ಖಾಸಗಿತನದ ಉಲ್ಲಂಘನೆ: IPL ಪ್ರಸಾರಕರ ವಿರುದ್ಧ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ವಾಗ್ದಾಳಿ

ನವದೆಹಲಿ: ತರಬೇತಿ ಮತ್ತು ಪಂದ್ಯದ ದಿನಗಳಲ್ಲಿ ಸ್ನೇಹಿತರು ಮತ್ತು ಸಹೋದ್ಯೋಗಿಗಳೊಂದಿಗಿನ ತಮ್ಮ ಸಂಭಾಷಣೆಗಳನ್ನು ರೆಕಾರ್ಡ್ ಮಾಡುವ ಮೂಲಕ ಮತ್ತು ನಂತರ ಅವುಗಳನ್ನು ಪ್ರಸಾರ ಮಾಡುವ ಮೂಲಕ ಕ್ರಿಕೆಟಿಗರ ಗೌಪ್ಯತೆಯನ್ನು "ಉಲ್ಲಂಘಿಸಿದ" ಐಪಿಎಲ್ ಪ್ರಸಾರಕರ ವಿರುದ್ಧ ಟೀಂ ಇಂಡಿಯಾದ ನಾಯಕ ರೋಹಿತ್ ಶರ್ಮಾ ವಾಗ್ದಾಳಿ ನಡೆಸಿದ್ದಾರೆ.

ರೋಹಿತ್ ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ ಸಹಾಯಕ ಕೋಚ್ ಅಭಿಷೇಕ್ ನಾಯರ್ ಅವರನ್ನು ಒಳಗೊಂಡ ವಿಡಿಯೋ ವೈರಲ್ ಆದ ನಂತರ ರೋಹಿತ್ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ. ವಿಡಿಯೋದಲ್ಲಿ ರೋಹಿತ್ ಶರ್ಮಾ, ತಮ್ಮ ಭವಿಷ್ಯದ ಬಗ್ಗೆ ಆಲೋಚಿಸುತ್ತಿರುವುದು ಕಂಡುಬಂದಿದೆ.

'ಕ್ರಿಕೆಟಿಗರ ಜೀವನದಲ್ಲಿ ಖಾಸಗಿತನದ ಕೊರತೆ ಎಷ್ಟು ಉಂಟಾಗಿದೆ ಎಂದರೆ, ತರಬೇತಿ ಅಥವಾ ಪಂದ್ಯದ ದಿನಗಳಲ್ಲಿ ಕ್ಯಾಮೆರಾಗಳು ನಾವು ನಮ್ಮ ಸ್ನೇಹಿತರು ಮತ್ತು ಸಹೋದ್ಯೋಗಿಗಳೊಂದಿಗೆ ಖಾಸಗಿಯಾಗಿ ನಡೆಸುವ ಪ್ರತಿಯೊಂದು ಹೆಜ್ಜೆ ಮತ್ತು ಸಂಭಾಷಣೆಯನ್ನು ರೆಕಾರ್ಡ್ ಮಾಡುತ್ತಿವೆ. ನನ್ನ ಸಂಭಾಷಣೆಯನ್ನು ರೆಕಾರ್ಡ್ ಮಾಡಬೇಡಿ ಎಂದು ಸ್ಟಾರ್ ಸ್ಪೋರ್ಟ್ಸ್‌ಗೆ ಕೇಳಿಕೊಂಡರೂ, ರೆಕಾರ್ಡ್ ಮಾಡಿ ಅದನ್ನು ಪ್ರಸಾರ ಮಾಡಲಾಯಿತು. ಇದು ಗೌಪ್ಯತೆಯ ಉಲ್ಲಂಘನೆಯಾಗಿದೆ' ಎಂದು ರೋಹಿತ್ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

'ಎಕ್ಸ್‌ಕ್ಲೂಸಿವ್ ಕಂಟೆಂಟ್ ಅನ್ನು ಪಡೆಯುವುದು ಮತ್ತು ಅದನ್ನು ಪ್ರಸಾರ ಮಾಡಿ ಅಧಿಕ ವೀಕ್ಷಣೆಗಳು ಮತ್ತು ಪ್ರೇಕ್ಷಕರನ್ನು ತೊಡಗಿಸಿಕೊಳ್ಳುವುದರ ಮೇಲೆ ಮಾತ್ರ ಕೇಂದ್ರೀಕರಿಸುವ ಅಗತ್ಯವು ಒಂದು ದಿನ ಅಭಿಮಾನಿಗಳು, ಕ್ರಿಕೆಟಿಗರು ಮತ್ತು ಕ್ರಿಕೆಟ್ ನಡುವಿನ ನಂಬಿಕೆಯನ್ನು ಮುರಿಯುತ್ತದೆ. ಉತ್ತಮ ಪ್ರಜ್ಞೆಯು ಮೇಲುಗೈ ಸಾಧಿಸಲಿ' ಎಂದಿದ್ದಾರೆ.

