'ಇದು ಕಡಿಮೆಯಾಯಿತು': ಪಾಕಿಸ್ತಾನ ಆಟಗಾರರಿಗೆ ಇದಕ್ಕಿಂತ ದೊಡ್ಡ ಶಿಕ್ಷೆ ಅಗತ್ಯವಿದೆ ಎಂದ ಪಾಕ್ ಮಾಜಿ ಆಟಗಾರ

ಶ್ರೀಲಂಕಾ ವಿರುದ್ಧ ದೊಡ್ಡ ಅಂತರದಲ್ಲಿ ಗೆಲುವು ಸಾಧಿಸುವಲ್ಲಿ ವಿಫಲವಾದ ನಂತರ ಪಾಕಿಸ್ತಾನ ತಂಡವು 2026ರ ಟಿ20 ವಿಶ್ವಕಪ್‌ ಪಂದ್ಯಾವಳಿಯಿಂದ ಹೊರನಡೆದಿದೆ. ಸಲ್ಮಾನ್ ಅಲಿ ಅಘಾ ನೇತೃತ್ವದ ತಂಡವು ಶ್ರೀಲಂಕಾದಲ್ಲಿ ತನ್ನೆಲ್ಲ ಪಂದ್ಯಗಳನ್ನು ಆಡಿತ್ತು. ಆದರೆ, ನಿರೀಕ್ಷಿತ ಫಲಿತಾಂಶ ತಂಡಕ್ಕೆ ಸಿಕ್ಕಿಲ್ಲ. ಆದರೆ, ಆಟಗಾರರು ಉದ್ದೇಶಪೂರ್ವಕವಾಗಿ ಕೀಳಾಗಿ ಪ್ರದರ್ಶನ ನೀಡುವುದಿಲ್ಲ. ತಂಡವನ್ನು ಉತ್ತಮಗೊಳಿಸಲು ಮತ್ತು ಬದಲಾವಣೆಗಳನ್ನು ಮಾಡಲು ಮುಂದಾಗದ ಪಾಕಿಸ್ತಾನ ಆಡಳಿತ ಮಂಡಳಿ ಇದೀಗ ಕಳಪೆ ಪ್ರದರ್ಶನ ನೀಡಿದ್ದಕ್ಕಾಗಿ ಎಲ್ಲ ಆಟಗಾರರಿಗೆ ದಂಡ ವಿಧಿಸಲು ಮುಂದಾಗಿದೆ ಎಂದು ತಿಳಿದುಬಂದಿದೆ.

ಹಲವು ವರದಿಗಳ ಪ್ರಕಾರ, T20 ವಿಶ್ವಕಪ್ 2026ರ ಸೆಮಿಫೈನಲ್ ತಲುಪಲು ವಿಫಲವಾದ ಪಾಕಿಸ್ತಾನ ತಂಡದ ಪ್ರತಿಯೊಬ್ಬ ಸದಸ್ಯರಿಗೂ ಪಿಸಿಬಿ PKR 50 ಲಕ್ಷ (ಸುಮಾರು ₹16 ಲಕ್ಷ) ದಂಡ ವಿಧಿಸಿದೆ ಎಂದು ಹೇಳಲಾಗಿದೆ. ಪಾಕಿಸ್ತಾನ ವಿಫಲವಾಗಿರುವ ಸತತ ನಾಲ್ಕನೇ ಜಾಗತಿಕ ಟೂರ್ನಮೆಂಟ್ ಇದಾಗಿದೆ.

ಪಾಕಿಸ್ತಾನ ಸೂಪರ್ 8 ಹಂತಕ್ಕೆ ತಲುಪಿತು ಆದರೆ ನ್ಯೂಜಿಲೆಂಡ್ ವಿರುದ್ಧದ ಪಂದ್ಯ ಮಳೆಯಿಂದ ರದ್ದಾಗಿ ಮತ್ತು ಇಂಗ್ಲೆಂಡ್ ವಿರುದ್ಧದ ಸೋಲಿನಿಂದಾಗಿ ಅವರು ಸಂಕಷ್ಟಕ್ಕೆ ಸಿಲುಕಿದರು. ಶ್ರೀಲಂಕಾ ವಿರುದ್ಧದ ಗೆಲುವು ಸಾಧಿಸಿದರೂ ಉತ್ತಮ ನೆಟ್ ರನ್ ರೇಟ್ ಹೊಂದಿಲ್ಲದ ಕಾರಣ ನ್ಯೂಜಿಲೆಂಡ್‌ ಸೆಮಿಫೈನಲ್‌ನಲ್ಲಿ ಸ್ಥಾನ ಪಡೆಯಿತು. ಪಾಕಿಸ್ತಾನ ಟೂರ್ನಿಯಿಂದ ಹೊರಬಿತ್ತು.

