'ವಿರಾಟ್ ಕೊಹ್ಲಿಯಂತೆಯೇ': ಐತಿಹಾಸಿಕ ಶತಕದ ನಂತರ ಶುಭಮನ್ ಗಿಲ್‌ರನ್ನು ಹಾಡಿ ಹೊಗಳಿದ ರವಿಶಾಸ್ತ್ರಿ

ಬುಧವಾರ ಇಂಗ್ಲೆಂಡ್ ವಿರುದ್ಧ ಎಡ್ಜ್‌ಬಾಸ್ಟನ್‌ನಲ್ಲಿ ನಡೆದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಶುಭಮನ್ ಗಿಲ್ ತಮ್ಮ ಏಳನೇ ಟೆಸ್ಟ್ ಶತಕ ಬಾರಿಸಿದ್ದು, ಭಾರತದ ಮಾಜಿ ಮುಖ್ಯ ಕೋಚ್ ರವಿಶಾಸ್ತ್ರಿ ಶ್ಲಾಘಿಸಿದ್ದಾರೆ. ಗಿಲ್ ಉತ್ತಮ ರಕ್ಷಣಾತ್ಮಕ ಆಟವಾಡುವ ಮೂಲಕ ಕಠಿಣ ಪರಿಶ್ರಮ ವಹಿಸಿದ್ದಾರೆ ಮತ್ತು ಒಟ್ಟಾರೆಯಾಗಿ ಪ್ರವಾಸಿ ತಂಡದ ಪರ 300 ರನ್‌ಗಳನ್ನು ದಾಟಿಸುವಲ್ಲಿ ಉತ್ತಮವಾಗಿ ಕಾಣುತ್ತಿದ್ದಾರೆ ಎಂದು ಹೇಳಿದರು.

ಕಳೆದ ವಾರ ಹೆಡಿಂಗ್ಲಿಯಲ್ಲಿ ನಡೆದ ಪಂದ್ಯದಲ್ಲಿ 147 ರನ್‌ಗಳೊಂದಿಗೆ ಟೆಸ್ಟ್ ನಾಯಕತ್ವವನ್ನು ಆರಂಭಿಸಿದ ನಂತರ ಮೊದಲ ದಿನದಾಟದಲ್ಲಿ ಗಿಲ್ ತಮ್ಮ ಎರಡನೇ ಟೆಸ್ಟ್ ಶತಕ ಬಾರಿಸಿದರು. ಭಾರತವು 85 ಓವರ್‌ಗಳಲ್ಲಿ 5 ವಿಕೆಟ್‌ ನಷ್ಟಕ್ಕೆ 310 ರನ್ ಗಳಿಸಿತ್ತು. ನಾಲ್ಕನೇ ಕ್ರಮಾಂಕದಲ್ಲಿ ಆಡಿದ ಗಿಲ್ ಅಪಾರ ಜವಾಬ್ದಾರಿ ಮತ್ತು ತಾಳ್ಮೆಯನ್ನು ಪ್ರದರ್ಶಿಸಿದರು. 216 ಎಸೆತಗಳಲ್ಲಿ 12 ಬೌಂಡರಿಗಳೊಂದಿಗೆ 114 ರನ್ ಗಳಿಸಿ ಅಜೇಯರಾಗಿ ಉಳಿದರು.

'ಮೊದಲ ದಿನದ ಅಂತ್ಯದ ವೇಳೆಗೆ ಭಾರತ ತಂಡವು ತಾನಿರುವ ಸ್ಥಾನದ ಬಗ್ಗೆ ಸಂತೋಷಪಡುತ್ತದೆ ಎಂದು ನಾನು ಭಾವಿಸುತ್ತೇನೆ. ಗಿಲ್ ಮತ್ತು ಜಡೇಜಾ ನಡುವಿನ 99 ರನ್‌ಗಳ ಜೊತೆಯಾಟವು ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದೆ ಎಂದು ನಾನು ಭಾವಿಸುತ್ತೇನೆ. ಆದರೆ, ಇಲ್ಲಿಂದ ಕನಿಷ್ಠ 150 ರನ್‌ಗಳನ್ನು ಗಳಿಸುವುದು ಅಗತ್ಯ ಎಂದು ಅವರಿಗೆ ತಿಳಿದಿದೆ' ಎಂದರು.

'ಭಾರತವು ಐದು ವಿಕೆಟ್ ಕಳೆದುಕೊಂಡು 211 ರನ್ ಗಳಿಸಿದ್ದಾಗ ಇಂಗ್ಲೆಂಡ್ ಮತ್ತಷ್ಟು ಮುನ್ನಡೆ ಸಾಧಿಸಿದ್ದರೆ, ಪರಿಸ್ಥಿತಿ ವಿಭಿನ್ನವಾಗಿರುತ್ತಿತ್ತು. ಆದರೆ, ಶುಭಮನ್ ಗಿಲ್ ಅವರ ಪ್ರದರ್ಶನ ಅದ್ಭುತವಾಗಿತ್ತು. ಇದು ಶಿಸ್ತಿನ ಪ್ರದರ್ಶನವಾಗಿತ್ತು, ಅವರು ಅದ್ಭುತ ಮತ್ತು ತುಂಬಾ ಉತ್ತಮವಾಗಿ ಕಾಣುತ್ತಿದ್ದರು' ಎಂದು ಹೇಳಿದರು.

