ಇಂಗ್ಲೆಂಡ್ನಲ್ಲಿ ನಡೆಯುತ್ತಿರುವ ಮಹಿಳಾ ಟಿ20 ವಿಶ್ವಕಪ್ನಲ್ಲಿ ಪಾಕಿಸ್ತಾನ ಮಹಿಳಾ ಕ್ರಿಕೆಟ್ ತಂಡವು ಮೈದಾನದಲ್ಲಿ ಕಷ್ಟಕರ ಸಮಯವನ್ನು ಎದುರಿಸುತ್ತಿದೆ. ಪರಿಸ್ಥಿತಿಯನ್ನು ಇನ್ನಷ್ಟು ಹದಗೆಡಿಸುವಂತೆ ತಂಡದಲ್ಲಿ ಭಿನ್ನಾಭಿಪ್ರಾಯಗಳು ಮತ್ತು ಉದ್ವಿಗ್ನ ವಾತಾವರಣದ ಬಗ್ಗೆಯೂ ಇದೀಗ ವರದಿಗಳು ಹೊರಬಂದಿವೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಅವುಗಳನ್ನು ನಿರಾಕರಿಸಿಲ್ಲ ಅಥವಾ ದೃಢೀಕರಿಸಿಲ್ಲವಾದರೂ, ಸಾಮಾಜಿಕ ಮತ್ತು ಮುಖ್ಯವಾಹಿನಿಯ ಮಾಧ್ಯಮಗಳಲ್ಲಿನ ಹಲವಾರು ಪೋಸ್ಟ್ಗಳು ಮತ್ತು ವರದಿಗಳು ತಂಡದೊಳಗಿನ ಸಮಸ್ಯೆಗಳನ್ನು ಸೂಚಿಸುತ್ತವೆ.
ಮಂಗಳವಾರ ರಾತ್ರಿ ಲೀಡ್ಸ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ವಿಶ್ವಕಪ್ ಪಂದ್ಯದಲ್ಲಿ ಪಾಕಿಸ್ತಾನವು ಸತತ ನಾಲ್ಕನೇ ಸೋಲನ್ನು ಅನುಭವಿಸಿತು. ಈ ಮೆಗಾ ಈವೆಂಟ್ಗೆ ಮೊದಲು ಐರ್ಲೆಂಡ್ಗೆ ಬಂದಿಳಿದ ನಂತರ, ತಂಡವು ಇನ್ನೂ ಒಂದೇ ಒಂದು ಪಂದ್ಯವನ್ನು ಗೆದ್ದಿಲ್ಲ ಮತ್ತು ಟೂರ್ನಮೆಂಟ್ಗೆ ಮೊದಲು ಐರ್ಲೆಂಡ್ ಮತ್ತು ವೆಸ್ಟ್ ಇಂಡೀಸ್ ವಿರುದ್ಧ ಆಡಿದ ತ್ರಿಕೋನ ಸರಣಿಯಲ್ಲಿಯೂ ಅವರು ಗೆಲುವು ಸಾಧಿಸಿಲ್ಲ.
ಕಳೆದ ವರ್ಷವೂ ಭಾರತ ಮತ್ತು ಶ್ರೀಲಂಕಾದಲ್ಲಿ ನಡೆದ ಐಸಿಸಿ ಏಕದಿನ ವಿಶ್ವಕಪ್ನಲ್ಲಿ ಪಾಕಿಸ್ತಾನ ಪಾಯಿಂಟ್ಸ್ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿತ್ತು. ಆ ತಂಡವು ತನ್ನ ಎಲ್ಲ ಪಂದ್ಯಗಳನ್ನು ಶ್ರೀಲಂಕಾದಲ್ಲಿ ಆಡಿತ್ತು.
ತಂಡದ ಮಾರ್ಗದರ್ಶಕ ಮತ್ತು ಅನಧಿಕೃತ ಮುಖ್ಯ ತರಬೇತುದಾರ ವಹಾಬ್ ರಿಯಾಜ್ ಮತ್ತು ನಾಯಕಿ ಫಾತಿಮಾ ಸನಾ ನಡುವೆ ಆಯ್ಕೆ ವಿಷಯಗಳಲ್ಲಿ ದೊಡ್ಡ ಭಿನ್ನಾಭಿಪ್ರಾಯವಿತ್ತು ಎಂದು ವರದಿಗಳು ತಿಳಿಸಿವೆ.
ಬಾಂಗ್ಲಾದೇಶ ವಿರುದ್ಧದ ಪಂದ್ಯಕ್ಕೂ ಮುನ್ನ, ಹಿರಿಯ ಆಟಗಾರ್ತಿ ಆಲಿಯಾ ರಿಯಾಜ್ ಅವರ ಪತಿ ತಂಡದ ಹೋಟೆಲ್ನಲ್ಲಿ ಅವರ ಕೋಣೆಯಲ್ಲಿ ಉಳಿದುಕೊಂಡಿದ್ದಕ್ಕೆ ಸನಾ ಆಕ್ಷೇಪ ವ್ಯಕ್ತಪಡಿಸಿದ್ದರು ಎನ್ನಲಾಗಿದೆ.