ಪಾಕಿಸ್ತಾನದ ಮಾಜಿ ನಾಯಕ ಶಾಹಿದ್ ಅಫ್ರಿದಿ ಆಟಗಾರರಿಗೆ ವಿಧಿಸಿರುವ ದಂಡವನ್ನು ವಿರೋಧಿಸದೆ, ದಂಡದ ಪ್ರಮಾಣ ಕಡಿಮೆಯಾಯಿತು ಎಂದು ಆಕ್ಷೇಪಿಸಿದ್ದಾರೆ. ಸಮಾ ಟಿವಿಯೊಂದಿಗೆ ಮಾತನಾಡಿದ ಅಫ್ರಿದಿ, 'ಈ ನಿರ್ಧಾರವನ್ನು 'ಚೊಟ್ಟಿ ಸೋಚ್' - ಸಂಕುಚಿತ ಮನಸ್ಸಿನ ಚಿಂತನೆ ಎಂದು ಕರೆದರು. ಆಟಗಾರರಿಗೆ ದಂಡ ವಿಧಿಸಿದ್ದರಿಂದ ಅಲ್ಲ, ಆದರೆ ಅವರ ಅಭಿಪ್ರಾಯದಲ್ಲಿ ಈ ದಂಡವು ನಿಜವಾದ ಸಂದೇಶ ಕಳುಹಿಸಲು ಸಾಕಾಗುವುದಿಲ್ಲ ಎಂದಿದ್ದಾರೆ.

'ಇದು ಒಂದು ಸಣ್ಣ ಮೊತ್ತ. 50 ಲಕ್ಷ ರೂಪಾಯಿಗಳಿಂದ ನೀವು ಏನು ಮಾಡುತ್ತೀರಿ? ಅದು ದಂಡದಂತೆಯೂ ಕಾಣುವುದಿಲ್ಲ. ಉತ್ತಮ ಪ್ರದರ್ಶನ ನೀಡದ ಆಟಗಾರರನ್ನು ಮತ್ತೆ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ತಳ್ಳಬೇಕು. ಕನಿಷ್ಠ ಎರಡು ವರ್ಷಗಳ ಕಾಲ ತಂಡದಲ್ಲಿ ಇರಬಾರದ ಕೆಲವು ಆಟಗಾರರಿದ್ದಾರೆ ಎಂದು ನಾನು ಭಾವಿಸುತ್ತೇನೆ. ಅಷ್ಟೇ ಸಾಕು' ಎಂದು ಅವರು ವಾದಿಸಿದರು.

PKR 50 ಲಕ್ಷ ದಂಡವು ವಿಶೇಷವಾಗಿ ಗ್ರೇಡ್ C ಮತ್ತು D ಆಟಗಾರರಿಗೆ ಬಹಳ ದೊಡ್ಡ ಮೊತ್ತವಾಗಿದೆ. ಅವರ ವಾರ್ಷಿಕ ಕೇಂದ್ರ ಒಪ್ಪಂದ ಸುಮಾರು PKR 1 ಮಿಲಿಯನ್ ಅಥವಾ 0.75 ಮಿಲಿಯನ್ ಜೊತೆಗೆ ICC ಪಾಲು ಆಗಿರುವುದರಿಂದ, ಅಂತಹ ದಂಡವು ಅವರ ಹಲವಾರು ತಿಂಗಳ ಆದಾಯಕ್ಕೆ ಸಮನಾಗಿರುತ್ತದೆ. ವರದಿಯ ಪ್ರಕಾರ, ಮೊಹ್ಸಿನ್ ನಖ್ವಿ ನೇತೃತ್ವದ ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ಆಟಗಾರರು ಪ್ರದರ್ಶನದ ಆಧಾರದ ಮೇಲೆ ಪ್ರತಿಫಲವನ್ನು ಗಳಿಸಬೇಕು ಎಂದು ನಂಬುತ್ತದೆ. ಈಗಾಗಲೇ ಆಟಗಾರರಿಗೆ ಸಾಕಷ್ಟು ಅವಕಾಶಗಳನ್ನು ನೀಡಲಾಗಿದ್ದು, ಮಂಡಳಿಯು ಇನ್ಮುಂದೆ ಆಟಗಾರರಿಗೆ ಬೆಂಬಲ ನೀಡಲು ಬಯಸುವುದಿಲ್ಲ ಮತ್ತು ಕಠಿಣ ಕ್ರಮ ತೆಗೆದುಕೊಳ್ಳುತ್ತಿದೆ.