'ಗೌತಮ್ ಗಂಭೀರ್ ನನ್ನ ಮೇಲೆ ಒತ್ತಡ ಹೇರಿದ್ದಾರೆ': ಎರಡನೇ ಏಕದಿನ ಪಂದ್ಯಕ್ಕೂ ಮುನ್ನ ತಿಲಕ್ ವರ್ಮಾ ಸ್ಫೋಟಕ ಹೇಳಿಕೆ

ದಕ್ಷಿಣ ಆಫ್ರಿಕಾ ವಿರುದ್ಧ ರಾಂಚಿಯಲ್ಲಿ ಭರ್ಜರಿ ಜಯ ಸಾಧಿಸಿದ ನಂತರ, ಭಾರತದ ಬ್ಯಾಟ್ಸ್‌ಮನ್ ತಿಲಕ್ ವರ್ಮಾ ಏಕದಿನ ಮತ್ತು ಟೆಸ್ಟ್ ಪಂದ್ಯಗಳಲ್ಲಿ ಆಡುವ ಬಗ್ಗೆ ಮಾತನಾಡಿದ್ದು, ತಮ್ಮ ಬೆಳವಣಿಗೆ ಮತ್ತು ಮನಸ್ಥಿತಿಯನ್ನು ರೂಪಿಸಿದವರು ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ ಮತ್ತು ಗೌತಮ್ ಗಂಭೀರ್ ಎಂದಿದ್ದಾರೆ. ಭಾರತದ ಬ್ಯಾಟಿಂಗ್ ಹೆವಿವೇಯ್ಟ್‌ಗಳಾದ ರೋಹಿತ್ ಮತ್ತು ವಿರಾಟ್ ಇಬ್ಬರೂ ಒಂದೇ ತಂಡದಲ್ಲಿರುವಾಗ, ಉಳಿದ ಆಟಗಾರರ ಆತ್ಮವಿಶ್ವಾಸ ಸಂಪೂರ್ಣವಾಗಿ ವಿಭಿನ್ನವಾಗಿರುತ್ತದೆ ಎಂದರು.

ವಿರಾಟ್ ಕೊಹ್ಲಿ ಅವರ 52ನೇ ಏಕದಿನ ಶತಕ ಮತ್ತು ರೋಹಿತ್ ಶರ್ಮಾ ಅವರ ಅರ್ಧಶತಕದ ಮೂಲಕ ಭಾರತವು ದಕ್ಷಿಣ ಆಫ್ರಿಕಾ ವಿರುದ್ಧ ಮೊದಲ ಏಕದಿನ ಪಂದ್ಯದಲ್ಲಿ 17 ರನ್‌ ಅಂತರದ ರೋಚಕ ಜಯ ಸಾಧಿಸಿತು. ಮೂರು ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು.

'ಏಕದಿನ ಮತ್ತು ಟೆಸ್ಟ್ ಕ್ರಿಕೆಟ್ ನನ್ನ ಆಟದಂತೆಯೇ ಭಾಸವಾಗುತ್ತದೆ. ಏಕೆಂದರೆ, ನಾನು ದೀರ್ಘ ಸ್ವರೂಪವನ್ನು ಆನಂದಿಸುತ್ತೇನೆ. ಹೆಚ್ಚಿನ ಏಕದಿನ ಪಂದ್ಯಗಳನ್ನು ಆಡಲು ನಾನು ನಿಜವಾಗಿಯೂ ಉತ್ಸುಕನಾಗಿದ್ದೇನೆ. ರೋಹಿತ್ ಭಾಯ್ ಮತ್ತು ವಿರಾಟ್ ಭಾಯ್ ಒಂದೇ ತಂಡದಲ್ಲಿದ್ದಾಗ, ಆತ್ಮವಿಶ್ವಾಸದ ಮಟ್ಟವು ಸಂಪೂರ್ಣವಾಗಿ ಭಿನ್ನವಾಗಿರುತ್ತದೆ. ಅವರಿಗೆ ತುಂಬಾ ಅನುಭವ ಮತ್ತು ಜ್ಞಾನವಿದೆ ಮತ್ತು ನಾನು ಉತ್ತಮಗೊಳ್ಳಲು ಅವರಿಂದ ಸಾಧ್ಯವಾದಷ್ಟು ಸಲಹೆಯನ್ನು ತೆಗೆದುಕೊಳ್ಳಲು ಪ್ರಯತ್ನಿಸುತ್ತೇನೆ' ಎಂದರು.

