ವೈಭವ್ ಸೂರ್ಯವಂಶಿ U19 ವಿಶ್ವಕಪ್‌ನಲ್ಲಿ ಆಡುವುದು 'ಅವರ ಬೆಳವಣಿಗೆಗೆ ಹಾನಿಕಾರಕ': ಭಾರತದ ಮಾಜಿ ಕೋಚ್

ಗುರುವಾರ ನಡೆದ ಭಾರತ ಮತ್ತು ಅಮೆರಿಕ ನಡುವಿನ ತನ್ನ ಮೊದಲ ಪಂದ್ಯದಲ್ಲಿ ಹದಿನಾಲ್ಕು ವರ್ಷದ ಪ್ರತಿಭೆ ವೈಭವ್ ಸೂರ್ಯವಂಶಿ 4 ಎಸೆತಗಳಲ್ಲಿ ಕೇವಲ 2 ರನ್ ಗಳಿಸುವ ಮೂಲಕ ತಮ್ಮ ಚೊಚ್ಚಲ U19 ವಿಶ್ವಕಪ್ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲರಾದರು. ತಮ್ಮ ವಯಸ್ಸಿನ ಹೊರತಾಗಿಯೂ ಸೂರ್ಯವಂಶಿ, ಬ್ಯಾಟಿಂಗ್‌ನಲ್ಲಿ ಅದ್ಭುತ ಭರವಸೆಯನ್ನು ತೋರಿಸಿದ್ದಾರೆ. ಯುವ ಆರಂಭಿಕ ಬ್ಯಾಟ್ಸ್‌ಮನ್ ಅಲ್ಪಾವಧಿಯಲ್ಲಿ ಹಲವಾರು ದಾಖಲೆಗಳನ್ನು ತಮ್ಮ ಹೆಸರಿನಲ್ಲಿ ಬರೆದಿದ್ದಾರೆ. ಈಗಾಗಲೇ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ನಲ್ಲಿ ಗುರುತಿಸಲ್ಪಟ್ಟ ಮುಖವಾಗಿದ್ದಾರೆ. ಆದರೂ, ಭಾರತೀಯ ಮಹಿಳಾ ತಂಡದ ಮಾಜಿ ತರಬೇತುದಾರ ಡಬ್ಲ್ಯುವಿ ರಾಮನ್, ಸೂರ್ಯವಂಶಿಯನ್ನು ಅಂಡರ್-19 ತಂಡಕ್ಕೆ ಈಗಲೇ ಸೇರಿಸಿಕೊಳ್ಳಬಾರದಿತ್ತು ಎಂದು ಭಾವಿಸುತ್ತಾರೆ.

ಬಿಸಿಸಿಐ ತನ್ನ ಆಟಗಾರರಿಗೆ ಕೇವಲ ಒಂದು U19 ವಿಶ್ವಕಪ್ ಆಡಲು ಅವಕಾಶ ನೀಡುತ್ತದೆ. ಆದ್ದರಿಂದ ಸೂರ್ಯವಂಶಿಗೆ ಈ ಮಟ್ಟದಲ್ಲಿ ಮತ್ತೊಂದು ಅವಕಾಶ ಸಿಗುವುದಿಲ್ಲ. ಹಾಗಿದ್ದರೂ, ಅವರನ್ನು ಮೊದಲೇ ತಂಡಕ್ಕೆ ಸೇರಿಸಿಕೊಳ್ಳುವುದರಿಂದ ಬ್ಯಾಟ್ಸ್‌ಮನ್ ಆಗಿ ವೇಗವಾಗಿ ನೋಡುವ ಆಶಯವನ್ನು ಮಂಡಳಿ ಹೊಂದಿತ್ತು. ಆದರೆ, ಈ ಅಭಿಪ್ರಾಯವನ್ನು ಮಾಜಿ ಕೋಚ್ ಡಬ್ಲ್ಯುವಿ ರಾಮನ್ ಒಪ್ಪುವುದಿಲ್ಲ.

