ಅಹ್ಮದಾಬಾದ್ ನ ನರೇಂದ್ರ ಮೋದಿ ಕ್ರಿಕೆಟ್ ಸ್ಟೇಡಿಯಂ ನಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್ ಫೈನಲ್ಸ್ ನಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಎದುರಾಳಿ ನ್ಯೂಜಿಲ್ಯಾಂಡ್ ತಂಡಕ್ಕೆ ಗೆಲ್ಲಲು 256 ರನ್ ಗಳ ಬೃಹತ್ ಟಾರ್ಗೆಟ್ ನೀಡಿದೆ.
ಭಾರತ ತಂಡದ ಆರಂಭಿಕ ಆಟಗಾರರಾದ ಸಂಜು ಸ್ಯಾಮ್ಸನ್ (46 ಎಸೆತಗಳಲ್ಲಿ 89 ರನ್) ಹಾಗೂ ಅಭಿಷೇಕ್ ಶರ್ಮಾ ಅತ್ಯುತ್ತಮ ಸ್ಕೋರ್ ದಾಖಲಿಸಿ ತಂಡದ ಬೃಹತ್ ರನ್ ಗಳಿಕೆಗೆ ನೆರವಾದರು.
ಅಭಿಷೇಕ್ ಶರ್ಮಾ- ಸಂಜು ಸ್ಯಾಮ್ಸನ್ ಜೋಡಿ ಪಾಕಿಸ್ತಾನದ ದಾಖಲೆ ಮುರಿದು ಹೊಸ ವಿಶ್ವದಾಖಲೆ ನಿರ್ಮಿಸಿತು. ಇದಷ್ಟೇ ಅಲ್ಲದೇ ಅಭಿಷೇಕ್ ಶರ್ಮಾ 18 ಎಸೆತಗಳಲ್ಲಿ 50 ರನ್ ಗಳಿಸಿ ಅತಿ ವೇಗವಾಗಿ ಅರ್ಧ ಶತಕ ದಾಖಲಿಸಿ ಇಂಗ್ಲೆಂಡ್ ಆಟಗಾರ ಬೆಥೆಲ್ ಅವರ ದಾಖಲೆಯನ್ನು ಪುಡಿಗಟ್ಟಿದರೆ, ಭಾರತ ಕ್ರಿಕೆಟ್ ತಂಡದ ಪಾಲಿನ ಆಪತ್ಬಾಂಧವನಾಗಿರುವ ಸಂಜು ಸ್ಯಾಮ್ಸನ್ ಸಹ ದಾಖಲೆ ನಿರ್ಮಿಸಿದರು.
ಟಿ20 ವಿಶ್ವಕಪ್ ನಲ್ಲಿ ಕಳೆದ 5 ಪಂದ್ಯಗಳಲ್ಲಿ ಉತ್ತಮ ಬ್ಯಾಟಿಂಗ್ ಮಾಡಿರುವ ಸಂಜು ಸ್ಯಾಮ್ಸನ್ 3 ಪಂದ್ಯಗಳಲ್ಲಿ ಸತತ 50 ರನ್ ಗಳನ್ನು ಪೂರ್ಣಗೊಳಿಸಿ, ವಿಶ್ವಕಪ್ ಪಂದ್ಯದಲ್ಲಿ ಸತತ 50 ರನ್ ಗಳಿಸಿದ್ದ ವಿರಾಟ್ ಕೊಹ್ಲಿ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಇದಷ್ಟೇ ಅಲ್ಲದೇ ವಿರಾಟ್ ಕೊಹ್ಲಿ ಹೆಸರಿನಲ್ಲಿದ್ದ ಟಿ20 ವಿಶ್ವಕಪ್ ಫೈನಲ್ಸ್ ಪಂದ್ಯದಲ್ಲಿ ಗರಿಷ್ಠ ವೈಯಕ್ತಿಕ ಸ್ಕೋರ್ ಗಳಿಸಿದ ದಾಖಲೆಯನ್ನು ಸಂಜು ಸ್ಯಾಮ್ಸನ್ ಮುರಿದಿದ್ದಾರೆ.
ಕೊಹ್ಲಿ 2016-2021 ರಲ್ಲಿ ಸತತವಾಗಿ 50 ರನ್ ಗಳಿಸಿದ್ದರು. ಇದರ ಹೊರತಾಗಿ ಶ್ರೀಲಂಕಾ ತಂಡದ ಆಟಗಾರ ಮಹೇಲಾ ಜಯವರ್ಧನೆ (2010) ಪಾಕಿಸ್ತಾನದ ಬಾಬರ್ ಆಜಂ (2021) ಕೆಎಲ್ ರಾಹುಲ್ (2021) ಕುಸಾಲ್ ಮೆಂಡಿಸ್ (2026) ಸಾಹಿಬ್ಜಾದಾ ಫರ್ಹಾನ್ (2026) ಸತತ 50 ರನ್ ಗಳಿಸಿರುವ ಆಟಗಾರರಾಗಿದ್ದಾರೆ.
ಸತತ 50 ರನ್ ಗಳಿಸಿರುವ ದಾಖಲೆ ಮಾತ್ರವಲ್ಲದೇ ಸೆಮೀಫೈನಲ್ಸ್ ಹಾಗೂ ಫೈನಲ್ಸ್ ನಲ್ಲಿ 50 ರನ್ ಗಳಿಸಿರುವ ದಾಖಲೆಯನ್ನೂ ಸಂಜು ಸ್ಯಾಮ್ಸನ್ ನಿರ್ಮಿಸಿದ್ದಾರೆ. ಈ ಮೂಲಕ ಎಲೀಟ್ ಕ್ಲಬ್ ಗೆ ಸಂಜು ಸ್ಯಾಮ್ಸನ್ ಸೇರ್ಪಡೆಯಾಗಿದ್ದಾರೆ. 2009 ರಲ್ಲಿ ಪಾಕ್ ಆಟಗಾರ ಶಾಹಿದ್ ಅಫ್ರೀದಿ ಹಾಗೂ 2014 ರಲ್ಲಿ ವಿರಾಟ್ ಕೊಹ್ಲಿ ಟಿ20 ವಿಶ್ವಕಪ್ ಸೆಮೀಸ್ ಹಾಗೂ ಫೈನಲ್ಸ್ ಎರಡೂ ಪಂದ್ಯಗಳಲ್ಲಿ 50 ರನ್ ಗಳಿಸಿದ ಆಟಗಾರರಾಗಿದ್ದಾರೆ.
Advertisement
