ಒಂದಾನೊಂದು ಕಾಲದಲ್ಲಿ ಒಂದೇ ವರ್ಗವನ್ನು ದೃಷ್ಟಿಯಲ್ಲಿಟ್ಟುಕೊಂಡು ಬರೆದ ಪಠ್ಯಗಳ ನುಡಿಯೇ ಇಂದಿಗೂ ಮುಂದುವರೆದುಕೊಂಡು ಬಂದಿದೆ. ಜನರ ಆಡುನುಡಿಗೆ ತಕ್ಕಂತೆ ಈ ಪಠ್ಯ ವ್ಯವಸ್ಥೆಯನ್ನು ಬದಲಿಸಿಕೊಳ್ಳಬೇಕಿದೆ. ಅನೇಕ ಪದಗಳನ್ನು ಬರೆಯುವುದಿರಲಿ ಉಚ್ಛರಿಸುವುದೂ ಸಹ ಕಷ್ಟವಾಗಿ ಪರಿಣಮಿಸಿರುವಾಗ ವಿಷಯಗಳ ಆಳವನ್ನು ವಿದ್ಯಾರ್ಥಿಗಳು ಗ್ರಹಿಸುವ ಬಗೆಯಾದರೂ ಹೇಗೆ? ವ್ಯುತ್ಕ್ರಮ ಬದಲು ತಲೆಕೆಳಗು, ಶ್ವಾಸಕೋಶದ ಬದಲು ಪುಪ್ಪಸ, ಮಸ್ತಿಷ್ಕ ಬದಲು ಮೆದುಳು, ಹೃತ್ಕಕ್ಷಿ, ಹೃತ್ಕರ್ಣಗಳ ಬದಲು ಮೇಲ್ಕೋಣೆ ಕೆಳಕೋಣೆ, ತ್ರಿಕೋಣ ಬದಲು ಮೂರುಮೂಲೆ ಇತ್ಯಾದಿ ವಿದ್ಯಾರ್ಥಿಗಳಿಗೆ ಬಳಸಲು ಸುಲಭವಾದ ಪದಗಳಲ್ಲಿ ವಿಷಯವನ್ನು ಹೇಳಬೇಕು. ಶಿಕ್ಷಣದ ಗುರಿಯು ಕೇವಲ ವಿದ್ಯಾರ್ಥಿಯ ಬಾಷಾಜ್ಞಾನವನ್ನು ಹೆಚ್ಚಿಸುವುದು ಅಲ್ಲ. ಭಾಷೆಯ ಬಗ್ಗೆ ಆಳ ತಿಳುವಳಿಕೆ ಬೇಕಾದವರು ಆ ವಿಷಯದ ಕಡೆ ಮುಂದುವರಿಯುತ್ತಾರೆ. ವಿಷಯವನ್ನು ಆಳವಾಗಿ ತಿಳಿದರೆ ವಿಜ್ಞಾನಿಗಳ ಸಂಶೋಧಕರ ಸಂಖ್ಯೆ ಹೆಚ್ಚುತ್ತದೆ.