಣಬೀರ್ ಕಪೂರ್ ಅವರ 'ಅನಿಮಲ್' (₹556.36 ಕೋಟಿ) ಮತ್ತು ಶಾರುಖ್ ಖಾನ್ ಅವರ 'ಪಠಾಣ್' (₹544.28 ಕೋಟಿ) ಚಿತ್ರಗಳ ಭಾರತದ ಒಟ್ಟು ಗಳಿಕೆಯನ್ನೂ 'ರಾಮಾಯಣ' ಮೀರಿಸಿದೆ.
