ವಿತ್ತೀಯ ವಲಯದಲ್ಲಿ ಒಂದು ಮಾತಿದೆ ಅದನ್ನ ಮುಕ್ಕಾಲು ಪಾಲು ಜನ ಕೇಳಿಯೇ ಇರುತ್ತೀರಿ. ಅಮೇರಿಕಾಕ್ಕೆ ನೆಗಡಿಯಾದರೆ ಇಡೀ ಪ್ರಪಂಚ ಸೀನುತ್ತದೆ ಎನ್ನುವುದು ಆ ಮಾತು. ಈಗ ಅದು ಇನ್ನಷ್ಟು ಬದಲಾಗಿದೆ ಅಮೇರಿಕಾ ಮಾತ್ರವಲ್ಲ ಇರಾನ್ ನಲ್ಲಿ ಜರಗುವ ಯಾವುದೊ ಒಂದು ಘಟನೆ ಇರಬಹದು, ನಾರ್ತ್ ಕೊರಿಯಾ ಗುಟುರು ಹಾಕಿದ್ದಿರಬಹದು ಷೇರು ಮಾರುಕಟ್ಟೆ ಕುಸಿಯಲು ಕಾರಣ ಬೇಕಷ್ಟೆ ಎನ್ನುವ ಮಟ್ಟಕ್ಕೆ ಬಂದು ನಿಂತಿದೆ. ಇಂದಿನ ಲೇಖನದ ಉದ್ದೇಶ ಷೇರುಮಾರುಕಟ್ಟೆಯ ಕುಸಿತ ಒಂದನ್ನೇ ಕುರಿತು ಹೇಳುವುದಲ್ಲ. ವಾರದ ಹಿಂದೆ ಬಜೆಟ್ ಮಂಡನೆಯಾಗಿದೆ ಅದರಲ್ಲಿ ಯಾವ ವಲಯ/ಕ್ಷೇತ್ರದಲ್ಲಿ ಬದಲಾವಣೆಯ ಗಾಳಿ ಬೀಸಲಿದೆ. ಹೂಡಿಕೆದಾರ ಯಾವ ವಲಯದಲ್ಲಿ ತನ್ನ ಹಣವನ್ನ ಹೂಡಿಕೆ ಮಾಡಬಹದು ಎನ್ನುವುದನ್ನ ಕೂಡ ತಿಳಿಸುವುದು ಉದ್ದೇಶವಾಗಿದೆ. ಹಾಗಾದರೆ ತಡವಿನ್ನೇಕೆ? ವಲಯವಾರು ಬಜೆಟ್ ಪರಿಣಾಮಗಳತ್ತ ಒಂದು ಸುತ್ತ ಹಾಕೋಣ.