'ಇದು ಜನಪ್ರಿಯವಲ್ಲದ ಅಭಿಪ್ರಾಯವಾಗಿರಬಹುದು. ವೈಭವ್ ಸೂರ್ಯವಂಶಿ ಎ ಸರಣಿ ಮತ್ತು ಐಪಿಎಲ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ. ಅವರನ್ನು U19 ಮಟ್ಟದಲ್ಲಿ ಆಡಿಸುವುದರಿಂದ ಅವರ ಬೆಳವಣಿಗೆಗೆ ಹಾನಿಯಾಗುವ ಸಾಧ್ಯತೆಯಿದೆ. ಅವರು ಈಗ ಪಂದ್ಯಗಳನ್ನು ಗೆಲ್ಲಲು ಸಹಾಯ ಮಾಡಬಹುದಾದರೂ, ಈ ದೃಷ್ಟಿಕೋನದ ಪ್ರಕಾರ, ಅಲ್ಪಾವಧಿಯ ಯಶಸ್ಸಿನ ಬದಲು ಅವರ ದೀರ್ಘಕಾಲೀನ ಬೆಳವಣಿಗೆಯ ಮೇಲೆ ಗಮನವಿರಬೇಕು' ಎಂದು ರಾಮನ್ X ನಲ್ಲಿನ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.

ಅಮೆರಿಕ ವಿರುದ್ಧದ U19 ವಿಶ್ವಕಪ್‌ನ ಆರಂಭಿಕ ಪಂದ್ಯದಲ್ಲಿ ಸೂರ್ಯವಂಶಿ ತಮ್ಮ ಉಪಸ್ಥಿತಿಯನ್ನು ತೋರಿಸಲು ವಿಫಲರಾದರೂ, ವೇಗಿ ಹೆನಿಲ್ ಪಟೇಲ್ ಪಂದ್ಯ ವಿಜೇತರಾದರು. ಭಾರತವು ಬೌಲಿಂಗ್ ಮಾಡಲು ಆಯ್ಕೆ ಮಾಡಿಕೊಂಡ ನಂತರ ಅವರು ಏಳು ಓವರ್‌ಗಳಲ್ಲಿ 16 ರನ್ ನೀಡಿ 5 ವಿಕೆಟ್‌ಗಳನ್ನು ಪಡೆದರು. ಅಮೆರಿಕವು 35.2 ಓವರ್‌ಗಳಲ್ಲಿ ಕೇವಲ 107 ರನ್‌ಗಳಿಗೆ ಆಲೌಟ್ ಆಯಿತು.

ಮಳೆಯಿಂದಾಗಿ ಭಾರತಕ್ಕೆ ಗುರಿಯನ್ನು 37 ಓವರ್‌ಗಳಲ್ಲಿ 96 ರನ್‌ಗಳಿಗೆ ಪರಿಷ್ಕರಿಸಲಾಯಿತು. ಒಂದು ಹಂತದಲ್ಲಿ ಅವರು ನಾಲ್ಕು ಓವರ್‌ಗಳಲ್ಲಿ 1 ವಿಕೆಟ್‌ ನಷ್ಟಕ್ಕೆ 21 ರನ್ ಗಳಿಸಿದ್ದರು. ಅಭಿಗ್ಯಾನ್ ಕುಂಡು (41 ಎಸೆತಗಳಲ್ಲಿ ಔಟಾಗದೆ 42) ಅವರ ಆಕರ್ಷಕ ಬ್ಯಾಟಿಂಗ್ ನೆರವಿನಿಂದ ತಂಡವು DLS ವಿಧಾನದಡಿಯಲ್ಲಿ ಇನ್ನೂ 118 ಎಸೆತಗಳು ಬಾಕಿ ಇರುವಾಗಲೇ ಗೆಲುವಿನ ದಡ ಸೇರಿತು.