'ಶುಭಮನ್ ಗಿಲ್ ಬ್ಯಾಟಿಂಗ್‌ನಲ್ಲಿ ಸುಧಾರಣೆಗೆ ಶ್ರಮಿಸಿದ್ದಾರೆ. ಕೊನೆಯ ಬಾರಿಗೆ ಇಂಗ್ಲೆಂಡ್ ಪ್ರವಾಸಕ್ಕೆ ಬಂದಿದ್ದಾಗ ಅವರು ವಿರಾಟ್ ಕೊಹ್ಲಿ ಅವರಂತೆಯೇ ತುಂಬಾ ಆಕ್ರಮಣಕಾರಿಯಾಗಿ ಆಡುತ್ತಿದ್ದರು. ಇದರಿಂದಾಗಿ ಅವರು ಔಟ್ ಆಗುವ ಸಾಧ್ಯತೆ ಹೆಚ್ಚಿರುತ್ತಿತ್ತು. ಈಗ ಗಿಲ್ ಹೆಚ್ಚು ಎಚ್ಚರಿಕೆಯಿಂದ ಆಡುತ್ತಿದ್ದಾರೆ. ಈಗ, ಮೇಲಿನ ಕೈ ಹೆಚ್ಚು ನಿಯಂತ್ರಣದಲ್ಲಿದೆ. ಅವರು ಚೆಂಡನ್ನು ತಮ್ಮ ಬಳಿಗೆ ಬರಲು ಬಿಡುತ್ತಾರೆ ಮತ್ತು ದಾಳಿಗೆ ನಿಂತರೆ ಎಲ್ಲ ಎಸೆತಗಳನ್ನು ಉತ್ತಮವಾಗಿ ಹೊಡೆಯುತ್ತಾರೆ' ಎಂದು ಸ್ಕೈ ಸ್ಪೋರ್ಟ್ಸ್ ಪ್ರಸಾರದಲ್ಲಿ ಶಾಸ್ತ್ರಿ ಹೇಳಿದರು.

ಗಿಲ್ ಮತ್ತು ರವೀಂದ್ರ ಜಡೇಜಾ 99 ರನ್‌ಗಳ ಜೊತೆಯಾಟವಾಡಿದ್ದು, ಅಜೇಯರಾಗಿದ್ದಾರೆ. ಈ ಜೋಡಿ ಟೆಸ್ಟ್ ಕ್ರಿಕೆಟ್‌ನಲ್ಲಿ ನಿರ್ಣಾಯಕ ಅವಧಿಯಾಗಿರುವ ಆಟದ ಮೊದಲ ಗಂಟೆಯಲ್ಲಿ ತಮ್ಮ ಮೊಮೆಂಟಮ್ ಅನ್ನು ಮುಂದುವರಿಸಬೇಕು ಮತ್ತು ಸಕ್ರಿಯವಾಗಿ ರನ್ ಗಳಿಸಬೇಕು. 'ಭಾರತಕ್ಕೆ ನಾಳೆಯ ಮೊದಲ ಗಂಟೆ ತುಂಬಾ ಮಹತ್ವದ್ದಾಗಿದೆ. ಅವರು ಟ್ರ್ಯಾಕ್‌ನಲ್ಲಿ ಉಳಿಯಲು ವಿಕೆಟ್ ಕಳೆದುಕೊಳ್ಳದೆ ಉತ್ತಮವಾಗಿ ಆಡಬೇಕು. ನಾಳೆ ಆಟದ ಮೊದಲ ಗಂಟೆಯಲ್ಲಿ ಒಂದೆರಡು ಆರಂಭಿಕ ವಿಕೆಟ್‌ಗಳನ್ನು ಪಡೆದರೆ, ಭಾರತವನ್ನು ನಿರ್ಬಂಧಿಸುವ ಉತ್ತಮ ಅವಕಾಶವನ್ನು ಹೊಂದಿದ್ದೇವೆ ಎಂದು ಇಂಗ್ಲೆಂಡ್‌ಗೆ ತಿಳಿದಿದೆ' ಎಂದರು.

ಇಂಗ್ಲೆಂಡ್‌ನ ಮಾಜಿ ನಾಯಕ ನಾಸೀರ್ ಹುಸೇನ್ ಕೂಡ ಅದೇ ಧಾಟಿಯಲ್ಲಿ ಹೇಳಿದರು. 'ಇಂಗ್ಲೆಂಡ್ ಏನು ಮಾಡಬಹುದು ಎನ್ನುವುದಕ್ಕಿಂತ ನಾಳೆ ಭಾರತದ ಮೇಲೆ ಕಣ್ಣಿಡುವುದು ಹೆಚ್ಚು ಮುಖ್ಯ ಎಂದು ನಾನು ಭಾವಿಸುತ್ತೇನೆ. ಹೆಡಿಂಗ್ಲಿಯಲ್ಲಿ ನಡೆದ ಎರಡನೇ ದಿನದ ಮೊದಲ ಇನಿಂಗ್ಸ್‌ನಲ್ಲಿ ಅವರು 7-41 ಮತ್ತು ಎರಡನೇ ಇನ್ನಿಂಗ್ಸ್‌ನಲ್ಲಿ 6-31 ಕ್ಕೆ ವಿಕೆಟ್ ಕಳೆದುಕೊಂಡಿತು' ಎಂದು ಹೇಳಿದರು.