ಇಲ್ಲಿನ ವ್ಯವಸ್ಥೆಯ ಒಂದು ದೊಡ್ಡ ವ್ಯಂಗ್ಯವೆಂದರೆ ಶಿಕ್ಷಕನಾಗಲು ಡಿಗ್ರಿ ಪಡೆದಿರಬೇಕು, ಒಳ್ಳೆಯ ಅಂಕಗಳನ್ನು ಗಳಿಸಿರಬೇಕು. ಪ್ರೊಫೆಸರ್ ಗಳಾಗಲು ಡಾಕ್ಟರೇಟ್ ಪಡೆದಿರಬೇಕು ಆದರೆ ಶಿಕ್ಷಣ ಸಚಿವನಾಗಲು ಯಾವುದೇ ವಿದ್ಯಾರ್ಹತೆ ಬೇಕಿಲ್ಲ! ಶಿಕ್ಷಣ ವ್ಯವಸ್ಥೆಯ ಬಗ್ಗೆ ಸಮೂಹ ಸಂವಹನದ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಬೇಕಿರುವ ಆಡಳಿತಾತ್ಮಕ ಹುದ್ದೆಯು ಪರಿಣಿತರ ಕೈಯಲ್ಲಿರದಿರುವುದು ಅತ್ಯಂತ ದೊಡ್ಡ ದುರಂತ. ಆಡಳಿತಾತ್ಮಕ ನಿರ್ಧಾರ ಕೈಗೊಳ್ಲುವವರ ಹಿಂದೆ ಪರಿಣಿತರ ತಂಡ ಇರುತ್ತದಾದರೂ ಅವರು ಅನೇಕ ಬಾರಿ ರಾಜಕೀಯ ಆಕಾಂಕ್ಷೆಗಳಿಗೆ ತಕ್ಕಂತೆ ಕೆಲಸ ಮಾಡಬೇಕಾಗುತ್ತದೆ. ಅನೇಕ ಬಾರಿ ಪಠ್ಯವು ರಾಜಕೀಯ ತತ್ವಗಳ ಪ್ರತಿಪಾದಕವಾಗಿ ನಿರೂಪಿತವಾಗಿರುವುದೂ ಹೌದು! ಇತ್ತೀಚೆಗೆ ರಾಜ್ಯ ಸರಕಾರದ ಪಠ್ಯ ಪುಸ್ತಕ ಸಮಿತಿಯ ಬಗ್ಗೆ ಅನೇಕ ತಕರಾರುಗಳನ್ನು ಪತ್ರಿಕೆಗಳಲ್ಲಿ ಓದಿದ್ದೇವೆ. ಮಹಿಳಾ ಶಿಕ್ಷಕರು ಯಾವ ಉಡುಪು ತೊಡಬೇಕು, ಶಿಕ್ಷಕರು ಎಲ್ಲಿ ಮತ್ತು ಹೇಗೆ ಕೆಲಸ ಮಾಡಬೇಕು ಎಂಬೆಲ್ಲ ನಿರ್ಧಾರಗಳನ್ನು ಅನೇಕ ತಜ್ಞರಲ್ಲದವರೇ ನಿರ್ಧರಿಸುತ್ತಾರೆ. ಕೆಲ ಸಮಿತಿಗಳಲ್ಲಿ ಮಹಿಳೆ ಮತ್ತು ಹಿಂದುಳಿದ ವರ್ಗದವರ ಪ್ರಾತಿನಿಧ್ಯ ತೀರಾ ಕಡಿಮೆ ಇರುತ್ತದೆ.