'ಸನಾ ಅವರ ಒತ್ತಾಯದ ಮೇರೆಗೆ ಅಲಿ ಯೂನಿಸ್ ಅವರನ್ನು ಆ ಕೊಠಡಿಯಿಂದ ಹೊರನಡೆಯುವಂತೆ ಕೇಳಿಕೊಳ್ಳಲಾಗಿತ್ತು. ನಂತರ, ಬಾಂಗ್ಲಾದೇಶದ ವಿರುದ್ಧದ ಪಂದ್ಯಕ್ಕೆ ಮುನ್ನಾದಿನ, ತಂಡದ ಅಭ್ಯಾಸ ನಿಗದಿಯಾಗಿದ್ದಾಗ ಆಲಿಯಾ ಮತ್ತು ಅವರ ಪತಿ ಪ್ರವಾಸಿ ತಾಣಗಳನ್ನು ವೀಕ್ಷಿಸಲು ಹೊರಗೆ ಹೋಗಿದ್ದರು ಎಂದು ಒಂದು ವರದಿ ತಿಳಿಸಿದೆ'.
ಬಾಂಗ್ಲಾದೇಶ ವಿರುದ್ಧದ ಪಂದ್ಯಕ್ಕೆ ಪ್ಲೇಯಿಂಗ್ ಇಲೆವೆನ್ ಅಂತಿಮಗೊಳಿಸುವಾಗ, ಸನಾ ಆಲಿಯಾ ಅವರನ್ನು ಹೊರಗಿಡಲು ಬಯಸಿದ್ದರು. ಆದರೆ, ವಹಾಬ್ ಅವರ ಆಯ್ಕೆಗೆ ಒತ್ತಾಯಿಸಿದರು. ಪಾಕಿಸ್ತಾನ ಪಂದ್ಯವನ್ನು ಸೋತ ನಂತರ ಮತ್ತು ಆಲಿಯಾ ವಿಫಲವಾದ ನಂತರ, ಸನಾ ಎಲ್ಲರ ಮುಂದೆ ಅಗತ್ಯ ಶಿಸ್ತಿನ ಶಿಷ್ಟಾಚಾರಗಳನ್ನು ಪಾಲಿಸದ ಕಾರಣ ಈ ಸೋಲಿಗೆ ವಹಾಬ್ ಕಾರಣ ಎಂದು ಸ್ಪಷ್ಟವಾಗಿ ಹೇಳಿದರು.
ತಂಡದೊಳಗಿನ ಗುಂಪುಗಾರಿಕೆ ಮತ್ತು ಕೆಲವು ಹಿರಿಯ ಆಟಗಾರರು ಮತ್ತು ತರಬೇತುದಾರರ ನಡುವಿನ ಸಂಬಂಧ ಹದಗೆಟ್ಟಿರುವ ಬಗ್ಗೆಯೂ ವರದಿಗಳು ಮಾತನಾಡಿವೆ. ಆಟಗಾರರಿಗೆ ತಾವು ನೀಡುವ ಯಾವುದೇ ಯೋಜನೆಗಳು ಪಂದ್ಯಗಳಲ್ಲಿ ಕಾರ್ಯರೂಪಕ್ಕೆ ಬರದಿರುವುದು ತರಬೇತುದಾರರ ಅಸಮಾಧಾನಕ್ಕೆ ಕಾರಣವಾಗಿದೆ.
ವಿಪರ್ಯಾಸವೆಂದರೆ, ಪಾಕಿಸ್ತಾನ ತಂಡದೊಳಗಿನ ಸಮಸ್ಯೆಗಳ ಕುರಿತು ಇಂತಹ ವರದಿಗಳು ಹೊರಹೊಮ್ಮುತ್ತಿರುವುದು ಇದೇ ಮೊದಲಲ್ಲ. ಪುರುಷರ ತಂಡವು 2023 ಮತ್ತು 2024ರ ಐಸಿಸಿ ವಿಶ್ವಕಪ್ಗಳಲ್ಲಿ ಪ್ರದರ್ಶನ ನೀಡಲು ವಿಫಲವಾದಾಗಲೂ, ಒತ್ತಡದ ಡ್ರೆಸ್ಸಿಂಗ್ ಕೋಣೆಯ ವಾತಾವರಣದ ಬಗ್ಗೆ ಇದೇ ರೀತಿಯ ಕಥೆಗಳು ಹೊರಹೊಮ್ಮಿದವು, ಅವುಗಳಲ್ಲಿ ಕೆಲವು ನಂತರ ನಿಜವೆಂದು ದೃಢಪಡಿಸಲಾಯಿತು.
ಕಳೆದ 3-4 ವರ್ಷಗಳಲ್ಲಿ, ಪಿಸಿಬಿ ಮಹಿಳಾ ತಂಡದ ಮುಖ್ಯ ಕೋಚ್ ಅನ್ನು ನಿರಂತರವಾಗಿ ಬದಲಾಯಿಸಿದೆ. ಮಾರ್ಕ್ ಕೋಲ್ಸ್ರಂತಹ ವಿದೇಶಿ ತರಬೇತುದಾರರು, ಜುನೈದ್ ಖಾನ್, ಬಸಿತ್ ಅಲಿ, ಸಲೀಮ್ ಜಾಫರ್ ಮತ್ತು ಮೊಹ್ತಾಶಿಮ್ ರಶೀದ್ ಮುಂತಾದ ಸ್ಥಳೀಯ ತರಬೇತುದಾರರು ಮತ್ತು ಸಿಬ್ಬಂದಿ ಸೇರಿದಂತೆ ಹಲವರು ಬದಲಾಗಿದ್ದಾರೆ.