'ನಾನು ವಿರಾಟ್ ಭಾಯ್ ಜೊತೆ ಬಹಳಷ್ಟು ಮಾತನಾಡುತ್ತೇನೆ, ವಿಶೇಷವಾಗಿ ಫಿಟ್ನೆಸ್ ಮತ್ತು ವಿಕೆಟ್‌ಗಳ ನಡುವೆ ಓಡುವ ಬಗ್ಗೆ. ಅವರ ತೀವ್ರತೆ ಅದ್ಭುತವಾಗಿದೆ. ನಾನು ಓಡುವುದನ್ನು ಸಹ ಇಷ್ಟಪಡುತ್ತೇನೆ, ಮತ್ತು ನಾನು ತುಂಬಾ ವೇಗವಾಗಿ ಆಡುತ್ತೇನೆ ಎಂದು ನಾನು ಭಾವಿಸುತ್ತೇನೆ. ಆದ್ದರಿಂದ ನಾನು ಆಟದ ಆ ಭಾಗವನ್ನು ನಿಜವಾಗಿಯೂ ಆನಂದಿಸುತ್ತೇನೆ. ನಾವು ಒಟ್ಟಿಗೆ ಆಡಿದರೆ, ಅವರೊಂದಿಗೆ ವಿಕೆಟ್‌ಗಳ ನಡುವೆ ಓಡುವುದು ನಾನು ಎದುರು ನೋಡುತ್ತಿರುವ ವಿಷಯ' ಎಂದು ತಿಲಕ್ ವರ್ಮಾ ಜಿಯೋಸ್ಟಾರ್‌ನಲ್ಲಿ ಹೇಳಿದರು.

ತಮ್ಮ ಆತ್ಮವಿಶ್ವಾಸವನ್ನು ಹೆಚ್ಚಿಸಿದ್ದಕ್ಕಾಗಿ ಗೌತಮ್ ಗಂಭೀರ್ ಅವರನ್ನು ಶ್ಲಾಘಿಸಿದ ತಿಲಕ್, ಕೋಚ್ ನನ್ನ ಕೌಶಲ್ಯಗಳನ್ನು ನಂಬುತ್ತಾರೆ ಮತ್ತು ಅಭ್ಯಾಸ ಅವಧಿಗಳಲ್ಲಿ ಒತ್ತಡ ನಿಭಾಯಿಸಲು ನನ್ನನ್ನು ಒತ್ತಾಯಿಸುತ್ತಾರೆ. ಪಂದ್ಯಗಳಿಗೆ ನನ್ನನ್ನು ಸಿದ್ಧಪಡಿಸುತ್ತಾರೆ ಎಂದು ಹೇಳಿದರು.

'ಗೌತಮ್ ಸರ್ ಯಾವಾಗಲೂ ನನಗೆ ಆತ್ಮವಿಶ್ವಾಸವನ್ನು ನೀಡುತ್ತಾರೆ. ನಿಮ್ಮಲ್ಲಿ ಕೌಶಲ್ಯವಿದ್ದರೆ, ನೀವು ಎಲ್ಲ ಸ್ವರೂಪಗಳನ್ನು ಆಡಬಹುದು ಮತ್ತು ಎಲ್ಲ ಸ್ವರೂಪಗಳಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಬಹುದು ಎಂದು ಅವರು ನನಗೆ ಹೇಳುತ್ತಾರೆ. ಅಭ್ಯಾಸದ ವೇಳೆ ಅವರು ನನ್ನನ್ನು ಒತ್ತಡ ಹೇರುತ್ತಾರೆ. ಇದರಿಂದ ನಾನು ಪಂದ್ಯಗಳಲ್ಲಿ ಹೇಗೆ ಒತ್ತಡ ನಿಭಾಯಿಸಬೇಕೆಂದು ಕಲಿಯಬಹುದು. ಅವರು ನನಗೆ ಸವಾಲು ಹಾಕುತ್ತಲೇ ಇರುತ್ತಾರೆ ಏಕೆಂದರೆ ಅವರು ನನಗೆ ಸಾಮರ್ಥ್ಯವಿದೆ ಎಂದು ನಂಬುತ್ತಾರೆ. ಆ ಬೆಂಬಲ ನನಗೆ ತುಂಬಾ ಅರ್ಥಪೂರ್ಣವಾಗಿದೆ' ಎಂದು ಅವರು ಹೇಳಿದರು.

ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡದ ವರ್ಮಾ, 23 ವೈಟ್-ಬಾಲ್ ಪಂದ್ಯಗಳಲ್ಲಿ 661 ರನ್ ಗಳಿಸಿದ್ದಾರೆ. ಸರಾಸರಿ 38.88 ಮತ್ತು 73.60 ಸ್ಟ್ರೈಕ್ ರೇಟಿಂಗ್‌ನಲ್ಲಿ ನಾಲ್ಕು ಅರ್ಧಶತಕಗಳು ಮತ್ತು ಒಂದು ಶತಕ ಗಳಿಸಿದ್ದಾರೆ.

ಭಾರತವು ಬುಧವಾರ ಎರಡನೇ ಏಕದಿನ ಪಂದ್ಯದಲ್ಲಿ ರಾಯ್‌ಪುರದಲ್ಲಿ ದಕ್ಷಿಣ ಆಫ್ರಿಕಾವನ್ನು ಎದುರಿಸಲಿದೆ ಮತ್ತು ಒಂದು ಪಂದ್ಯ ಬಾಕಿ ಇರುವಾಗಲೇ ಸರಣಿಯನ್ನು ವಶಪಡಿಸಿಕೊಳ್ಳಲು ಎದುರು ನೋಡುತ್ತಿದೆ. ಏಕದಿನ ಸರಣಿಗೂ ಮುನ್ನ, ಟೆಸ್ಟ್ ಸರಣಿಯಲ್ಲಿ ಭಾರತವನ್ನು 0-2 ಅಂತರದಿಂದ ವೈಟ್‌ವಾಶ್ ಮಾಡಲಾಗಿದೆ.