ರೋಹಿತ್ ಅವರು ನಾಯರ್ ಅವರೊಂದಿಗೆ ಮಾತನಾಡಿದ ನಂತರ ಧ್ವನಿಮುದ್ರಣ ಮಾಡುವಾಗ ಆಡಿಯೋವನ್ನು ಸ್ಥಗಿತಗೊಳಿಸುವಂತೆ ರೋಹಿತ್ ಪ್ರಸಾರಕರಿಗೆ ವಿನಂತಿಸುತ್ತಿರುವುದು ಕಂಡುಬಂದಿದೆ. ಮೇ 11 ರಂದು ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧದ ಮುಂಬೈ ಇಂಡಿಯನ್ಸ್ ಐಪಿಎಲ್ ಪಂದ್ಯದ ನಂತರ ಇಬ್ಬರ ನಡುವೆ ಸಂಭಾಷಣೆ ನಡೆದಿದೆ.

ಈ ಚಾಟ್‌ನ ಆಡಿಯೋವನ್ನು ಕೆಕೆಆರ್ ತಮ್ಮ ಸಾಮಾಜಿಕ ಮಾಧ್ಯಮ ಹ್ಯಾಂಡಲ್‌ನಲ್ಲಿ ಪೋಸ್ಟ್ ಮಾಡಿದೆ ಮತ್ತು ಇದನ್ನು ಕಂಡ ಅಭಿಮಾನಿಗಳು ರೋಹಿತ್ ಶರ್ಮಾ ಅವರು ಈ ಐಪಿಎಲ್ ಆವೃತ್ತಿಯ ನಂತರ ಮುಂಬೈ ಇಂಡಿಯನ್ಸ್ ತಂಡವನ್ನು ತೊರೆಯುವ ಬಗ್ಗೆ ಮಾತನಾಡುತ್ತಿದ್ದಾರೆ ಎಂದು ಊಹಿಸಿದ್ದಾರೆ. ವಿವಾದದ ನಂತರ, ಕೋಲ್ಕತ್ತಾ ನೈಟ್ ರೈಡರ್ಸ್ ಸಾಮಾಜಿಕ ಮಾಧ್ಯಮ ವೇದಿಕೆಯಿಂದ ಈ ವಿಡಿಯೋವನ್ನು ತೆಗೆದುಹಾಕಲಾಗಿದೆ.

ಬಳಿಕ ಮೇ 17 ರಂದು ಲಕ್ನೋ ಸೂಪರ್ ಜೈಂಟ್ಸ್ ವಿರುದ್ಧದ ಮುಂಬೈ ಇಂಡಿಯನ್ಸ್ ಪಂದ್ಯಕ್ಕೂ ಮೊದಲು ಧವಳ್ ಕುಲಕರ್ಣಿ ಅವರೊಂದಿಗೆ ರೋಹಿತ್ ಮಾತನಾಡುತ್ತಿರುವುದು ಮತ್ತೊಮ್ಮೆ ಕಂಡುಬಂದಿದೆ. ಇದನ್ನೂ ರೆಕಾರ್ಡ್ ಮಾಡುತ್ತಿರುವುದನ್ನು ಕಂಡ ಅವರು, ಕೈ ಜೋಡಿಸಿ, ಆಡಿಯೋ ಆಫ್ ಮಾಡಲು ಪ್ರಸಾರಕರನ್ನು ವಿನಂತಿಸಿದ್ದಾರೆ.

'ಭಾಯ್ ಆಡಿಯೋ ಬಂದ್ ಕರೋ ಹಾನ್, ಆಲ್‌ರೆಡಿ ಏಕ್ ಆಡಿಯೋ ನೆ ಮೇರಾ ವಾತ್ ಲಗಾ ದಿಯಾ (ಸಹೋದರ ದಯವಿಟ್ಟು ಆಡಿಯೋವನ್ನು ಆಫ್ ಮಾಡಿ, ಒಂದು ಆಡಿಯೋ ಈಗಾಗಲೇ ನನಗೆ ಕಷ್ಟವನ್ನುಂಟುಮಾಡಿದೆ)' ಎಂದು ರೋಹಿತ್ ಶರ್ಮಾ ಹೇಳಿರುವ ವಿಡಿಯೋ ಕೂಡ ವೈರಲ್ ಆಗಿದೆ.